Ẹfesọs 3 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

Odibo egbe ri Pọl vwọ kẹ Ihwo ri Keferi na

¹ Fiki rẹ ọnana, ọye mẹvwẹ ri Pọl vwọ hẹ uwọdi fiki rẹ Kristi Jesu vwẹ odẹ rẹ ovwan Keferi.

² Mi rori nẹ ovwan nyo usi rẹ ẹserọphẹ rẹ Ọghẹnẹ ra vwọ kẹ vwẹ ni mi vwo gbe odibo kẹ ovwan,

³ obo ra vwe rọ phia kẹ vwẹ rere me vwọ riẹn igbunu na, kirobo ri mi siro krẹn na.

⁴ Ọke rẹ ovwan de se ọnana re, ovwan ke riẹn obo rẹ iroro mẹ kodo te vwẹ igbunu ri Kristi.

⁵ Emu ra vwọ kẹ emọ rẹ ihwo riẹn vwẹ uvwiẹ ọfa-a kirobo rẹ erhi na vwe rọ phia vwẹ asakiephana kẹ iyinkọn efuanfon rọye kugbe emraro na.

⁶ Kọye hẹ, obo ri Keferi na koko reuku na kugbe, rẹ ayen da dia ekuakua rẹ ugboma ọvuọvo na, kugbe ayen otu ri ji vwo obọ vwẹ ive na vwẹ evun ri Kristi Jesu vwẹ oma rẹ iyẹnrẹ esiri na.

⁷ Fiki rẹ iyẹnrẹ esiri na ka vwẹ ovwẹ ma ogbodibo kirobo rẹ okẹ rẹ ẹserọphẹ rẹ Ọghẹnẹ ra vwọ kẹ vwẹ epha vwẹ oma rẹ iruo rẹ ogangan rọye.

⁸ Mẹvwẹ, dede nẹ mẹvwẹ re ma hanvwe vwẹ usun rẹ ihwo efuanfon na ejobi, ọye a vwẹ ẹserọphẹ kẹ, vwo ghwoghwo kẹ ihwo ri Keferi efe ri Kristi rẹ otọ rọye bẹn ẹguọnọ.

⁹ Rere ihwo ejobi vwọ mrẹ obo rẹ iroro rẹ igbunu re sinu rhabae epha vwẹ evun rẹ Ọghẹnẹ rọ ma emu ejobi.

¹⁰ Nẹ vwẹ oma rẹ ishọshi na a sa vwọ riẹn aghwanre rẹ Ọghẹnẹ rọ pha buebu na vwẹ asakiephana vwẹ otu rẹ ikpihwo ride kugbe ogangan rọ hẹ asan ro kpenu.

¹¹ Iroro okokodo ọtiọnana ọye Ọghẹnẹ jẹre rhabae kpahe Jesu Kristi Ọrovwavwanre.

¹² Oma rọye avwanre wan vwo aroeyivwo kugbe udu vwo sikẹrẹ fiki rẹ esegbuyota rẹ avwanre vwo kpahọ.

¹³ Fiki rẹ ọtiọye na we gbi jẹ oma rhọ ovwan fiki rẹ oja re me ria kẹ ovwa-an, ọye hẹ ejiro rẹ ovwan.

Ra vwọ Riẹn Eguọnọ ri Kristi

¹⁴ Fiki rẹ ọnana mi vwo diguẹ kẹ Ọsẹ na,

¹⁵ ohwo ra vwẹ odẹ rọye se uvwie kuvwiẹ rọ hẹ akpo vẹ odjuvwu.

¹⁶ Kirobo rẹ efe rẹ urinrin rọye epha kọ sa vwẹ ẹgba rọye kẹ ovwan ogangan vwẹ oma rẹ Erhi rọye rọ hẹ udu rẹ ovwan,

¹⁷ rere Kristi sa rhe wan esegbuyota dia udu rẹ ovwan; rẹ ẹguọnọ rẹ ovwan da rhe ghwaotọ kokoroko nure,

¹⁸ ovwan kugbe ihwo efuanfon na ejobi ki se vwo ogangan vwọ riẹn ohẹhẹre kugbe ugrogro kugbe enuẹra kugbe ukokodo

¹⁹ kugbe ra riẹn ẹguọnọ ri Kristi rọ rhonọ erianriẹn, rere wa vwọ sa vọn vẹ ọvọnvọn rẹ Ọghẹnẹ.

²⁰ Asakiephana vwọ kẹ ohwo ro sa kẹ okẹ ro buru vwẹ ogangan rọye rọ hẹ udu rẹ avwanre vwẹ emu ejobi rẹ avwanre nọre eyẹ rẹ avwanre roro,

²¹ ọye a vwẹ urinrin kẹ vwẹ evun rẹ ishọshi kugbe vwẹ evun ri Jesu Kristi ra ro uvwiẹ rẹ akpọ na ejobi, bẹdẹ bẹdẹ. Isẹ.