Ẹvwọphia 11 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

Iseri Ivẹ na

¹ Etiyin a da vwẹ ubiurhe rẹ ovwavwọn rọ họhọ ọkpọ vwọ kẹ vwẹ, a da ta kẹ vwẹ. Vrẹn re wọ vwavwe uwevwi rẹ ẹga rẹ Ọghẹnẹ na kugbe ayen otu re gọ vwẹ etiyin na,

² ẹkẹvuọvo wọ vwavwe ọguan rọ hẹ obo otafe rẹ uwevwi rẹ ẹga na-a, yan jovwo, kidie e siobọ no kẹ ẹgborho na, ayen ki chiyi orere ọfuanfon na muotọ emeranvwe ujuvẹ gbẹ ivẹ.

³ Ke me vwẹ ogangan kẹ iseri mẹ ivẹ rere e mraro ẹdẹ uriori kugbe uri gbẹ ujorha, ye vwẹ emwa rẹ uvweri rhuo.

⁴ Enana hẹ urhe rẹ ọliv ivẹ kugbe igburhukpẹ ivẹ ri mudia vwẹ obaro rẹ Ọrovwohwo ro vwo akpọ na.

⁵ Ọ da dianẹ ohwo guọnọ ayen woma, erhanre ko ghworo nẹ unu rayen rhe rhe torhẹ ivwighrẹ rayen; ohwo da wan ayen oma, ya vwẹ ayen ze kẹ ughwu, ki ghwu.

⁶ Ayen vwo ogangan ra vwọ kanre obenu na gbe, rere osio vwo jẹ rhọ vwẹ ẹdẹ rẹ aroẹmrẹ rayen, ayen ji vwo ogangan ra vwọ rhẹriẹ ame phihọ ọbara, rẹ ayen vwọ vwẹ ọtiekọ kọtiekọ hwe akpọ na, phẹrephẹre kirobo rẹ ayen guọnọre.

⁷ Ọke rẹ ayen de se iseri rayen nu, eranvwe na ro che yeri nẹ orho rẹ igbẹphẹre na rhe ko nene ayen phi ofovwi ko phi ayen kua ko hwe ayen ghwu,

⁸ irivwi rayen ke cha riẹn nene urhuvwu rẹ orere rode na ra vwẹ itẹ se nẹ Sodọm kugbe Ijipt, asan ra da kanre Ọrovwohwo mu agbagba.

⁹ Vwẹ ẹdẹ erha gbẹ ubro otu ri nẹ ihwo rhe kugbe orua kugbe ephẹrẹ kugbe ẹgborho ke tẹrovi irivwi rayen ayen ke sen nẹ e gbi shi aye-en,

¹⁰ otu re dia akpọ na ke ghọghọ oma kọ vwerhe ayen kẹ ayen ru ẹse, fikiridie emraro nana ivẹ na eye ri kpokpo ayen otu re dia akpọ na.

¹¹ Ẹkẹvuọvo rẹ ẹdẹ erha gbe ubro na vwọ wan nu ẹnwẹn rẹ arhọ de nẹ obọ rẹ Ọghẹnẹ rhe ro ayen oma, ayen de vrẹn mudia, oshọ rode de rhi mu ayen otu re mrẹ ayen.

¹² Etiyin ayen de nyo urhuru ọvo rọ van nẹ odjuvwu rhe ta kẹ ayen nẹ, Yanrhe obenu obonẹ! Vwẹ irharo rẹ ivwighrẹ rẹ ayen na ayen da wan egho kpo odjuvwu.

¹³ Vwẹ ọke yena otọ de mu kpogho gangan, ẹkẹne rẹ orere na de ghwie she; ihwo uriori ighwrẹ de ghwu vwẹ otọ ro kpoghori na, uguegue da ro i ri chekọ oma ayen da vwẹ urinrin kẹ Ọghẹnẹ rẹ Odjuvwu.

¹⁴ Ukpokpogho rivẹ wanre; nighe, ukpokpogho rerha te otọ nure.

Owanre Righwrẹ

¹⁵ Amakashe ri ghwrẹ de hworo owanre rọye, edo rode de mu vwẹ odjuvwu, tanẹ, Uvie rẹ akpọ na rhi hirhe phihọ uvie rẹ Ọrovwavwanre kugbe Kristi rọye re, kọ cha re rhiri bẹdẹ bẹdẹ.

¹⁶ Ekpako uje gbẹ ẹne na ri tidia vwẹ ekete rayen vwẹ obaro rẹ Ọghẹnẹ na de she bọvwọn epharo rhuotọ ayen da gọ Ọghẹnẹ,

¹⁷ tanẹ, Avwanre vwẹ ẹkpẹvwẹ kẹ wẹ, Ọrovwohwo Ọghẹnẹ ọrovwoẹgba, rọ herọ rọ je herọ jovwo, wọ reyọ ogangan wẹ rode na re kẹ owẹ ri suẹn.

¹⁸ Ẹgborho na re do, ẹkẹvuọvo ophu wẹn da tua, ọke re vwo guẹdjọ rẹ irivwi te re, ra vwọ hwa osa kẹ idibo wẹn, emraro na kugbe ihwo efuanfon na, kugbe ayen otu re djẹ oshọ rẹ odẹ wẹn, te itete te iride, ra vwọ ghwọrọ oghwọrọ rẹ akpọ na.

¹⁹ Etiyin e de rhie ẹchẹ rẹ uwevwi rẹ Ọghẹnẹ vwẹ obo odjuvwu, a da mrẹ ekpeti rẹ ọphọ rọye vwẹ evun rẹ uwevwi rẹ ẹga na; enu da nyavwaro, edo rode, edo rẹ agbrara, otọ ro kpogho, imicho ride.