Hibru 9 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

Ẹshẹ rẹ Akpo na vẹ o rẹ Odjivwu

¹ Asakiephana ekpuyovwi rẹ ọphọ rẹsọsuọ na ji vwo irhi rẹ egagọ kugbe ẹshẹ rẹ akpọ na.

² Kidie a bọn utughẹ ọvo devure, obo otafe rọye, ogburhukpẹ da herọ kugbe emẹjẹ kugbe ikara rẹ Opharo; kọye e se Asan Ọfuanfon.

³ Vwẹ obuko rẹ amwa rivẹ na utughẹ ọvo herọ re se Asan rọ Ma fon,

⁴ ro vwo agbada rẹ oro rẹ ugb oduma kugbe ekpeti rẹ ọphọ na ra vwẹ oro phare riariẹ, ọtoto rẹ oro ri mana epha da hẹ evun rọye, kugbe ọkpọ rẹ Ẹrọn ro mọ idodo, kugbe imẹjẹ rẹ ọphọ na.

⁵ Cherobim da hẹ enu rọye vẹ urinrin rọye ro lo muẹ akpanurhe rẹ aruẹdọn na. Ẹ rhe se gbe ikun nana fiotọ vwẹ asakiephana-a.

⁶ Re vwo ru imu nana gba nu, irherẹn na ke rua obo otafe na kọke kọke, kpo iye ẹgọ;

⁷ ẹkẹvuọvo ubruwevwi rivẹ na orherẹn rode na ọvo kọye re ruọ, ẹsiẹvo egbukpe, ọ me ra reyọ ọbara kọye ọ vwọ gọ iye kẹ oma rọye kugbe oruchọ rẹ ihwo na ejobi.

⁸ Vwẹ oma rẹ ọnana Erhi Ọfuanfon na ko dje phia nẹ idjerhe ra wan kpo obo eshẹ na ji rhie phihọ-ọ fikiridie ubruwevwi rẹ otafe na ji gbere ughwru

⁹ (kọye hẹ oka rẹ oge nana). Kirobo rẹ irueru nana mudia phihọ, okẹ vẹ iye ra gọre na sa kẹ ohwo egbomọphẹ ra vwọ gọ egagọ rọ ghare-e,

¹⁰ ẹkẹvuọvo kẹ irueru rẹ emuọre kugbe udi kugbe okoka rẹ ẹhọ ọvo, irhi re jiri fiki rẹ ugboma na bẹsiẹ ro vwo te ọke ra vwọ rhuẹrẹ phihọ.

¹¹ Ẹkẹvuọvọ ọke ri Kristi rẹ orherẹn rode rẹ emu esiri rọ rhere na, rọ wan oma rẹ ọ rọ marho ejobi kugbe omamọ rẹ utughẹ rọ ghare rhe (rẹ a vwẹ obọ ru-u, kọye hẹ, ọ dia ọ rẹ emama nana-a)

¹² ọ da ro Asan Ọfuanfon na ẹsiẹvo goi, ọ dianẹ kẹ ọbara rẹ ẹvwe vẹ erhuẹ-ẹn ẹkẹvuọvo ọbara robọ rọye, kenẹ ọ vwọ dẹ ẹtanhirhe ri bẹdẹ na.

¹³ Kidie ọ da dianẹ ọbara rẹ ẹvwe vẹ erhuẹn kugbe iwurhie rẹ egbo ra fẹrẹ ku ihwo ri gbe ẹgua se ru oma rẹ ayen fon,

¹⁴ komavọ ọbara ri Kristi, rọ wan oma rẹ Erhi ri bẹdẹ na vwẹ oma rọye gọ iye ro jẹ ekan evwo kẹ Ọghẹnẹ, se ru udu rẹ ovwan fon nẹ iruo ighweghwu na ra gọ Ọghẹnẹ ri bẹdẹ na.

