Hibru 8 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

Orherẹn Rode rẹ Ophẹ Ọkpokpa ro me Yovwi

¹ Asakiephana obo rẹ avwanre ta na kẹ ọna: avwanre vwo orherẹn rode ọtiọye, ọ ro tidia phihọ obọrhe rẹ ekete rẹ ọ ro vwo Ọrho vwẹ obo odjuvwu.

² Ọye ji ogbodibo vwẹ evun rẹ ẹshẹ kugbe utughẹ rẹ uyota re vwo vi ọ dia obọ rẹ ohwo rẹ akpọ-ọ ẹkẹvuọvo Ọrovwohwo.

³ Kidie ọye hẹ iruo ri korherẹn korherẹn rode rere ọ vwọ gọ iye ọ me rha kẹ okẹ; kọye o ji vwo fo rere orherẹn nana ji vwo vwo obọ rọ vwọ gọ iye.

⁴ Asakiephana ọ dianẹ kẹ akpọ na ọ epha nọ, ọ rha dia orherẹn kakaka-a, fikiridie irherẹn herọ nure re gọ iye kirobo rẹ urhi na epha.

⁵ Ayen gọ uhoho rẹ ẹshẹ rọ hẹ obo odjuvwu; kidie ọke ri Mosis cha vwọ bọn utughẹ na, Ọghẹnẹ da kpa okpa kẹ, tanẹ, Gbe no, ji kemu kemu ru wo che ru họhọ oghẹre ri mi dje kẹ wẹ vwẹ obenu rẹ ugbenu na.

⁶ Ẹkẹvuọvo kirobo rọ epha na, Kristi vwo odiboegbe ro yovwi nọ ọ rẹ awanre na kidie ọphọ ro mudia re na ri me yovwi, fikiridie ive re ve phihọ na ri me yovwi rhe.

⁷ Ọ dianẹ kẹ ive rẹsosuọ na yovwiri nọ, mane a rha guọnọ ọfa-a.

⁸ Kidie ọke rọ vwọ mrẹ oruchọ vwọ o da ta nẹ: Ẹdẹ cha, eriyin Ọrovwohwo tare, re me vẹ uwevwi rẹ Izrẹl cha vwọ re ọphọ ọkpokpọ kugbe uwevwi ri Juda;

⁹ ọ dia oghẹre rẹ ọphọ re me vẹ esẹ rẹ ovwan rere-e ọke re me vwọ su ayen nẹ otọ rẹ Ijipt rhe kidie ayen sa yọnrọn ọphọ yena-a, ọtiọye na me gbe davwerhọn rẹ aye-en, eriyin Ọrovwohwo tare.

¹⁰ Ọnana hẹ ọphọ re me vẹ uwevwi rẹ Izrẹl cha re vwẹ ọke rẹ ẹdẹ yena da wan nu, eriyin Ọrovwohwo tare; ki mi che phi urhi mẹ phihọ udu rayen, ke si ayen phihọ ubiudu rayen, ke me dia Ọghẹnẹ rayen, ayen ke dia ihwo mẹ.

¹¹ Ayen ohwohwo gbi che yono ohwo-o eyẹ oniọvo yono oniọvo-o, tanẹ, Riẹn Ọrovwohwo na, kidie ayen ejobi cha riẹn vwẹ, nẹ omotete rhi duvwu ọkpako.

¹² Kidie mi ni arodọvwẹ kẹ imwemwu rayen, me gbe karohọ imwemwu rayen ọfa-a.

¹³ Rọ vwọ ta ota rẹ ọphọ ọkpokpọ na o de dje nẹ ọ rẹsosuọ na kpo awanre re. Ọbo ri kpo awanre rọ ghworo yo muegbe rọ vwọ ranvwiẹ re.