Ẹvwọphia 16 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

Idjokpo rẹ Ophu rẹ Ọghẹnẹ na

¹ Etiyin mi de nyo urhuru rode ọvo vwẹ uwevwi rẹ ẹga na rọ ta kẹ emakashe ighwrẹ na, Yanran re ku idjokpo ighwrẹ rẹ ophu rẹ Ọghẹnẹ na phihọ akpọ na.

² Amakashe rẹsosuọ na da yanran re ku udjokpo rọye phihọ akpọ na, era ebrabra ri gbo ọnre de rhi bru ihwo ri vwo oka rẹ eranvwe na oma kugbe aye re gọ oma rọye.

³ Amakashe rivẹ de ku udjokpo rọye phihọ evun rẹ abadi, ọ da rhe họhọ ọbara rẹ ohwo ro ghwuru, emu kemu ọkpokpọ rọ dia evun rẹ abadi na de ghwu re.

⁴ Amakashe rerha de ku udjokpo rọye phihọ irhie kugbe ogbugbu rẹ ame, i de hirhe phihọ ọbara.

⁵ Mi de nyo amakashe rẹ ame na rọ tanẹ, Ọsoso wọ epha vwẹ orhiẹ nana wo brẹ na, wẹ rọ herọ nonẹ kugbe rhabae, E Ọfuanfon Ọvuọvo na.

⁶ Kidie ihwo sun ọbara rẹ ihwo efuanfon kugbe emraro na te otọ, wọ da vwẹ ọbara kẹ ayen da. Ọye hẹ ute rayen!

⁷ Mi de nyo agbada na rọ viẹ E, Ọrovwohwo Ọghẹnẹ Ọrovwoẹgba uyota vẹ ọsoso ọye orhiebro wẹn epha

⁸ Amakashe rẹne de ku udjokpo rọye phihọ ọnre, a da rhọvwe kẹ nẹ ọ vwẹ erhanre torhẹ ihwo hwe;

⁹ ọrhorhorho rọye da ya ihwo mu, ayen ke harha Ọghẹnẹ rọ vwo vwo ogangan vwẹ enu rẹ ọtiekọ nana, yẹ ayen kurhẹriẹ re da vwẹ urinrin kẹ-ẹ.

¹⁰ Amakashe riyori de ku udjokpo rọye phihọ enu rẹ ekete rẹ eranvwe na, uvie rọye da hẹ evun rẹ ebri hwi; odjadja rọye kọ nẹrhẹ eranvwe rayen phariẹ

¹¹ ayen da harhe Ọghẹnẹ rẹ odjuvwu fiki rẹ odjadja rayen kugbe era rayen, yi ji kurhẹriẹ nẹ uruemu raye-en.

¹² Amakashe resan de ku udjokpo rọye phihọ urhie rode na Yufretis, ame rọye da kpọ yamu, rere ivie re hẹ obaro ọnre vwọ mrasan wan.

¹³ Me da mrẹ irhi ri jẹfuọn erha re họhọ igoro, ri nẹ unu rẹ Okpodje na cha, kugbe unu rẹ eranvwe ẹne na, kugbe unu rẹ emraro rẹ efian na;

¹⁴ kidie enana irhi rẹ idẹbono, ri ruẹ iruo rẹ eka, re hrabọ bru ivie rẹ akpọ na ejobi, ri se ayen koko ra hẹrhẹ ofovwi rẹ ẹdẹ rode rẹ Ọghẹnẹ Ọrovwoẹgba na.

¹⁵ (Nighe, me cha kerẹ oji. Ebruba kẹ ohwo rọ sa hẹrhẹ, rọ sẹro rẹ iwun rọye rere o vwo je ban phihọ a da rha mrẹ ẹbẹban!)

¹⁶ A da ghwẹ ayen koko asan ọvo ra vwi Hibru se nẹ Amagidọn.

¹⁷ Amakashe righwrẹ na de ku udjokpo rọye phihọ irharheghe, urhuru rode ọvo de nẹ evun rẹ uwevwi rẹ ẹga na rhe, nẹ obo ekete na rhe, tanẹ, O rereo!

¹⁸ Enu da nyavwaro, urhuru de kperi, agbrara da van, otọ de rhi mu kpogho gangan ra je mrẹ oghẹre rọye vwẹ akpọ na dẹvo-o, ọtiọye otọ na kpogho rho te.

¹⁹ Orere rode na da bẹre ẹbẹre erha, irere rẹ ẹgborho na de ghwie she, Ọghẹnẹ da rhe karohọ Babilọn orere rode na, a da vwẹ uko rẹ ophu rọye kẹ da.

²⁰ Ibretọ na ejobi de rhi ghwie she, a gbe mrẹ igbenu na ọvuọvo-o;

²¹ osio rẹ imicho rode ko di vwrẹ she ikikori teye enu rẹ ihwo, ọ họhọ te ovwanvwọn ujori, ihwo ke harha Ọghẹnẹ fiki rẹ ọtiekọ rẹ ibiosio na, ọtiekọ na mu oshọ gangan.