¹⁵ Fiki rẹ ọtiọye na kọye ọ vwọ dia obruche rẹ ọphọ ọkpokpọ na, rere ayen otu re seri se vwo vwo ivẹ rẹ uku ri bẹdẹ na, fikiridie ohwo ọvo ghwuru ra vwọ tan ayen nẹ ogbeku rọ hẹ otọ rẹ ọphọ rẹsosuọ.

¹⁶ Kidie o de fo rere a re ọphọ, ko ji fo rere e hwe ohwo ro mudia re ọphọ na.

¹⁷ Kidie ọphọ ra rere re de hwe ohwo phihọ ọye hẹ omamọ rẹ ọphọ, fikiridie rẹ ohwo rọ re ọphọ da hẹ akpọ na ọphọ yena se vwo oganga-an.

¹⁸ Kọye sorọ rẹ ọbara kanre ọphọ rẹsosuọ na-a.

¹⁹ Ọke ri Mọsis vwọ se eta rẹ urhi na kẹ ihwo na ejobi nu, ọ da rẹyọ ọbara rẹ ẹvwe vẹ erhuẹn re hweri na, vẹ ame kugbe oruru rẹ isene kugbe awhorhẹ, ọ da fẹrẹ ku ọbe na kugbe ihwo na ejobi.

²⁰ Ọ da tanẹ, Ọnana hẹ ọbara rẹ ọphọ rẹ Ọghẹnẹ vẹ ovwan rere.

²¹ Obọ ọvnovo na ọ da je fẹrẹ ọbara na ku utughẹ na kugbe ekuakua ejobi re herọ ra vwọ ga ẹga.

²² Uyota, kirobo rẹ urhi epha kemu kemu ra fẹrẹ ọbara ku ejobi yọ fonro, kpẹsiẹ re sun ọbara te otọ-ọ yẹ evwoghovwo rẹ umwemwu herọ-ọ.

Iye ri Kristi re ghwa Umwemwu nu

²³ O ghine fo rere a vwẹ egagọ nana vwọ hworhẹ uhoho re emu re hẹ obo odjivwu, ẹkẹvuọvo okpuyovwi rẹ emu re hẹ obo odjivwu na kẹ omamọ rẹ iyẹ rọ rhonọ enana kọye a vwọ hworhẹ.

²⁴ Kidie Kristi ro ẹshẹ ra vwẹ obọ ru-u, uhoho rẹ ọ rẹ omamọ na, ẹkẹvuọvo okpoyovwi rẹ odjivwu dẹn, asakiephana kọ phia vwẹ obaro rẹ Ọghẹnẹ rọ rẹ kẹ avwanre.

²⁵ Eyẹ o rhe fo rere ọ vwẹ oma rọye gọ iye kọke kọke-e, kirobo rẹ orherẹn rode na ro Asan Ọfuanfon na ẹgbukpe vẹ ọbara rọ dia ọ robọ rọye-e;

²⁶ kọye o vwo dje oja na ẹriẹriọ nẹ ẹtuọhọ rẹ akpọ na rhe. Ẹkẹvuọvo kirobo rọ epha na, ọ vwẹ oma rọye gọ iye ẹsiẹvo nure ọ da rhe vwẹ oma phia vwẹ oba rẹ oge na re ọ vwọ ghwẹ imwemwu rẹ ihwo ejobi nu.

²⁷ Kirobo re bru ẹdẹ nẹ ohwo rẹ akpọ ẹsiẹvo o ghwẹ, ọyena da wan nu kẹ ẹdjọeguo,

²⁸ Vwẹ ọtiọye na ra vwọ vwi Kristi gọ iye ẹsiẹvo nure na rọ ghwa imwemwu rẹ ihwo buebu nu na, kọ je cha rhe vwẹ obọ rivẹ, ọ dianẹ kẹ umwemwu ọ cha ghwọrọ-ọ ẹkẹvuọvo ko che sivwi ayen otu re vwẹ erhiori hẹrhẹ.