Daniẹl 7 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

Daniẹl Vwerhẹ Evwerhẹ rẹ Eranvwe Ẹne

¹ Vwẹ ukpe rẹ ẹsosuo ri Bẹlshaza ovie rẹ Babilọn, Daniẹl da vwerhẹ evwerhẹ ọ da mrẹ emramrẹ ọke ro vwo shevwerhẹ enu rẹ ehwa rọye. Etiyin ọ de si evwerhẹ na phihọ otọ, ọ da rha ta obo re hẹ evun rọye.

² Daniẹl da ta, Me da mrẹ emramrẹ vwẹ evun rẹ ason na, nighe, odju ẹne rẹ odjuvwu na ki djuẹ abadi rode na.

³ Eranvwe ride ẹne de nẹ evun rẹ abadi na rhe, dohwo doghẹre rọye.

⁴ Ọ rẹsosuọ da họhọ okpohrokpo vẹ ibekpe rẹ ugo. Ọke mi vwo no re a da sanvwẹ ibekpe rọye nu, a da kparọ nẹ otọ e de vwo mudia vwẹ awọ rọye ivẹ kerẹ ohwo; iroro rẹ ohwo kọye a vwọ kẹ.

⁵ Gbe nighe, eranvwe ọfa, ọrivẹ rọ pha kerẹ okorhi. A da kpare ẹbẹre ọvo kpenu; ọ vwẹ ibiedada erha vwọ hwa akọ; a da ta kẹ, Vrẹn, re wọ re uvwo buebu.

⁶ Ọnana vwọ wan nu mi de ni, nighe, ọfa, rọ họhọ edjẹnẹkpo, vẹ ibekpe rẹ ọphran ẹne vwẹ obuko rọye; eranvwe na vẹ uyovwi ẹne, a da vwẹ ogangan rẹ isuesun vwọ kẹ.

⁷ Ọnana vwọ wan nu me da mrẹ vwẹ evun rẹ emramrẹ vwẹ ason na, nighe, eranvwe rẹ ẹne, omuoshọ ọdjoma ọ jẹ vọn vẹ ogangan, o ji vwo ako rẹ utehru ride; ọ ria o vwirhẹ ibribro ọ da vwẹ awọ chivwi eravwe ri chekọ muotọ. Ọ da fẹnẹ eranvwe ejobi re ka obaro kẹ; ighoro ihwe yi rhere.

⁸ Mi de roro kpahẹ ighoro na, nighe, ọvo vwẹ usun rayen da tan rhe, otutuno, tavwe a ke kparẹ ighoro erha rẹ esosuọ na nẹ otọ, nighere, ighoro nana vwẹ ibiẹro re họhọ ibiẹro rẹ ohwo, kugbe unu ro ta ikpita ride.

⁹ Mi vwo no, a da ghan ekete phihọ etiyin ọvo rọ herọ nẹ awanre rhe de tidia; ewun rọye kọ fuan popo kerẹ imicho, ẹton rọ hẹ uyovwi rọye kọ epha kerẹ oruru, ekete rọye, kerẹ erhanre rọ la gidigidi idjugẹ rọye kerẹ erhanre rọ la.

¹⁰ Ọkẹre rẹ erhanre da djẹ rhe o de nẹ obaro rọye rhe; uriori vwarẹ uriori re ga, uriori ihwe kugbe uriori ihwe mudia vwẹ obaro rọye; ẹguare da gba re vwọ guẹdjọ e de rhie ẹbe na phihọ.

¹¹ Mi de ni ayen fiki rẹ edo rẹ eta ride re mra nẹ ighoro na cha. Ri mi vwo ni re, e de hwe eranvwe na, a da guọghọ oma rọye nu, e de muo phihọ erhanre nẹ ọ ton.

¹² Vwọ ke eranvwe ri chekọ na, e de mie ayen isuesun rayen, ẹkẹvuọvo a da yan jẹ arhọ rayen vwo hẹrhẹ ọke ọfa.

¹³ Me da mrẹ vwẹ evun rẹ emramrẹ vwẹ ason na, nighe vwẹ egho rẹ irharheghe na, ọvo da rhe kerẹ ọmọ rẹ ohwo, o de bru ohwo rọ herọ nẹ Awanre Rhe na a da vwọ phia vwẹ obaro rọye.

