Ẹyano 6 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

¹ Ọrovwohwo da kpahe kẹ Mosis, “Asakiephana wọ cha mrẹ obo ri mi che ruẹ kẹ Fẹro; kidie obọ ọgagan o che vwo si obọ nẹ ayen kpo, uyota, obọ ọgagan ọ cha vwọ djẹ ayen nẹ otọ rọye na.

Ọghẹnẹ rhoma se Mosis

² Ọghẹnẹ da ta kẹ Mosis, “Mẹvwẹ Ọrovwohwo na.

³ Me vwẹ oma phia kẹ Ebraham, vwọ kẹ Aizik, vwọ kẹ Jekọp, vwẹ odẹ rẹ Ọghẹnẹ ro vwo Ẹgba ejobi, ẹkẹvuọvo ọ dia odẹ mẹ Ọrovwohwo na me vwọ vwẹ oma mẹ phia kẹ ayeen.

⁴ Me vẹ ayen da re ọphọ, nẹ me vwẹ otọ rẹ Kenan na kẹ ayen, otọ rẹ ayen da dia erhorha na.

⁵ Ọ rọ marho vwọ, mi ji nyo enuebro rẹ emọ rẹ Izrẹl rẹ ihwo rẹ Ijipti vwo ru eviẹn etiyin me da karohọ ọphọ mẹ na.

⁶ Fiki rẹ ọtiọye na gba ta kẹ ihwo rẹ Izrẹl, “Mẹvwẹ Ọrovwohwo na, mi che si we nẹ otọ rẹ oja rẹ ihwo rẹ Ijipti, ki mi che si we nẹ ọviẹn rayen, ke me tan wẹ nu obọ rẹ ayen.

⁷ Me rọye owẹ phiyọ ihwo mẹ, ke me dia Ọghẹnẹ wẹn; ku wọ je riẹn nẹ Mẹvwẹ Ọrovwohwo Ọghẹnẹ wẹn, rọ si we nẹ otọ rẹ ọviẹn rẹ ihwo rẹ Ijipti.

⁸ Ke me cha vwẹ owẹ rhe otọ na ri mi veri nẹ me vwọ kẹ Ebraham, Aizik vẹ Jekọp, ke me vwọ ghare owẹ ughwẹ. Mẹvwẹ Ọrovwohwo na.”’

⁹ Mosis da ta eta nana kẹ emọ rẹ Izrẹl, ẹkẹvuọvo ayen kerhọ rẹ rọyeen fiki rẹ iroro rayen re hrare kugbe oja rẹ ọviẹn rẹ ayen epha.

¹⁰ Etiyin Ọrovwohwo na da ta kẹ Mosis,

¹¹ “Yanran ra ta kẹ Fẹro ovie rẹ Ijipti nẹ o siobọ nẹ emọ rẹ Izrẹl re ayen kpo nẹ otọ rọyen.”

¹² Ẹkẹvuọvo Mosis da ta kẹ Ọrovwohwo na, “Nighe, ihwo rẹ Izrẹl dede kerhọ mẹẹ; ko mavọ Fẹro sa vwọ kerhọ mẹ, ohwo re jẹn awẹrẹnvwe rọyen ebro na?

¹³ Ẹkẹvuọvo Ọrovwohwo da ta kẹ Mosis vẹ Erọn, ọ da vuẹ ayen ovuẹ rhe ihwo rẹ Izrẹl vẹ Fẹro ovie rẹ Ijipti re ọ reyọ emọ rẹ Izrẹl nẹ otọ rẹ Ijipt na rhe.

Uvwiẹ Ri Mosis kugbe Erọn

¹⁴ Enana keye igbuyovwi rẹ iwevwi rẹ esẹ rayen; emọ rẹ Rubẹn rẹ ọmọkpako rẹ Izrẹl: Hanọk, Palu, Hẹzrọn vẹ Karmi: enana keye ekru rẹ Rubẹn.

¹⁵ Emọ rẹ Simiọn: Jemuẹl, Jamin, Ohad, Jachin, Zohar, vẹ Shaul ọmọshare rẹ aye rẹ ohwo rẹ Kenani; enana keye ekru rẹ Simiọn.

¹⁶ Enana keye edẹ rẹ emeshare rẹ Lẹvi kirobo rẹ orua rayen epha. Gẹrshọn, Kohat vẹ Merari, ikpe rẹ Lẹvi dia akpọ da dia ujosan gbẹ ihwe gbẹ ighwrẹn.

¹⁷ Emeshare rẹ Gẹrshọn: Libni vẹ Shimei, vwẹ orua rayen.

¹⁸ Emeshare rẹ Kohat: Amram, Izhar, Hẹbrọn vẹ Uziẹl: ikpe rẹ Kohar dia akpọ da dia ujosan gbẹ ihwe gbẹ erha.

¹⁹ Emeshare rẹ Merari: Mahii vẹ Mushi. Enana ekru rẹ Lẹvi kirobo rẹ orua rayen epha.

²⁰ Amram da vwi Jokebẹd oniọvo rẹ ọsẹ rọyen vwọ rọvwọ: o de vwiẹ Erọn vẹ Mosis, ikpe rẹ akpọ rẹ Amram da dia ujosan gbẹ ihwe gbẹ ighwrẹn.

²¹ Emeshare rẹ Izhar: Korah, Nẹfẹg, vẹ Zichri.

²² Emeshare rẹ Uziẹl: Mishael, Ẹlzafan, vẹ Sitri.

²³ Erọn da reyọ ọmọtẹ rẹ Aminadab, re se Elisheba oniọvo rẹ Nashọn vwọ rọvwọ, o de vwiẹ Nadab, Abihu, Eleaza vẹ Itama.

²⁴ Emeshare rẹ Korah: Assir, Elkanah, vẹ Abiasaf; enana keyen orua rẹ Korah.

²⁵ Eleazar, ọmọshare rẹ Erọn da rọvwọ ọmọtẹ rẹ Putiẹl; o de vwiẹ Finehas kẹ. Enana keyen igbuyovwi rẹ uwevwi rẹ esẹ rẹ ihwo rẹ Lẹvi vwẹ oruorua rayen.

²⁶ Erọn vẹ Mosis kọyen Ọrovwohwo ta kẹ nẹ, “Reyọ ihwo rẹ Izrẹl nẹ otọ rẹ Ijipiti rhe ekruekru rayen.”

²⁷ Mosis vẹ Erọn, eyẹn ihwo re ta ota kẹ Fẹro ovie rẹ Ijipiti vwọ kpahe ẹreyọ rẹ ihwo rẹ Izrẹl vwo nẹ Ijipiti.

Urhi rẹ Ọrovwohwo Ji kẹ Mosis vẹ Erọn

²⁸ Vwẹ ẹdẹ rẹ Ọrovwohwo ta ota kẹ Mosis vwẹ otọ rẹ Ijipiti,

²⁹ Ọ da ta kẹ nẹ, “Mẹvwẹ Ọrovwohwo na; vuẹ Fẹro ovie rẹ Ijipiti obo re me ta kẹ wẹ ejobi.

³⁰ Ẹkẹvuọvo Mosis da ta kẹ Ọrovwohwo, “Mẹvwẹ ohwo re jẹ awẹrẹnvwe rọyen ebro, kẹ mavọ Fẹro vwọ sa kerhọ mẹ?