Ẹvwọphia 13 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

Eranvwe Ivẹ na

¹ Me da mrẹ eranvwe ọvo ro yoro nẹ evun rẹ abadi na cha, ọ vẹ ighoro ihwe kugbe iyovwi ighwrẹ, vẹ ibiekpẹn ihwe ri lo wrowro vwẹ enu rẹ ighoro rọye kugbe odẹ rẹ ophọphọvwe ra vwọ tamu iyovwi na.

² Eranvwe re me mrẹre na da họhọ ubido, awọ rọye da họhọ awọ rẹ okorhi, unu rọye da họhọ unu rẹ okpohrokpo.

³ Uyovwi rọye ọvo de vwo okpora rode, ẹkẹvuọvo e sivwi ora na kpore, eranvwe na de gbe akpọ ejobi unu.

⁴ Ihwo da gọ okpodje na, kidie ọ vwẹ ogangan rọye kẹ eranvwe na, ayen da gọ eranvwe na, tanẹ, Ono re họhọ eranvwe na, kono re sa họnrọ?

⁵ A da vwẹ unu kẹ rere ọ vwọ ta eta ebrabra kugbe eta rẹ ophọphọvwe, a da rhọvwe kẹ nẹ o vwo ogangan nana emeranvwe ujuvẹ gbẹ ivẹ;

⁶ o de rhie unu rọye vwọ ta eta rẹ ophọphọvwe kpahe Ọghẹnẹ, ọ phọphọ odẹ rọye kugbe ẹdia rọye, kọye hẹ, otu re dia obo odjuvwu.

⁷ A je rhọvwe kẹ nẹ ọ họnre ihwo efuanfon na re o phi ayen kua. A kẹrẹ ogangan vwẹ enu rẹ orua korua kugbe ihwo kugbe ephẹrẹ kugbe ẹgborho,

⁸ ayen ejobi ri sheri vwẹ akpọ na ke cha gọ, kohwo kohwo re ji si odẹ rọye phihọ ọbe rẹ arhọ rẹ Omogodẹ re hweri na nẹ ẹtuọhọ rẹ akpọ na rhe-e.

⁹ Ọ da dianẹ ohwo vwo erhọn, e jo nyo.

¹⁰ Ọ da dianẹ e mu ohwo oghuvwu, ighuvwu na kọye ọ ra; ọ da dianẹ ohwo vwẹ ọlọkọ hwe ohwo, ọlọkọ na e ji vwo hwe. Kẹ etinẹ a da mrẹ odiri kugbe esegbuyota rẹ ihwo efuanfon na vugbe.

¹¹ Etiyin me da mrẹ eranvwe ọfa ro yoro nẹ otọ na rhe; o de vwo ighoro ivẹ kerẹ omogodẹ kọ ta ota kerẹ okpodje.

¹² O de vwo ogangan kerẹ ogangan ejobi rẹ eranvwe rẹsosuọ na vwẹ irharo rọye, ọ de ru akpọ na kugbe ihwo re dia rere ayen vwọ gọ eranvwe rẹsosuọ na, re sivwi okpora rọye kpo na.

¹³ O ru eka ride, ọ tobọ se erhanre nẹ odjuvwu rhe akpọ na vwẹ irharo rẹ ihwo ejobi;

¹⁴ vwẹ eka ra rhọvwe kẹ nẹ ọ ru vwẹ irharo rẹ eranvwe na, ọ da vwọ phiẹn ayen otu re dia akpọ na, ọ da ta kẹ ayen nẹ a kare oma rẹ eranvwe na ra vwẹ ọlọkọ nyavwe na yọ rhọvwe ghwu-u,

¹⁵ a da rhọvwe kẹ nẹ ọ vwọ ẹnwẹn kẹ oma rẹ eranvwe na rere oma rẹ eranvwe na vwọ ta ota, rere ayen otu re senre nẹ ayen sa gọ oma na-a e hwe ayen ghwu.

¹⁶ Ọ da nẹrhẹ ihwo ejobi, te itete te iride, te edafe te ivwiogbere, te ọmuvwiẹ te ọviẹn, nẹ a ka oka phihọ obọrhe na eyẹ arhare na,

¹⁷ ọtiọye na ohwo ọvuọvo gbe sa dẹ eyẹ shẹ-ẹ jokpa nẹ o vwo oka na, kọye hẹ, odẹ rẹ eranvwe na eyẹ unu rẹ odẹ rọye.

¹⁸ Kẹ ọna e vwo vughe aghwanre na; e jẹn ohwo ro vwo ẹruọ kere unu rẹ eranvwe na, kidie ọye hẹ unu rẹ ohwo rẹ akpọ, unu rọye hẹ ujori esa kugbe ujorha gbẹ esan.