Ẹvwọphia 19 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

¹ Rẹ ọnana vwọ wan nu mi de nyo edo rọ họhọ urhuru rode rẹ urogho rode vwẹ obo odjuvwu, ro kuvwie, Hi Iye! Esivwo kugbe urinrin kugbe ogangan e rẹ Ọghẹnẹ rẹ avwanre,

² Kidie orhiebro rọye uyota kugbe ọsoso; o brorhiẹ rẹ igberadja rode na rọ vwẹ ọfanrhiẹ rọye miovwi akpọ na, ọ da reihri rẹ ọbara rẹ idibo rọye vwẹ obọ rọye,

³ Ọ da rhoma kuvwie, Hi Iye! Ivwirhi ro bruno rhe de ghworo kpenu rhiri.

⁴ Ekpako uje gbẹ ẹne na kugbe eranvwe ekpokpọ ẹne na de she diguẹ ayen da gọ Ọghẹnẹ ro tidia vwẹ enu rẹ ekete na, tanẹ, Isẹ. Hi Iye.

Orẹ rẹ Orọvwe rẹ Omogegede na

⁵ Urhuru ọvo de nẹ obo ekete na rhe ro kperẹ nẹ, We jiri Ọghẹnẹ rẹ avwanre, ovwan idibo rọye ejobi, ovwan re djẹ oshọ rọye, te ihwo ride te itete.

⁶ Etiyin mi de nyo edo rọ họhọ urhuru rẹ urogho rode, rọ họhọ edo rẹ ame rọ je họhọ edo rẹ agbrara, rọ van, Hi Iye! Kidie Ọrovwohwo Ọghẹnẹ rẹ avwanre, Ọrovwoẹgba rẹ uvie

⁷ E jẹn avwanre ghọghọ re a kparọ kpenu ra vwẹ urinrin kẹ, kidie orọvwe rẹ Omogodẹ na tere, Ọpha rọye choma rọye nure;

⁸ a da rhọvwe kẹ nẹ ọ vwẹ esada iyoyovwi rhuo, ri lo yoyovwi esada iyoyovwi na eye ọvwata rẹ irherẹn na.

⁹ Amakashe na da ta kẹ vwẹ, Si ọnana; Ebruba kẹ ayen otu re se kpo orẹ rẹ orọvwe rẹ Omogodẹ na. Ọ da ta kẹ vwẹ, Enana eta rẹ uyota rẹ Ọghẹnẹ.

¹⁰ Etiyin mi de she diguẹ vwẹ asan awọ rọye me da gọ, ẹkẹvuọvo ọ da ta kẹ vwẹ, Wo ruẹ ọyena-a! Mẹvwẹ je hẹ odibo kugbe omoni kirobo wọ epha rọ yọnrọn iseri ri Jesu. Gọ Ọghẹnẹ. Kidie iseri ri Jesu vwenẹ ọye hẹ ohwo ro vwo erhi rẹ aroẹmrẹ.

Ohwo rọ gua Esi Ọfuanfon na

¹¹ Etiyin me da mrẹ odjuvwu ro rhie phihọ, mi vwo ni, me da mrẹ esi ọfuanfon! E de se ọ ro tidia vwẹ enu rọye na Ọresiri kugbe Uyota, vwẹ evun rẹ ọvwata ọye o de guẹdjọ ọye o de ji phiẹ ofovwi.

¹² Ẹro rọye vwara kerẹ erhanre, ọ da gba evwarha buebu mu uyovwi; e de si odẹ ọvo tamuo rẹ ohwo ọfa riẹnre-e jokpa rẹ ekpuyovwi rọye ọvo.

¹³ O de ku ewun re duvwu phihọ ọbara phihọ, odẹ re mu se kọye hẹ Ota rẹ Ọghẹnẹ na.

¹⁴ Otuofovwi rẹ odjuvwu, re vwẹ esada iyoyovwi rhuo, fuanfon yoyovwi, re gua esi efuanfon de tue nene.

¹⁵ Ọlọkọ rọ dan prẹprẹ de yoro nẹ unu rọye rhe kọye ọ vwọ nyavwe ẹgborho na hwe, kọ vwẹ ọkpọ rẹ utehru sun ayen; ko che chiyi okọ rẹ imiemi rẹ ophu rẹ Ọghẹnẹ Ọrovwoẹgba.

¹⁶ E de si odẹ tamu ewun rọye kugbe ekpoghowọ rọye, Ovie rẹ ivie kugbe Ọrovwohwo ro vwo ihwo.

¹⁷ Etiyin me da mrẹ amakashe ro mudia vwẹ evun rẹ ọnre, o de ghwoghwo kẹ emephran re hẹ obenu ejobi re rhan vwẹ irharheghe, Yanrhe, we rhi bi koko udoemu rẹ Ọghẹnẹ na,

¹⁸ re ovwan re ivwo rẹ ivie, ivwo rẹ inotu, ivwo rẹ egba ride, ivwo rẹ esi kugbe otu re gua, ivwo rẹ ihwo ejobi, te eviẹn te imuvwiẹ, te ihwo ride vẹ itete.

¹⁹ Me da mrẹ eranvwe na kugbe ivie rẹ akpọ na vẹ unuofovwi rayen ri bi koko rhe họnrọ ohwo ro tidia vwẹ enu rẹ esi na vẹ unuofovwi rọye.

²⁰ E de mu eranvwe na, kugbe emraro rẹ efian na ri ruẹ emu rẹ igbunu kẹ mrẹ na re vwọ phiẹn ihwo ra ka oka rẹ eranvwe na phihọ na kugbe ihwo re gọ oma rọye. E de mu ayen ivẹ na ọkpokpọ teye ẹtẹrhe rẹ erhanre rọ torhẹ vẹ ibiosio rẹ erhanre.

²¹ A da vwẹ ọlọkọ rẹ ohwo ro tidia enu rẹ esi na, ọlọkọ ro yoro nẹ unu rọye rhe na nyavwe ayen hwe; emephran na ejobi da rhe re evun vọn kuku.