Daniẹl 3 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

Esivwo nẹ Ogidi Erhanre

¹ Ovie Nebukadreza da ma ẹdjọ rẹ oro, ugrogro rọye da dia kubit ujorha, ohẹhẹre rọye ke rha kubit esan. O de muo vi vwẹ uphephẹ ri Dura vwẹ unuakpọ ri Babilọn.

² Etiyin ovie na, Nebukadreza de se ehonvwọre na, inotu na, isun na, ediẹguare na, eyọnrigho na, iguẹdjọ na, kugbe ihwo ri suẹn vwẹ unuakpo na ejobi koko vwẹ asan re de che rhiẹ ