Ẹvwọphia 7 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

Ihwo Uriori Ujughwrẹ gbe ẹne rẹ Izrẹl ra ke Oka phihọ

¹ Rẹ ọna vwọ wan nu me da mrẹ emakashe ẹne ri mudia phihọ igogo ẹne rẹ akpọ na, re yọnrọn ọgan rẹ odju ẹne rẹ akpọ na, rere odju vwo je djuo vwe enu rẹ akpọ na eyẹ abadi eyẹ urhe kurhe.

² Etiyin me da mrẹ amakashe ọfa ro yere kpenu nẹ obaro ọnre cha, vẹ usiaphrẹ rẹ Ọghẹnẹ ri bẹdẹ na vwẹ obọ, ọ da va se emakashe enẹ na ra vwẹ ogangan kẹ nẹ e guọghọ akpọ na kugbe abadi na,

³ tanẹ, Ovwan rha guọghọ akpọ na-a eyẹ irhe-e, bẹsiẹ ra vwọ ka oka phihọ arhare rẹ idibo rẹ Ọghẹnẹ rẹ avwanre nu.

⁴ Mi de nyo unu rẹ ihwo ra ka oka phihọ, uriori ujughwrẹ gbe ẹne ra ka oka phihọ, nẹ orua korua rẹ emọ rẹ Izrẹl rhe,

⁵ orua ri Juda a ka oka phihọ uriori ihwivẹ, orua ri Rubẹn a ka oka phihọ uriori ihwivẹ orua ri Gad a ka oka phihọ uriori ihwivẹ

⁶ orua rẹ Asha a ka oka phihọ uriori ihwivẹ orua ri Naftali a ka oka phihọ uriori ihwivẹ orua ri Manasse a ka oka phihọ uriori ihwivẹ

⁷ orua ri Simiọn a ka oka phihọ uriori ihwivẹ orua ri Livae a ka oka phihọ uriori ihwivẹ orua rẹ Isaka a ka oka phihọ uriori ihwivẹ

⁸ orua ri Zebulọn a ka oka phihọ uriori ihwivẹ orua ri Josẹf a ka oka phihọ uriori ihwivẹ orua ri Bẹnjamin a ka oka phihọ uriori ihwivẹ

Urogho rẹ Ihwo buebu ri nẹ Irere rẹ Akpọ ejobi rhe

⁹ Rẹ ọna vwọ wan nu mi vwo ni, me da mrẹ urogho rẹ ihwo buebu rẹ unu se keri-i, ri nẹ ẹgborho kẹgborho rhe, rẹ orua ejobi kugbe ihwo kugbe ephẹrẹ rhe, ri mudia vwẹ obaro rẹ ekete na kugbe obaro rẹ Omogodẹ na, re vwẹ emwa efuanfon rhuo, vẹ ewanvwe vwẹ abọ rayen,

¹⁰ ri kuvwie tanẹ, Esivwo kẹ Ọghẹnẹ rẹ avwanre ro tidia phihọ enu rẹ ekete na, ji kugbe Omogodẹ na!

¹¹ Yẹ emakashe na ejobi mudia riariẹ ekete na je riariẹ ekpako na kugbe eranvwe ekpokpọ ẹne na, ayen de she bọvwọn opharo rhuotọ vwẹ obaro rẹ ekete na ayen da gọ Ọghẹnẹ,

¹² tanẹ, Isẹ, Ebruba kugbe urinrin kugbe aghwanre kugbe ẹkpẹvwẹ kugbe ọghọ kugbe ogangan kugbe ọrho dia kẹ Ọghẹnẹ rẹ avwanre bẹdẹ bẹdẹ! Isẹ.

¹³ Etiyin ọvo vwẹ ekpako na da ta kẹ vwẹ, tanẹ, Ena amono, ri ku edagba efuanfon phihọ na, tivọ ayen nurhe?

¹⁴ Me da ta kẹ, ọrovwori, wẹ re riẹnrẹ. Ọ da ta kẹ vwẹ, Enana hẹ ihwo ri nẹ evun rẹ ukpokpogho rode na rhe; ayen fọnrhọn edagba rayen fon vwẹ ọbara rẹ Omogodẹ na.

¹⁵ Kọye ayen vwo mudia vwẹ obaro rẹ ekete rẹ Ọghẹnẹ na, ke ga te ason te uvo vwẹ evun rẹ uwevwi rẹ ẹga na; ọ ro tidia vwẹ enu rẹ ekete na kọ bẹrẹ ibekpe sa ayen.

¹⁶ Owẹvwe gbi hwe ayen ọfa-a, eyẹ urhuru rẹ ame gbi hwe ayen ọfa-a; uvo gbi mu ayen ọfa-a, eyẹ oheri gbi heri ayen ọfa-a.

¹⁷ Kidie Omogodẹ na rọ hẹ uherevie rẹ ekete na kọ dia osuigegede rayen, ko sun ayen kpo ogbugbu rẹ arhọ na; Ọghẹnẹ ko rhie ameoviẹ nẹ ayen ẹro.