Ẹyano 34 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

Ophapha rẹ Oragha Rivẹ

¹ Ọrovwohwo da ta kẹ Mosis, Bẹrẹ ephapha rẹ oragha ivẹ kerẹ e rẹ ẹsosuọ na; ki mi si phihọ ephapha na, eta rẹ ephapha rẹ ẹsosuọ na, ri wọ bẹre na.

² Cha oma vwẹ irhiọke, re wọ rhe obenu rẹ Ugbenu ri Sinae vwẹ irhiọke, wọ vwẹ oma wẹn phia kẹ vwẹ vwẹ enu rẹ ugbenu na.

³ Ohwo ọvuọvo che nene uwe kpo enu-u; wo ja mrẹ ohwo ọvuọvo vwẹ asan ugbenu na-a, wo jẹn eranvwe ọvuọvo ria emu vwẹ obaro rẹ ugbenu na-a.

⁴ Ọtiọye na Mosis da bẹrẹ ephapha rẹ oragha ivẹ kerẹ e rẹ ẹsosuọ na, o de vrẹn vwẹ irhiọke o de kpo enu rẹ Ugbenu ri Sinae, kirobo rẹ Ọrovwohwo ta kẹ, o da reyọ ephapha rẹ oragha na vwẹ obọ rọye.

⁵ Etiyin Ọrovwohwo de won rhe vwẹ egho na ọ vẹ ọye de mudia etiyin, o de ghwoghwo odẹ rẹ Ọrovwohwo na.

⁶ Ọrovwohwo da ka obaro rọye, o de ghwoghwo, Ọrovwohwo, Ọrovwohwo, Ọghẹnẹ rọ ria ehrọre vẹ arodọvwẹ, ọ fobọ muophu-u ọ vẹ ẹguọnọ vẹ uyota.

⁷ Ẹguọnọ ro jẹrhẹriẹ rọye herọ vwọ kẹ ihwo uriori vwo ghovwo orukuruku vẹ urhiegbe vẹ umwemwu, ẹkẹvuọvo o brorhiẹ hwe ohwo rọ re abe rọ reihri rẹ umwemwu rẹ esemọ vwẹ obọ rẹ emọ ra ruẹ emọ rayen ra ro uvwiẹ rerha vẹ ọrẹne.

⁸ Etiyin Mosis de bru okpakpa gbe opharo phihọ otọ, ọ da ga.

⁹ Ọ da ra, Me da mrẹ aruesiri wẹ vwẹ etinẹ na, E Ọrovwohwo, gbe jẹ Ọrovwohwo, Me rẹ wẹ, yan ro uherevie rẹ avwanre, dede nẹ ayen ihwo vẹ udu ọgangan wọ vwẹ orukuruku rẹ avwanre vẹ umwemwu rẹ avwanre ghovwo avwanre, rere wọ vwẹ avwanre ru iriuku wẹn.

A Rhoma Rhiọ Ọphọ na

¹⁰ Etiyin ọ da ta, Nighe, Me re ọphọ. Vwẹ ẹro rẹ ihwo wẹn ejobi mi che ru igbunu, re ji ru vwẹ akpọ na yerẹ ẹgborho efa dẹvo-o; ihwo ejobi re wa dia ohri rayen na ke cha mrẹ iruo rẹ Ọrovwohwo; kidie emu ro muoshọ mi che nene ovwan ru.

¹¹ Ni urhi mi che ji kẹ wẹ nonẹ na mu. Nighe, me cha djẹ ihwo rẹ Amọr, ihwo ri Kenan, ihwo ri Hẹt, ihwo ri Pẹriz, ihwo ri Hiv, vẹ ihwo ri Jebus nẹ otọ na kẹ ovwan.

¹² Gba kẹnoma wẹn, we de rhe nene ihwo rẹ otọ re wa ra na re ọphọ, ọ da rha dia ufi vwẹ ohri rẹ ovwan.

¹³ Wa me guọghọ egbada rayen, wa me rha guọghọ ichivwo rayen, wa me nyavwe ighriki rayen she,

¹⁴ (kidie wa ga Ọghẹnẹ ọfa-a, fiki rẹ Ọrovwohwo rẹ odẹ rọye hẹ Omẹriọ na, ọye Ọghẹnẹ rọ rioma).

¹⁵ Ọ rha dia ọtiọye-e we de rhe nene ihwo rẹ otọ na re ọphọ, ọke rẹ ayen de gbe ọfarhiẹ nene edjọ rayen rẹ ayen da rhi ze izobo kẹ edjọ rayen re ohwo ọvo de se ovwan, wọ da re emu rẹ izobo rayen

¹⁶ etiyin wa me rha vwẹ emetẹ rayen kẹ emeshare rẹ ovwan emetẹ rayen mi gbe ọfarhiẹ nene edjọ rayen ayen mi rhe ru emeshare rẹ ovwan vwo gbe ọfarhiẹ nene edjọ rayen.

¹⁷ Wọ kare edjọ ọvuọvo kẹ oma wẹ-ẹn.

