Ẹvwọphia 18 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

Eshe rẹ Babilọn

¹ Rẹ Ọnana vwọ wan nu me da mrẹ amakashe ọfa ro wotọ nẹ odjuvwu cha, o vwo ọrho rode; erhuvwu rọye de rhi lo mu akpọ na ejobi.

² O de kperi gangan tanẹ, Osheri, osheri, Babilọn rode na sheri Ọ rhi hirhe phihọ orere rẹ idẹbono, urhuẹn rẹ erhi kerhi ọbrabra, urhuẹn rẹ ọphran kọphran ro tuoma;

³ kidie ẹgborho na ejobi da udi rẹ igberadja rọye, ivie rẹ akpọ na ejobi duro re, ineki rẹ akpọ na vwi fiki rẹ ọfanrhiẹ rọye fe.

⁴ Etiyin mi de nyo urhuru ọfa ro nẹ odjuvwu rhe tanẹ, Vrẹn no rhe, ihwo mẹ, wo de rhe vwo obọ vwẹ imwemwu rọye, wọ da rha ghare vwẹ ọtiekọ rọye;

⁵ kidie imwemwu rọye kpare kpenu re te odjuvwu, Ọghẹnẹ rhe karohọ orukuruku rọye.

⁶ Ru kẹ kirobo rẹ okpuyovwi rọye ru kẹ ihwo efa, hwa osa kpahe kẹ fiki robo ro ruru; uko rọ je vọn na jẹ ọtiọye ọhwọhwivẹ kẹ.

⁷ Kirobo ro heri te ro fanrhiẹ te, ọtiọye wọ je vwẹ odjadja vẹ omaemuohọ kẹ te. Rọ vwọ ta vwẹ udu rọye nẹ, Mi tidia kerẹ aye rẹ ovie, Me dia ayeuku-u, Me cha mrẹ omaemuohọ bẹdẹ-ẹ,

⁸ ọtiọye etiekọ rọye cha rhe ẹdẹvo, emiavwe kugbe omaemuohọ kugbe owẹvwe, ka vwẹ erhanre torhẹ; kidie Ọrovwohwo Ọghẹnẹ ro bruhwe na ọgba o ruẹ.

⁹ Ivie rẹ akpọ na, ri duro na re vẹ ọye gbe gbe ọfanrhie na, ke viẹ ki beroma re da mrẹ ivwirhi rẹ ẹtorhẹ rọye;

¹⁰ ayen ki mudia tephe, vẹ oshọ rẹ odjadja rọye, ke ta, Eghwo! eghwo i wẹ orere rode na, we ọgba rẹ orere na, Babilọn vwẹ unọke ọvuọvo na e vwo bruhwe we.

¹¹ Ineki rẹ akpọ na da viẹ muomahọ kẹ, kidie a mrẹ ohwo rọ dẹ oghwaeki rayen ọfa-a,

¹² oghwaeki rẹ oro, idọnọ efuanfon ivie kugbe irhu, esada iyoyovwi, orhurhu, esada kugbe ododo, irhe ri gbo ọnrhe ororo ejobi, ekuakua rẹ akoeni ejobi, ekuakua rẹ irhe eghaghare ejobi, ẹrovwo, itehru kugbe eragha ri lo wrowro,

¹³ owian, umako, ugboduma, adjija, egẹn, udi, evwri, omamọ rẹ ọka, erhuẹn vẹ igodẹ, esi kugbe ekpẹrẹ, kugbe eviẹn, kọye hẹ, uyohwo.

¹⁴ Emamọ rẹ ẹnwẹn wẹn guọnọre e mie we, obo re miẹmiẹ ejobi kugbe erhuvwu wẹn e va wẹ abọ, a gba mrẹ ayen ọfa-a!

¹⁵ Ineki rẹ oghwaeki nana, re wan oma rọye fe, ki che mudia tephe, vẹ oshọ rẹ odjadja rọ cha mrẹ, rọ viẹ ro muomahọ,

¹⁶ Eghwo, eghwo, wẹ orere rode na rọ vwẹ esada iyoyovwi rhuo, vẹ orhurhu kugbe isene, rọ vwẹ oro rhuẹrẹ, vẹ ivie kugbe irhu!

¹⁷ Unọke ọvuọvo na efe nana ghwọrọ kufia. Ihwo ri vwo ekpo ejobi re chueki vwẹ obo abadi na, de mudia tephe

¹⁸ ki bunu re vwọ mrẹ ivwirhi rọye rọ torhẹ, Didi orere re họhẹ orere rode na?

¹⁹ Ayen da ghwẹ ekpẹn ku iyovwi rayen, rẹ ayen vwọ viẹ muomahọ, kperẹ nẹ Eghwo, eghwo, wẹ orere rode na asan rẹ ihwo ri vwo ekọ vwẹ abadi da wan oma rọye fe! Vwẹ unọke ọvuọvo na a ghwọerọ kufia.

²⁰ Ghọghọ vwẹ enu rọye, E odjuvwu, E ihwo efuanfon kugbe iyinkọn kugbe emraro, kidie Ọghẹnẹ brorhiẹ hwe kẹ wẹ!

²¹ Etiyin amakashe rode na de mu oragha rode na, o de phio teye abadi na kerẹ ukerẹkpẹn rode, tanẹ, Ọtiọye e chi phi Babilọn orere rode na teye otọ vwẹ ozighi, a gbe cha mrẹ ọfa-a;

²² e gbi nyo edo rẹ isorogun kugbe eboine, e rẹ otu ri hworo urephe kugbe owanre, ọfa vwẹ evun wẹ-ẹ; kugbe ọwena rẹ ona kona a gbe mrẹ vwẹ evun wẹn ọfa-a; kugbe edo rẹ uwuye e gbi nyo vwẹ evun wẹ ọfa-a;

²³ kugbe erhanre rẹ urhukpẹ ọ gbe la vwẹ evun wẹn ọfa-a; kugbe urhuru rẹ ọpha yẹ ọshare rọye e gbi nyo vwẹ evun wẹn ọfa-a; kidie ineki wẹn hẹ ikpihwo ride rẹ akpọ na, ka phiẹn ẹgborho na ejobi fiki rẹ aroẹmrẹ wẹn.

²⁴ A da rhe mrẹ ọbara rẹ emraro na kugbe ihwo efuanfon na vwẹ evun wẹn kugbe ayen otu re hweri vwẹ akpọ na.