Ẹvwọphia 10 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

Amakashe vẹ Ọbe Otete na

¹ Etiyin me da mrẹ amakashe ọfa vẹ ẹgba ro wotọ nẹ odjuvwu cha, rọ vwẹ egho phopho, aphoro de mu vwẹ uyovwi rọye, opharo rọye da họhọ ọnre, awọ rọye da họhọ osunsun rẹ erhanre.

² O de vwo ọbe otete ọvo vwẹ obọ re rhieri. O de mu owọrhe rọye kpahe abadi, o de rhe mu owọhwẹre rọye phihọ otọ,

³ ọ da van, urhuru rọye da họhọ okpohrokpo ro do; ọke ro vwo se, agbrara ighwrẹ na da van.

⁴ Ọke re agbrara ighwrẹ na vwọ van, ki mi muegbe ri mi vwo si, ẹkẹvuọvo mi de nyo urhuru ọvo ro nẹ odjuvwu rhe tanẹ, Ka oka phihọ obo rẹ agbrara ighwrẹ na tare, wo sio phihọ otọ.

⁵ Amakashe re me mrẹre ro mudia vwẹ enu rẹ ame vẹ otọ na da kpare obọrhe rọye kpenu

⁶ ọ da vwẹ ohwo rọ herọ bẹdẹ bẹdẹ na vwo duvwu iyori, ohwo rọ ma odjuvwu vẹ obo re herọ, akpọ na kugbe obo re herọ, kugbe abadi vẹ obo re herọ, nẹ o rhe vwo ẹdẹ ebro ọfa-a,

⁷ ẹkẹvuọvo vwẹ ẹdẹ rẹ amakashe righwrẹ na de che hworo oware, igbunu rẹ Ọghẹnẹ, kirobo ro ghwoghwo kẹ idibo rọye emraro na, ke che ruo gba.

⁸ Etiyin urhuru ri mi ke nyo nẹ obo odjuvwu rhe na da rhoma ta kẹ vwẹ, tanẹ, Yanran ra reyọ ọbe na re rhieri vwẹ obọ rẹ amakashe ro mudia vwẹ enu rẹ abadi kugbe otọ na.

⁹ Kọye me da yanran bru amakashe ra vuẹ nẹ ọ kẹ vwẹ ọmọbe na; ọ da ta kẹ vwẹ, Reyọ rere wọ riọ; ọ cha yare vwẹ egede wẹn, ẹkẹvuọvo kọ cha miẹmiẹ kerẹ ọnyọn vwẹ unu wẹn.

¹⁰ Kọye me da reyọ ọmọbe na mie amakashe na me da riọ; o da ghene miẹmiẹ kerẹ ọnyọn vwẹ unu mẹ, ẹkẹvuọvo ọke re me vwọ riọ nu egede mẹ kọ yara.

¹¹ A da vuẹ vwẹ, Wọ cha rhoma mraro kpahe ihwo buebu kugbe ẹgborho kugbe ephẹrẹ kugbe ivie.