Ẹvwọphia 8 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

Usiaphrẹ Righwrẹ vẹ Udjokpo rẹ Oro na

¹ Ọke rẹ Omogodẹ na vwo novie usiaphrẹ righwrẹ, odjuvwu da fọ riẹi kerẹ emu rẹ aroẹbrẹ ọgban.

² Etiyin me da mrẹ emakashe ighwrẹ ri mudia vwẹ obaro rẹ Ọghẹnẹ, a da vwẹ ewanre ighwrẹ kẹ ayen.

³ Amakashe ọfa da rhe rhi mudia kẹrẹ agbada na ọ vẹ omoze rẹ oro vwẹ obọ; a da ghwẹ igboduma kẹ buebu rere ọ vwẹ ayen gua ẹrhovwo rẹ irherẹn na ejobi vwẹ enu rẹ agbada rẹ oro na rọ hẹ obaro rẹ ekete na;

⁴ Ivwirhi rẹ igboduma na re hẹ obọ rẹ amakashe na, kugbe ẹrhovwo rẹ irherẹn na de ghworo kpenu bru Ọghẹnẹ ra.

⁵ Amakashe na de mu omoze na ọ da wan erhanre rọ hẹ enu rẹ agbada na vọn, edo de mu, enu da nyavwaro, otọ de mu kpogho.

Ewanre na

⁶ Asakiephana emakashe ighwrẹ na ri vwo ewanre ighwrẹ na de ghwe muegbe rẹ ayen che vwo hworo.

⁷ Amakashe rẹsosuọ de hworo owanre, ibiosio rẹ erhanre, ọguọgua da rhe rhọ phihọ akpọ na; akarha rẹ akpọ na da torhẹ re, akarha rẹ irhe da torhẹ re, akarha rẹ odi da torhẹ re.

⁸ Amakashe rivẹ de rhi hworo owanre rọye, orọvwọ ọvo kerẹ ugbenu rẹ erhanre, rọ la jojojo de ghwie she phihọ abadi na;

⁹ akarha rẹ abadi na de rhi hirhe phihọ ọbara, akarha rẹ eranvwe ekpokpọ re hẹ evun rẹ abadi na de ghwu re, akarha rẹ ekọ da guọghọ re.

¹⁰ Amakashe rerha de hworo owanre rọye, isio rode ọvo de she nẹ odjuvwu rhe, o lo wrowro, o de she phihọ akarha rẹ irhie na kugbe igbugbu rẹ ame na.

¹¹ Odẹ rẹ isio na kẹ Akoro. Akarha rẹ ame na de hirhe vwọ hẹ akoro, ame de hwe ihwo buebu, fikiridie ọ yara.

¹² Amakashe rẹne de hworo oware rọye, a da ghwiẹ akarha rẹ ọnre, kugbe akarha rẹ emeranvwe, kugbe akarha rẹ isio, ọtiọye na akarha rẹ orẹmrẹ rayen de mu ebri; akarha rẹ ọnre gbi vwo orẹmrẹ-ẹ, ọtiọye ji te akarha rẹ emeranvwe.

¹³ Mi vwo ni, mi de nyo umri rẹ ugo ro kperẹ gangan, rọ vwọ rhan vwẹ obenu, Eghwo, eghwo, eghwo kẹ ovwan otu re dia enu rẹ akpọ na, vwẹ umri rẹ ewanre efa rẹ emakashe erha na che hworo.