Ẹvwọphia 12 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

Aye na vẹ okpodje na

¹ Oka rode ọvo da phia vwẹ obo odjuvwu, aye ọvo da vwẹ ọnre rhuo, o de mu awọ kpahe emeranvwe, ọ da vwẹ erhu vẹ isio ihwivẹ vwo tughẹ;

² ọ vẹ evun, rọ vwọ chuẹ uvwiẹ re ko bo unu, evun rẹ odjadja o de vwiẹ.

³ Oka ọfa da rha phia vwẹ odjuvwu; nighe, Okpodje ọvwara wei, ọ vẹ iyovwi ighwrẹ kugbe ighoro ihwe, kugbe ibiekpẹn ri lo wrowro ighwrẹ re hẹ uyovwi rọye.

⁴ Urhurhuvwu rọye ro siẹ nene vwẹ obuko na da jẹ phihọ isio buebu, o de si ayen she teye otọ. Okpodje na de mudia bẹre agada sa aye na rọ chuẹ uvwiẹ na, rere siẹ ro de vwiẹ nu ọ vwọ mrasan mu ọmọ na re;

⁵ o de vwiẹ ọmọshare ọ rọ cha vwẹ ọkpọ rẹ utehru sun ẹgborho ejobi, ẹkẹvuọvo e de fru ọmọ na rhe Ọghẹnẹ vwẹ obo ekete rọye,

⁶ aye na da djẹ ro aghwa, kpo asan rẹ Ọghẹnẹ rhuẹrẹ vwọ hẹ otọ kẹ, kẹ etiyin a da ghẹrẹ vwẹ ẹdẹ uriori kugbe uri kugbe ujorha.

⁷ Asakiephana ofovwi de rhi she vwẹ obo odjuvwu, Maikẹl vẹ emakashe rọye ki nene Okpodje na họnra; Okpodje na vẹ emakashe rọye je ghwa họnra,

⁸ ẹkẹvuọvo e di phi ayen kua, a gbe mrẹ asan vwẹ obo odjuvwu rọ gba aye-en.

⁹ A da djẹ Okpodje rode na rhe otọ, ọrọdekọ rẹ awanre na, re se Idẹbono kugbe Ukọn na, ọphiẹn rẹ akpọ na ejobi–a da djẹ vẹ emakashe rọye ejobi wotọ.

¹⁰ Mi de nyo urhuru rode vwẹ obo odjuvwu, tanẹ, Asakiephana esivwo na kugbe egangan na kugbe uvie rẹ Ọghẹnẹ rẹ avwanre na kugbe ogangan ri Kristi rọye na rhire, kidie a djẹ ukọn rẹ imoni rẹ avwanre na wotọ re, ọ ro mu ayen vwo guẹdjọ kẹ Ọghẹnẹ te ason te uvo na.

¹¹ Ayen da vwẹ ọbara rẹ Omogodẹ na phio kparobọ kugbe ota rẹ iseri rayen, ayen se ẹnwẹn rayen gbe emuọvo-o ayen je davwerhọn rẹ ughwu-u.

¹² Ghọghọ, E odjuvwu kugbe ovwan re dia evun rọye! Ẹkẹvuọvo eka kẹ ovwan, E akpọ kugbe abadi, kidie idẹbono wotọ bru ovwan rhire vwẹ evun rẹ ophu rode, fikiridie ọ riẹnre nẹ ọke rọye pha krẹkrẹ.

¹³ Ọke rẹ okpodje vwọ mrẹ nẹ a djẹ ọye rhe akpọ nure, kọ vwọ tua aye ro vwiẹ ọmọshare na.

¹⁴ Ẹkẹvuọvo a da vwẹ ibekpe ivẹ rẹ ugo rhuarho vwọ kẹ rere ọ vwọ rhan jẹ ọrọdekọ na vwo ro evun rẹ aghwa, vwo kpo asan ra da ghẹrẹ vwẹ ọmọke, kugbe ọke, kugbe ubro rẹ ọke.

¹⁵ Ọrọdekọ na de won ame buebu nẹ unu rọye rhe ku aye na, rere ọkẹre rọye vwo mu aye na yanran.

¹⁶ Ẹkẹvuọvo akpọ na da cha aye na uko, otọ na de rhie o de se ame na rẹ ukpodje wo rhe na kpọ.

¹⁷ Ophu de rhi mu Okpodje kpahe ayen na gangan o de re nene emọ rọye ri chekọ phi ofovwi, e re yọnrọn irhi rẹ Ọghẹnẹ na kugbe iseri ri Jesu. O de mudia vwẹ enu rẹ ehavwo rẹ abadi na.