Ẹsta 5 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

Ẹsta se Ovie na kugbe Haman kpo Emuẹriọ

¹ Vwẹ ẹdẹ rerha Ẹsta de ku iwun rẹ uvie rọye phihọ, o de mudia ọguan rọ hẹ obo ẹtan rẹ uwevwi rẹ ovie na, ro hirhe aro ku uvun rẹ ovie na. Yẹ ovie na tidia ekete rẹ uvie rọye vwẹ evun rẹ uwevwi na ro hirhe aro ku anurhoro rẹ uwevwi na.

² Ọke rẹ ovie na vwọ mrẹ Ẹsta rẹ aye rẹ ovie ro mudia vwẹ ọguan na, ọ da mrẹ ẹroesiri rọye ọ da riẹn ọkpọ rẹ oro na rọ hẹ obọ rọye na kẹ Ẹsta. Ẹsta de bi kẹrẹ ọ da vwẹ obọ te enu rẹ ọkpọ na

³ Ovie na da ta kẹ, Didi emu, Ẹsta aye rẹ ovie? Die wọ nọre? A vwọ kẹ wẹ, re te ubro rẹ uvie mẹ na.

⁴ Etiyin Ẹsta da ta, o de je ovie, jẹn ovie vi Haman rhe emuẹriọ ri mi chere phihọ otọ kẹ ovie na.

⁵ Etiyin ovie na da ta, se Haman rhe phẹrẹkpẹ re mi ru obo rẹ Ẹsta guọnọre na. Etiyin ovie na vi Heman da rhe emuẹriọ rẹ Ẹsta cheri na.

⁶ Rẹ ayen vwọ da udi, ovie na da ta kẹ Ẹsta, Die wọ nọre? A vwọ kẹ wẹ. Die wọ guọnọre? Re te ubro rẹ uvie mẹ na e ruo gba.

⁷ Ẹkẹvuọvo Esta da ta, Obo re me nọre vẹ obo me guọnọre ọna.

⁸ Me da mrẹ ẹroesiri rẹ ovie na, o de je ovie nẹ ọye ru obo re me nọre ọ mi rhe ru eguọnọ mẹ gba jẹ ovie vi Heman rhe odẹ, rhe re emu ri me chere kẹ ayen, odẹ, ki mi ru obo rẹ ovie tare na.

Ufiurheghe ra rhuẹrẹ phihọ otọ hẹrhẹ Modekai

⁹ Etiyin Haman da yan phia vwẹ ẹdẹ yena vẹ omavwerhovwẹ vẹ udu rẹ aghọghọ. Ẹkẹvuọvo rọ vwọ mrẹ Modekai vwẹ anurhoro rẹ ovie, nẹ ovrẹnri-i yẹrẹ o muọghọ kẹ-ẹ, ivun de miovwo vwọ kpahe Modekai.

¹⁰ Ẹkẹvuọvo Heman da nyẹ oma rọye, o de kpo, o de ji ihwo re se Igbeyan rọye vẹ aye rọye re se Zẹrẹsh.

¹¹ Etiyin Heman de kere urinrin rẹ efe kẹ ayen, uche emeshare ro vwiẹri ọtiẹ asan rẹ ovie muro kpenu te vẹ ọghọ re mu kẹ, obo ro muro kpenu te vwẹ usun rẹ isun vẹ idibo rẹ ovie ejobi.

¹² Etiyin Heman da rha vwọ ba, Ẹsta rẹ aye rẹ ovie, dede rhọnvwere nẹ ohwo ọvuọvo nene ovie cha emueriọ rọye na-a, jokpa rẹ mẹvwẹ ọvo. Odẹ rọ cha na ọ ji se vwe vẹ ovie.

¹³ Jẹ enana ejobi na fiẹ emu ọvuọvo kẹ vwẹ-ẹ, re me vwọ mrẹ Modekai ohwo ri Ju ro tidia anurhoro rẹ ovie na.

¹⁴ Etiyin aye rọye Zẹrẹsh vẹ igbeyan rọye ejobi da ta kẹ, E ja kpahẹ etan ro kpenu te cubit ujuvẹ gbẹ ihwe, vwẹ irhiọke gba ta kẹ ovie nẹ o churu Modekai si enu rọye, rere wọ vẹ ovie ki kpo emuẹriọ na vẹ omavwerhovwẹ. Uchebro nana de je Heman, o de ru ẹtan na.