Isẹ 1 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

Erhuvwu rẹ Isẹ

¹ Isẹ ri Solomọn, ọmọ ri Devid, ovie rẹ Izrẹl:

² Rere ihwo vwo vughe uyono vẹ aghwanre, ayen me riẹn otọ rẹ isẹ,

³ vwọ vwẹ aghwanre reyọ uyono, ọvwata, orhiẹn ọsoso vẹ orhiẹn esiri

⁴ rere a sa vwẹ iroro kẹ ihwo ighenghẹn erianriẹn vẹ evughe kẹ imighene

⁵ ọvwẹghwanren de nyo ọ me riẹn phihọ ohwo ro vwo eruọ ọye re riẹn ona,

⁶ rẹ itẹ vẹ isẹ vwọ ruọ kugbe eta vẹ ido rẹ evwẹghwanre.

⁷ Oshọẹdjẹ rẹ Ọrovwohwo ọye ẹtuọhọ rẹ erianriẹn: ẹkpa kọye re jẹ uyono vẹ aghwanre kuẹfia.

Uchebro kugbe Okpa

⁸ Ọmọ mẹ, nyo uyono rẹ ọsẹ wẹn, wọ je uyono rẹ oni wẹn kuẹfia-a;

⁹ kidie ayen omamọ rẹ erhu wo vwo tughẹ uyovwi wẹn, vẹ evwarha ru wọ gba phihọ ohọre.

¹⁰ Ọmọ mẹ, irumwemwu da riẹriẹ owẹ, wọ rhọvwa-a.

¹¹ Ayen de se we nẹ, Yanrhe rere me re fiọnko hẹrhẹ ọbara, jẹn avwanre ra hwa hẹrhẹ ọvwata na:

¹² rere e mu ayen rọ ọkpokpọ kerẹ Erivwi kerẹ ihwo re mu phihọ Ushi

¹³ avwanre cha mrẹ emu esiri buebu reyọ, kẹ avwanre cha ghwẹ ekuakua rẹ ugborho vọn iwevwi rẹ avwanre.

¹⁴ Yanrhe rere a kọn kugbe, avwanre ejobi ki vwo ekpu ọvo–

¹⁵ Ọmọ mẹ, wo nene ayen yan usu-un, si owọ wẹn nẹ idjerhe rayen,

¹⁶ kidie awọ rayen djẹ onẹ rẹ umwemwu, ayen bru okpakpa re sun ọbara

¹⁷ kidie ọ rọ vwẹ ariri tan ọbaro rẹ ọmọphran wian owian kufia;

¹⁸ ẹkẹvuọvo ihwo nana fiọnko hẹrhẹ ọbara rẹ obọ rayen, ayen hwa hẹrhẹ arhọ rẹ obọ rayen.

¹⁹ Ọtiọye idjerhe rẹ ihwo re guọnọ efe rẹ ogbarogba epha, arhọ rayen mi nene.

Nọ Ekpẹn rẹ Aghwanre

²⁰ Aghwanre hiro bunu vwẹ evun rẹ urhuvwu na; o re bo vwẹ evun rẹ eki,

²¹ obenu rẹ igbẹhẹ na o de bunu na; o ro bo vwẹ ughere rẹ orere na ejobi:

²² Mavọ okrite, ihwo igheghẹn na, rẹ ovwan ghẹn te? Otu re jehwẹ, mavọ ovwan jehwẹ krite, erianriẹn dẹ tu ekpa oma?

²³ Gba kerhọn rẹ ẹghwọ mẹ, nighe, me cha vwẹ iroro mẹ nẹ wẹ; rere wọ vwọ riẹn eta mẹ.

²⁴ Fikiridie mi seri yu wọ kerhọ-ọn me riẹn obọ yẹ ohwo ọvuọvo davwe erhọ-ọn,

²⁵ ovwan gbe obọ nyẹ uchebro mẹ wa davwe erhọn rẹ ẹghwọ mẹ-ẹ,

²⁶ Ke me cha hwẹ ovwan vwẹ oke re ukpokpogho rẹ ovwan; ke me cha hwẹ vwẹ ọke rẹ uguegue da ro ovwan oma,

²⁷ siẹ rẹ uguegue da ro ovwan oma kere ogiribo rẹ okpetu wẹn da rhe kerẹ odju, rẹ ọbẹvwẹ vẹ enuebro de rhi bru ovwan rhe.

²⁸ Ọke yena kẹ ayen che kperẹ se vwe, ẹkẹvuọvo mi che nyo-o; kẹ ayen cha guọuọ ovwẹ ẹkẹvuọvo yẹ ayen cha mrẹ vwẹ-ẹ.

²⁹ Fikiridie erianriẹn tu ayen oma ayen rha jẹ oshọẹdjẹ rẹ Ọrovwohwo reyọ-ọ,

³⁰ ayen reyọ uchebro mẹ ọvuọvo-o, ayen da jẹ ẹghwọ mẹ fia,

³¹ fiki rẹ ọtiọye na kẹ ayen cha re emamọ rẹ idjerhe rayen evun kọ vọn ayen fiki rẹ eghẹnẹkẹ rayen.

³² Kidie ihwo ughenghẹn na hiro ghwẹ kuẹfia fikiridie ayen vwẹ oma ba aye-en, ọjẹfia rẹ ẹkpa na kọye ri hwe ayen,

³³ ẹkẹvuọvo ohwo rọ kerhọn mẹ oma ko fuo, oma ko fuo, ọ gbe djẹ oshọ rẹ umiovwo-o.