¹⁴ Kọye vwẹ isuesun kẹ, kugbe urinrin vẹ uvie, rere ihwo ejobi, vẹ ẹgborho ejobi vẹ ephẹrẹ ejobi vwọ sa ga; isuesun rọye ọye isuesun ri bẹdẹ, ro che jẹ ẹwanvrẹn, kẹ uvie re jẹ sa ghwọrọ.

¹⁵ Vwọ kẹ vwẹ ri Daniẹl, erhi rọ hẹ evun mẹ kọ ro ẹnwan emramrẹ re me mrẹre na ọ da nẹrhẹ oshọ mu vwẹ.

¹⁶ Mi de sikẹrẹ ohwo ọvo vwẹ usun rẹ ihwo ri mudia vwẹ etiyin na me da nọ kpahe uyota rẹ emu nana ejobi. Etiyin ọ da ta kẹ vwẹ, ọ da vwẹ otọ rẹ emu na ejobi vwọ nẹ vwẹ.

¹⁷ Eranvwe ride ẹne na eyẹ ivie ẹne ri che muẹ vwẹ akpọ na.

¹⁸ Ẹkẹvuọvo ihwo efuanfon rẹ ọ ro Me Kpenu ejobi keye cha reyọ uvie na, kẹ ayen yọnre uvie na rhiri bẹdẹ.

¹⁹ Etiyin me da guọnọ uyota riẹn kpahe eranvwe rẹne na, rọ fẹnẹ iri chekọ na ejobi, omuoshọ gangan, ọ vẹ ako rẹ utehru vẹ ififabọ rẹ ẹrovwo, ọ ria nẹ ọ me rha guọghọ ibribro, o mi rhe chiyi i ri chekọ muotọ.

²⁰ Vwọ kpahe ighoro ihwe re hẹ uyovwi rọye, vẹ ighoro efa ri yoro phia, re sua eshe kẹ ighoro erha vwẹ obaro rọye, ighoro vwẹ ibiẹro kugbe unu rọ vwọ ta ikpeta ride, re je rho nọ otu rọye.

²¹ Ri mi vwo no re, ighoro na vẹ ihwo efuanfon ki phiẹ ofovwi, ọ da gan nọ ayen,

²² rhiri bẹsiẹ rẹ Ọ rọ herọ bẹdẹ bẹdẹ ke rhe, o de bru orhiẹn kẹ ihwo efuanfon rẹ Ọ ro Me Kpenu ejobi, ọke de rhi te rẹ ihwo efuanfon na rhe reyọ uvie na.

²³ Enẹ kọye ọ tare: Vwọ kẹ eranvwe rẹne, uvie rẹne kọ cha dia akpọ na, kọ fẹnẹ uvie ri chekọ ejobi, ko che mu akpọ na ejobi rọ o mi chiyo muotọ, o mi vwirho ibribro.

²⁴ Vwọ kẹ ighoro ihwe na, vwẹ evun rẹ uvie nana ivie ihwe efa ji che no cha, ọ da wan ayen nu ọfa je cha phia; ọ cha fẹnẹ e rẹsosuọ na, kọ cha guọghọ ivie erha te otọ.

²⁵ Ọ cha ta ota rẹ ẹgua kpahe Ọ ro Me Kpenu na, ko che shenyẹ ihwo efuanfon rẹ Ọ ro Me Kpenu na, kọ cha jẹ iroro kpahẹ ewene rẹ ọke orẹ vẹ irhi na; ke che siobọ nẹ ayen vwọ kẹ usuo rọye vwẹ ẹgbukpe erha gbẹ ubro.

²⁶ Ẹkẹvuọvo ẹguare na ko tidia guẹdjọ, ka cha reyọ isuesun rọye mie, ka ghwọrọ a me guọghọ kufia re te oba.

²⁷ Te uvie na vẹ isuesun na kugbe ọrho rẹ uvie na vwẹ otọ rẹ odjuvwu na ka cha vwẹ ayen kẹ ihwo efuanfon rẹ Ọ ro Me kpenu ejobi; uvie rayen kọ cha dia uvie ri bẹdẹ isuesun na ejobi ke cha ga ri de mu ọghọ kẹ ayen.

²⁸ Ọnana ọye oba rẹ ota na. Vwọ kẹ vwẹ ri Daniẹl, iroro mẹ da nabọ djẹ oshọ mu vwe, ophiẹn mẹ da rhẹriẹ; ẹkẹvuọvo mi de phi ota na phihọ evun mẹ.