Ẹvwọphia 15 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

Emakashe vẹ Ọtiekọ rọ ka Oba na

¹ Me da mrẹ oka ọfa vwẹ obo odjivwu, oka rhuarho ro gbunu, emakashe ighwrẹ vẹ ọtiokọ ighwrẹ, ena re ka oba, kidie ena je hẹ oba rẹ ophu rẹ Ọghẹnẹ.

² Etiyin me da mrẹ obo re họhọ abadi rẹ ughegbe ra vwẹ erhanre gua kugbe, kugbe ihwo ri phi eranvwe na kparobọ na kugbe oma rọye kugbe unu rẹ odẹ rọye, ri mudia kẹrẹ abadi rẹ ughegbe na vẹ isorogun rẹ Ọghẹnẹ na vwẹ abọ rayen.

³ Ayen da so une ri Mosis, Odibo rẹ Ọghẹnẹ na, kugbe une rẹ Omogodẹ na, tanẹ, Iruo wẹn pha rhuarho igbunu, E Ọrovwohwo Ọghẹnẹ Ọrovwoẹgba! Ọsoso kugbe uyota hẹ idjerhe wẹn, E Ovie rẹ oge ejobi.

⁴ Kono oshọ je muo rọ da vwẹ urinrin kẹ odẹ wẹn, E Ọrovwohwo? Kidie wẹ ọvo re fonro. Ẹgborho na ejobi cha rhe re gọ wẹ, kidie a rhe vwẹ ẹdjọeguo wẹn phiare.

⁵ Rẹ Ọnana vwọ wan nu mi de ni, utughẹ rẹ uwevwi rẹ ẹga rẹ iseri rọ hẹ obo odjuvwu de rhie phihọ,

⁶ emakashe ighwrẹ ri vwo ọtiekọ ighwrẹ de nẹ evun rẹ uwevwi rẹ ẹga na rhe, re vwẹ omamọ rẹ esada ri lo wrowro vwo rhuo, ayen da vwẹ umuehu rẹ oro mu udu rayen.

⁷ Ọvo vwẹ usun rẹ eranvwe ekpokpọ ẹne na da vwẹ idjokpo ighwrẹ re vọnre vẹ ophu rẹ Ọghẹnẹ rọ herọ bẹdẹ bẹdẹ na vwọ kẹ emakashe ighwrẹ na;

⁸ uwevwi rẹ ẹga na da vọn vẹ ivwirhi ro nẹ urinrin rẹ Ọghẹnẹ na rhe kugbe ogangan rọye, ohwo ọvuọvo rha sa ro uwevwi rẹ ẹga na-a bẹsiẹ rẹ ọtiekọ ighwrẹ rẹ emakashe ighwrẹ na vwo vwo oba.