Ẹvwọphia 14 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

Une rẹ Ihwo Uriori Ujughwrẹ gbẹ ẹne na

¹ Etiyin mi de ni, nighe, Omogodẹ na de mudia vwẹ Ugbenu ri Zayọn, ihwo uriori ujughwrẹ gbẹ ẹne re si odẹ rọye kugbe odẹ rẹ Ọsẹ rọye phihọ arhare rayen.

² Mi de nyo urhuru ọvo ro nẹ obo odjuvwu rhe kerẹ edo rẹ ame kugbe agbrara rọ van; urhuru ri mi nyori da họhọ ohwo ro hworo isorogun ri hworo isorogun rayen,

³ ayen da so une ọkpokpọ vwẹ obaro rẹ ekete na kugbe obaro rẹ eranvwe ekpokpọ ẹne na kugbe obaro rẹ ekpako na. Ohwo ọvuọvo riẹn une na-a jokpa rẹ uriori ujori kugbe ujughwrẹ gbẹ ẹne na ra tanhirhe nẹ evun rẹ akpọ na.

⁴ Enana hẹ ihwo re vwẹ eya gbe oma rẹ ayen ẹgua-a, kidie ayen sẹro rẹ oma rayen; enana hẹ ihwo ri nene Omogodẹ na kpo asan kasan rọ rare; a tan enana nẹ uherevie rẹ ihwo rẹ akpọ na rhe kerẹ emamọ rẹsosuọ vwọ kẹ Ọghẹnẹ kugbe Omogodẹ na,

⁵ A mrẹ ofian vwẹ unu raye-en, kidie ayen vwo upe-e.

Ovuẹ rẹ Emakashe Erha na

⁶ Etiyin me da mrẹ amakashe ọfa rọ rhan vwẹ uherevie rẹ odjuvwu, ọ vẹ iyẹnrẹ esiri ri bẹdẹ na ro ghwoghwo kẹ ayen otu re dia akpọ na, kẹgborho kẹgborho kugbe orua korua kugbe ephẹrẹ kephẹrẹ kugbe ohwo kohwo;

⁷ ọ da van gangan ta, Djẹ oshọ rẹ Ọghẹnẹ re a vwẹ urinrin kẹ kidie ọke rẹ ẹdjọeguo rọye tere; gọ ohwo rọ ma odjuvwu vẹ akpọ, abadi na kugbe igbugbu rẹ ame na.

⁸ Amakashe ọfa, ọrivẹ, de nene, rọ tanẹ, Osheri, osheri, Babilọn rẹ orere rode na sheri, wẹ rọ vwẹ igberadja wẹn mu ẹgborho ejobi na.

⁹ Amakashe ọfa, ọrerha, de nene, ro van tanẹ, Ohwo rọ gọ eranvwe na kugbe oma rọye, ra da ka oka rọye phihọ arhare rọye eyẹ obọ rọye,

¹⁰ kọ je da udi rẹ ophu rẹ Ọghẹnẹ, ra guare-e re ku phihọ uko rẹ ivuemiovwo rọye, kọ mrẹ odjadja rẹ erhanre kugbe ibiosio rẹ erhanre vwẹ irharo rẹ emakashe efuanfon na kugbe irharo rẹ Omogodẹ na.

¹¹ Ivwirhi rẹ odjadja rayen na de ghworo kpenu rhiri bẹdẹ; ayen rhe vwo omaerovwo-o, ason eyẹ uvo-o, vwọ kẹ otu nana re gọ eranvwe na kugbe oma rọye, kugbe ohwo kohwo ro vwo oka rẹ odẹ rọye.

¹² Kẹ etinẹ a da mrẹ odiri rẹ ihwo efuanfon na vugbe, ayen otu re yọnre irhi rẹ Ọghẹnẹ kugbe esegbuyota ri Jesu.

¹³ Mi de nyo urhuru ọvo ro nẹ odjuvwu rhe tanẹ, Si Ọnana; Ebruba kẹ irivwi ri ghwuru vwẹ evun rẹ Ọrovwohwo kẹ etinẹ yanran. Ebruba rẹ uyota, eriyin Erhi na tare, rere ayen se rovwoma nẹ owian rayen, kidie uruemu rayen nene ayen.

Orhọ rẹ Akpọ na

¹⁴ Etiyin mi de ni, nighe, enu ra fuan vwẹ obenu na me da mrẹ ohwo ro tidia kerẹ ọmọ rẹ ohwo, o vwẹ erhu rẹ oro tughẹ uyovwi, ọ vẹ ubiakpa rọ dan prẹprẹ vwẹ obọ rọye.

¹⁵ Amakashe ọfa de nẹ evun rẹ uwevwi rẹ ẹga na rhe, ọ da van se ohwo ro tidia vwẹ enu rẹ egho na, Yoro ubiakpa wẹn rhe, re wo vu, kidie ọke rẹ ivuevu na tere, kidie orhọ rẹ akpọ na nabọ ghwore.

¹⁶ Ohwo ro tidia vwẹ enu rẹ egho na de yoro ubiakpa rọye rhe enu rẹ akpọ na, o de vu akpọ na.

¹⁷ Amakashe ọfa de nẹ evun rẹ uwevwi rẹ ẹga rọ hẹ obo odjuvwu na rhe, o ji ghwe vwo ubiakpa ọdandan.

¹⁸ Etiyin amakashe ọfa de nẹ enu rẹ agbada na rhe, amakashe ro vwo ogangan vwẹ enu rẹ erhanre, ọ da van se ohwo ro vwo ubiakpa ọdandan na, Reyọ ubiakpa wẹn rhe, re wo bru erheghe ri vain rẹ akpọ na, kidie grep rọye ghwore.

¹⁹ Amakashe na de yoro ubiakpa rọye rhe enu rẹ akpọ na o de bru vain rẹ akpọ na, o de phi ayen phihọ okọ rode rẹ imiemi rẹ ophu rẹ Ọghẹnẹ;

²⁰ E de re chiyi vain na vwẹ okọ rẹ imiemi vwẹ ughere rẹ orere na, ọbara da mwavwe nẹ evun rẹ okọ rẹ imiemi na rhe, ọbara na tobọ re erhuẹn phihọ dede, ọ da djẹ ọkẹre ichiyi uriori kugbe ujori esan.