Hosia 12 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

¹ Ifrem Osun rẹ odju, ọ vwọ tua odju rẹ obaro ọnre vwẹ ẹdẹ na ejobi; ogbarogba vẹ ozighi ra rhoma buẹ phihọ; ayen vẹ Asiria re vwo ọrhọvwekugbe, ayen re muẹ ọfigbo kpo Ijipt.

² Ọrovwohwo vwẹ urhi mu Juda, ko hwe Jekọp kirobo rẹ idjerhe rọye epha, vwọ reihri kirobo rẹ uruemu rọye teri.

³ Vwẹ obo evun ọ da yọnre uchukrowọ rẹ oniọvo rọye, ro vwo te omiragua ọ vẹ Ọghẹnẹ de muabọ.

⁴ Ọ vẹ amakashe muabọ ọ da marọ, ọ viẹre ọ da guọnọ aruesiri rọye, ọ vwa Ọghẹnẹ vwi Betẹl etiyin Ọghẹnẹ vọye da ta ota.

⁵ Ọrovwohwo na Ọghẹnẹ rẹ otuofovwi; Ọrovwohwo na ọye odẹ rọye.

⁶ Ọtiọye owẹ, vwẹ ọchuko rẹ Ọghẹnẹ wẹ, rhivwi rhe, yọnrọn ẹguọnọ vẹ ọsoso gan, re wọ hẹrhẹ Ọghẹnẹ wẹn kọke kọke.

⁷ Ọneki ro vwo ovwanvwọn rẹ ọghware, Oshenyẹ ọye ọ guọnọ.

⁸ Ifrem tare, E mi feri mi feri ke oma mẹ, ẹkẹvuọvo efe rọye ejobi che se si abe ro rere no oma-a.

⁹ Mẹvwẹ hẹ Ọrovwohwo Ọghẹnẹ wẹn, nẹ otọ rẹ Ijipt rhe. Me je cha rhoma vwẹ owẹ kpo utughẹ ra dia, kerẹ ẹdorẹ re bru phihọ otọ vẹrhẹ.

¹⁰ Me ta ota kẹ emraro na, Mẹvwẹ ri ruẹ emramrẹ buẹ, Me da rha wan unu rẹ emraro kpe itẹ.

¹¹ Ọ dianẹ orukuruku herọ vwi Gilead ọ rẹ uyota ayen che fiabọ, ayen vwẹ irhuẹn ze izobo vwi Gilead agbada rayen cha dia kerẹ ẹko rẹ ibieragha ra ghwẹ koko vwẹ udju.

¹² (Jekọp da djẹ kpo otọ rẹ Aram, etiyin Izrẹl da gẹga rẹ aye, fiki re aye o de sun igode.)

¹³ Vwẹ oma rẹ ọmraro Ọrovwohwo wan si Izrẹl nẹ otọ rẹ Ijipt rhe, vwẹ oma rẹ ọmraro ọye ọ wan sẹro rọye.

¹⁴ Ifrem kpare ophu mẹ gangan, ọye Ọrovwohwo rọye vwọ yan jẹn abe rẹ ọbara vwo vwẹ uyovwi rọye, ekan rọ harhe ovwẹ ejobi ki rhivwi bro ra.