¹⁸ Orẹ rẹ ikara ro jephuo na wa me riọ. Ẹdẹ ighwrẹn ye wa re ikara ro jephuo, kirobo re me ta kẹ wẹ, vwẹ ọke re bruphihọ vwẹ emeranvwe rẹ Abib; kidie vwẹ evun rẹ emeranvwe rẹ Abib we vwo nẹ evun rẹ Ijipt rhe.

¹⁹ Obo ri rhie urhoro ejobi emẹ, eranvwe rẹ eshare rẹ ovwan ejobi, emọ rẹ irhuẹn vẹ igodẹ rẹ ẹsosuọ.

²⁰ Ọmọ rẹ ekẹtẹkẹtẹ rẹ rẹsosuọ, wọ me vwẹ ọmọ rẹ ogodẹ tan hirhe, ọ da dianẹ wọ guọnetọ tan hirhe-e wo mi vwirhi ohọre rọye. Emekpako wẹn ejobi a tan ayen hirhe. We jẹ ọvuọvo bru vwe cha vẹ abọ diodi-i.

²¹ Ẹdẹ esan wo vwo ru iruo, ẹkẹvuọvo ẹdẹ righwrẹn wo mi rovwoma; ọke rẹ evoro vẹ ọke rẹ orhọ wo mi rovwoma.

²² Wọ me rha re orẹ rẹ ẹdidjala, emamọ re ẹsosuọ re orhọ re eka, kugbe ọ rẹ ọghwẹkoko vwẹ oba rẹ ukpe.

²³ Asiarha ẹgbukpe ọye eshare rẹ ovwan vwọ oma phia vwẹ obaro rẹ Ọrovwohwo Ọghẹnẹ, Ọghẹnẹ rẹ Izrẹl.

²⁴ Kidie me cha djẹ ẹgborho nẹ obaro wẹ, etiyin na ughwru wẹn kọ hẹre phihọ; ohwo ọvuọvo gbe cha guọnọ otọ wẹ-ẹn, vwẹ ọke wọ da ra vwẹ oma phia kẹ Ọrovwohwo Ọghẹnẹ wẹn asiarha ẹgbukpe.

²⁵ Wọ vwẹ iphuephu ba ọbara rẹ izobo mẹ ze-e; yẹrẹ izobo rẹ orẹ rẹ ọwanvrẹn na phrọke-e.

²⁶ Emamọ rẹ ẹsosuọ rẹ orọ wẹn ọye wọ vwọ rhe uwevwi rẹ Ọrovwohwo Ọghẹnẹ wẹn. Wo chere ọmọ rẹ ẹvwe vwẹ evun rẹ ame rẹ ivie rẹ oni rọye-e.

²⁷ Etiyin Ọrovwohwo da ta kẹ Mosis, Si eta nana; eta nana eye mi vwo nene uwe vẹ Izrẹl re ọphọ.

²⁸ Ọ vẹ Ọrovwohwo da dia etiyin ẹdẹ ujuvẹ vẹ ason ujuvẹ. Ọ re ikara-a eyẹ ọ da ame-e. Etiyin o de si eta rẹ ọphọ na phihọ ophapha na, irhi ihwe na.

Mosis Wotọ nẹ Ugbenu na rhe

²⁹ Ọke ri Mosis vwo wotọ nẹ Ugbenu ri Sinae rhe, ọ vẹ ophapha ivẹ rẹ iseri na vwẹ obọ rọye gbe wotọ nẹ ugbenu na rhe, Mosis gbe rha riẹn nẹ opharo rọye lo-o fikiridie o nene Ọghẹnẹ ta ota.

³⁰ Ọke rẹ Erọn vẹ ihwo rẹ Izrẹl na ejobi vwọ mrẹ Mosis, nighe ohọroma rẹ opharo rọye ko lo, oshọ rẹ ayen vwo si kẹrẹ de mu ayen.

³¹ Ẹkẹvuọvo Mosis de se ayen; etiyin Erọn vẹ isun rẹ ukoko na de rhivwi bro ra, Mosis de nene ayen ta ota.

³² Ukuko rọye ihwo rẹ Izrẹl ejobi de si kẹrẹ o de ji urhi rẹ Ọrovwohwo keri kẹ vwẹ Ugbenu ri Sinae ejobi kẹ ayen.

³³ Ọke ri Mosis vwọ ta ota kẹ ayen nu, o de phi oga rhurhu opharo rọye;

³⁴ ẹkẹvuọvo kọke kọke ri Mosis de bru Ọrovwohwo kpo ota, o mi si oga na nu bẹsiẹ ro che vwo rhivwi rhe; ọke ro de rhivwi rhe, ro de gbe ikun rẹ obo ra ta kẹ kẹ ihwo rẹ Izrẹl,

³⁵ kẹsiẹye ihwo rẹ Izrẹl ke mrẹ opharo ri Mosis, tanẹ, ohọroma rẹ opharo ri Mosis lo; etiyin Mosis mi rhe phi oga na rhurhu opharo rọye, bẹsiẹ rọ vẹ ọye ke rhoma ta ota.