Galesha 4 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

¹ Me ta kẹ ovwan nẹ ọke rẹ ọmọwanran na, vwọ hẹ omotete vwẹ obọ na, o rhe yovwi nọ ọviẹ-ẹn, dede na ọye hẹ ohwo ro vwo uku na ejobi

² ẹkẹvuọvo ọ hẹ otọ rẹ ihwo re vwẹ ẹro te kugbe otu rẹ esarobo bẹsiẹ rẹ ọke rẹ ọsẹ na bruru vwọ gba.

³ Ọtiọye ọ vẹ avwanre je epha; ọke rẹ avwanre vwọ hẹ imitete, avwanre kẹ eviẹn rẹ erhi rẹ ebaghẹrẹ rẹ akpọ na.

⁴ Ẹkẹvuọvo, rẹ ọke na rhe vwọ gbare, Ọghẹnẹ de ji ọmọ rọye na rhe, rẹ aye vwiẹri, re vwiẹri vwẹ otọ rẹ urhi na,

⁵ re ọ rhe tan ihwo re hẹ otọ rẹ urhi na, rere a vwọ mrasan vwẹ avwanre ru emọ.

⁶ Fiki rẹ obo rẹ ovwan vwọ dia emọ na, Ọghẹnẹ de phi Erhi rẹ ọmọ rọye na phihọ udu rẹ avwanre, ro kperẹ nẹ Abba! Baba!

⁷ Ọtiọye na, vwẹ oma rẹ Ọghẹnẹ ovwan gbe dia ọviẹn ọfa-a, ẹkẹvuọvo kẹ ọmọ, wa da dia ọmọ kẹ ọmọwanran.

Pọl ro Enwan rẹ Ihwo Galesha ri Segbuyota

⁸ Rhabae rẹ ovwan je riẹn Ọghẹnẹ-ẹ ovwan kẹ eviẹn rẹ ẹdjọ;

⁹ ẹkẹvuọvo vwẹ asakiephana rẹ ovwan rhe vwọ riẹn Ọghẹnẹ nure na, rẹ Ọghẹnẹ je vwọ riẹn ovwan nure na, komavọ ovwan rhe vwo rhivwi bru erharhe vẹ ebaghẹrẹ rẹ erhi rẹ akpọ na re wa rhe rhoma dia eviẹn rẹ ayen?

¹⁰ Ovwan bẹrẹ ẹfa rẹ ẹdẹ, kugbe emeranvwe, kugbe evwru kugbe ukpe!

¹¹ Oshọ ko mu vwe nẹ owian me wian vwẹ ohri rẹ ovwan na kẹ ofefe.

¹² Imoni, mẹ rẹ ovwan, wa dia kirobo re me epha na, kidie ekpuyovwi mẹ je epha kirobo rẹ ovwan epha. Ovwan ru vwe chọ-ọ;

¹³ ovwan riẹnre nẹ oma rẹ ọga mi vwo ghwoghwo iyẹnrẹ esiri na kẹ ovwan vwẹ ẹsuosuọ,

¹⁴ dede na nẹ eyere mẹ kẹ ọdavwini kẹ ovwan na, wa vwẹ ovwẹ jehwẹ-ẹ eyẹ jẹ vwẹ fia-a, ẹkẹvuọvo wa da reyọ ovwẹ kerẹ amakashe rẹ Ọghẹnẹ, kerẹ Jesu Kristi dede.

¹⁵ Kẹ omavwerhovwẹ rẹ ovwan yena rhọ? kidie mi se se oseri rẹ ovwan nẹ, ọ dianẹ kẹ obo re se ru, mane ovwan yoghro ibiẹro rẹ ovwan kẹ vwẹ.

¹⁶ Mẹvwẹ kẹ ọvweghrẹ rẹ ovwan, fikiridie me ta uyota na kẹ ovwan?

¹⁷ Oma rẹ ayen phariẹ kpahe ovwan na, ọ dia ọ rẹ erhuvwu-u; ayen guọnọ ovwan kanre ẹchẹ gbe, rere ovwan vwo ni ayen rhuarho.

¹⁸ Kidie, o fori rere a vwọ phariẹ oma kpahe emu esiri vwẹ ọke ejobi, ọ dianẹ ọke re me da hẹ ohri re ovwan ọvo-o.

¹⁹ Emọ mẹ, re me chuẹ uvwiẹ rayen, bẹsiẹ ri Kristi vwọ dia oma rẹ ovwan!

²⁰ Me guọnọre nẹ me dia ohri rẹ ovwan vwẹ asakiephana rere me rhẹriẹ urhuru re me vwọ ta ota kẹ ovwan na, kidie ofu rẹ ovwan dje vwe hwe.

Isẹ rẹ Hega vẹ Sera

²¹ Gba ta kẹ vwẹ, ovwan re rhoma guọnọ dia otọ rẹ urhi na, we nyo obo rẹ urhi tare?

²² Kidie e siro nẹ Ebraham vwiẹ emọ ivẹ ọvo ọ rẹ ọviẹn ọrivẹ kẹ ọ rẹ emuvwiẹ.

²³ Ẹkẹvuọvo, ọmọ rẹ ọviẹn nana e vwiẹrẹ vwẹ ọ rẹ ugboma, ọmọ rẹ omuvwiẹ na e vwiẹrẹ vwẹ ọ rẹ ive.

²⁴ Asakiephana ọ nana udo mi gbe na; eya nana ivẹ na mudia kẹ ephọ ivẹ. Ọvo ọ ra rere vwẹ Ugbenu ri Sinae ro vwiẹ emọ rẹ ọviẹn kọye hẹ Hagar.

²⁵ Asakiephana Hagar na kọye hẹ Ugbenu ri Sinae rọ hẹ Arebia, rọ vẹ Jerusalẹm rọ herọ vwẹ asakiephana gbe shehọ; kidie te ọye te emọ rọye je hẹ ọviẹn rhi te ẹdẹ ri nonẹ na.

²⁶ Ẹkẹvuọvo, Jerusalẹm rọ hẹ obenu na, ọmuvwiẹ kọye hẹ oni rẹ avwanre ejobi.

²⁷ kidie, e siro, Ghọghọ, Ẹ ẹgan ro je vwiẹ; kperi re wọ van, wẹ rọ chuẹ uvwiẹ dẹvo-o; kidie aye ro vwo ọshare-e vwiẹ emọ nọ aye ro vwo ọshare.

²⁸ Asakiephana, imoni, avwanre kerẹ Aizik, kẹ emọ rẹ ive.

²⁹ Ẹkẹvuọvo kirobo rọ hẹ epha vwẹ ọke yena, rọ re vwiẹri vwẹ ugboma na de mu kpahe ọ re vwiẹri vwẹ Erhi na, eriyin ọ je epha rhi te ọke na.

³⁰ Ẹkẹvuọvo mavọ ọbe Ọfuanfon na tare? ọ tare nẹ Djẹ ọviẹn na vẹ ọmọ rọye kufia; kidie ọmọ rẹ ọviẹn na kugbe ọmọ rẹ ọmuvwiẹ na cha ghare uku na kugbe-e.

³¹ Ọtiọye na, imoni, avwanre gbe dia emọ rẹ ọviẹn na-a ẹkẹvuọvo, kẹ emọ rẹ ọmuvwiẹ na.