Ẹyano 11 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

Ughwu rẹ Emekpako ra ta Ota kpahe

¹ Ọrovwohwo da ta kẹ Mosis, Emiavwe ọvo ji chekọ kẹ Fero vẹ Ijipt; ọye na da wan nu ko siobọ nẹ uwe kpo; ọke ro de siobọ nẹ uwe kpo, kọ djẹ wẹ kpo tototo.

² Gba ta ota phihọ erhọn rẹ ihwo na, rere ayen ohwo ọvuọvo, te aye te ọshare yare mie ọrivẹ rọye ekuakua rẹ idọnọ eyẹ oro.

³ Ọrovwohwo da vwẹ eruesiri kẹ ihwo na vwẹ obaro rẹ ihwo rẹ Ijipt na. Ọrọ marho, ohwo na Mosis da rhe rho gangan vwẹ otọ rẹ Ijipt na, vwẹ obọ rẹ idibo ri Fero vẹ obọ rẹ ihwo na ejobi.

⁴ Mosis da ta, Enẹ Ọrovwohwo tare: Vwẹ oma rẹ uherevie ason ke me cha wan otọ rẹ Ijipt na;

⁵ emekpako rẹ otọ rẹ Ijipt na ejobi ki che ghwu nẹ ọmọkpako ri Fero ro tidia vwẹ enu rẹ ekete rọye, re te ọmọkpako rẹ odibo ro ridia vwẹ obuko rẹ uwuye; kugbe emekpako rẹ uchuru.

⁶ Oviẹ rode kọ cha dia vwẹ otọ rẹ Ijipt na, ọ ra je mrẹ vwọ dẹvo-o, ra gbe je cha mrẹ vwọ ọfa-a.

⁷ Ẹkẹvuọvo vwọ kẹ emọ rẹ Izrẹl eyẹ ohwo eyẹ eranvwe eyẹ eranko cha viẹ-ẹ; rere wọ vwọ riẹn nẹ Ọrovwohwo gbere ughwru vwọ uvwre rẹ ihwo rẹ Ijipt vẹ erẹ Izrẹl.

⁸ Idibo wẹn nana ejobi na ki che bru vwe rhe, kẹ ayen che shiguẹ kẹ vwẹ, tanẹ, Wa yanran kpo, wọ vẹ ihwo ri nene uwe ejobi. Ọyena de nẹ otọ nu ke me yanran kpo. O de nẹ obaro ri Fero vẹ ophu.

⁹ Etiyin Ọrovwohwo da ta kẹ Mosis, Fero cha sa davwerhọ wẹ-ẹn; rere igbunu mẹ vwo bu phihọ vwẹ otọ rẹ Ijipt na.

¹⁰ Mosis vẹ Erọn de ru igbunu nana ejobi vwẹ obaro ri Fero, Ọrovwohwo de ru udu ri Fero gan, o rhe siobọ nẹ emọ rẹ Izrẹl kpo nẹ otọ na-a.