Ẹvwọphia 6 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

Isiaphrẹ na

¹ Asakiephana re me vwọ mrẹ Omogodẹ na ro rhie ọvo vwẹ isiaphrẹ ighwrẹ na, mi de nyo ọvo vwẹ eranvwe ẹne ekpokpọ na ta, kerẹ urhuru rẹ agbrara nẹ, Yanrhe!

² Me da mrẹ, nighe, esi ọfuanfon, kugbe ohwo rọ gua de vwo umurhabọ; a da vwẹ erhu kẹ, ọ da yanran re phi o de phi kparobọ.

³ Ọke ro vwo novie usiaphrẹ rivẹ, mi de nyo eranvwe ọkpokpọ rivẹ na rọ tanẹ, Yanrhe!

⁴ Esi ọfa da rhe, ọ pha vwavwanre gbagbagba; a da ta kẹ ohwo rọ gua na nẹ ọ reyọ ufuoma nẹ akpọ na, rere ayen nyavwe ohwohwo hwe; a da vwẹ ọlọkọ rode vwọ kẹ.

⁵ Ọke ro vwo novie usiaphrẹ rerha, mi de nyo eranvwe ọkpokpọ rerha rọ tanẹ, Yanrhe! Me vwọ mrẹ, nighe, esi obiebi, kugbe ohwo rọ gua ro vwo ovwanvwọn vwẹ obọ;

⁶ mi de nyo obo re họhọ urhuru vwẹ uherevie rẹ eranvwe ekpokpọ ẹne na re tanẹ, Uchunu rẹ ọka ikọba, uchunu rẹ irosu erha ikọba, ẹkẹvuọvo evwri vẹ udi re herọ e miovwẹ aye-en.

⁷ Ọke ro vwo novie usiaphrẹ rẹne, mi de nyo urhuru rẹ eranvwe ọkpokpọ rẹne rọ tanẹ, Yanrhe!

⁸ Me vwọ mrẹ, nighe, esi rọ vwara munẹ munẹ, e de se odẹ rẹ ọ rọ gua na nẹ Ughwu, Ushi da vwọ kpahọ ukuko; a da vwẹ ogangan kẹ ayen vwẹ enu rẹ akane rẹ akpọ na, rọ vwẹ ọlọkọ hwe kugbe owẹvwe kugbe ọtiekọ ji kugbe eranvwe re djoma vwẹ akpọ na.

⁹ Ọke ro vwo novie usiaphrẹ riyori, me da mrẹ vwẹ obotọ rẹ agbada na erhi rẹ ayen otu re hweri fiki rẹ ota rẹ Ọghẹnẹ ji kugbe oseri rẹ ayen seri;

¹⁰ ayen da van kperi tanẹ, E Ọrovwohwo Osun, ọfuanfon kugbe uyota, mavọ o krite wo ki rhi guẹdjọ kugbe re wọ ke rhe reihri rẹ ọbara rẹ avwanre vwẹ obọ rẹ ihwo re dia enu rẹ akpọ na?

¹¹ A da vwẹ adagba ọfuanfon vwọ kẹ ayen ohwo ọvuọvo a da ta kẹ ayen nẹ i rovwoma emerha, bẹsiẹ rẹ unu rẹ idibo rayen ri chekọ kugbe imoni rayen ri chekọ vwọ gba, ihwo re hweri kirobo re ji hwe okpuyovwi rẹ ayen.

¹² Ọke re vwo novie usiaphrẹ resan, mi vwo ni, nighe, otọ rode de rhi kpogho; ọnre de rhi bi kerẹ ubi, emeranvwe rọ vẹgbẹ da họhọ ọbara,

¹³ isio rẹ obenu de she teye otọ kirobo rẹ urhe rẹ owe fa ẹbe vwẹ ohwahwa vwẹ ọke rẹ ogiribo djuẹ,

¹⁴ obenu na da ranvwiẹ kerẹ ọbe re kpirhi koko, kugbenu kugbenu kugbe kubrotọ kubrotọ de ghwie nẹ ẹdia rọye.

¹⁵ Eriyin ivie rẹ akpọ na kugbe ikpihwo kugbe inotu ride kugbe edafe kugbe ihwo re ga oma, kohwo kohwo, ọviẹn kugbe ọmuvwiẹ, de sioma nu vwẹ evun rẹ ẹmwa kugbe ohri rẹ eragha rẹ igbenu na,

¹⁶ ri bunu se igbenu na kugbe eragha na, Shenyẹ avwanre re wo si avwanre nu kẹ opharo rẹ ohwo ro tidia vwẹ enu rẹ ekete na, ji kugbe ophu rẹ Omogodẹ na;

¹⁷ kidie ẹdẹ rode rẹ ophu rayen na tere, kono ri se mudia hẹrhẹ?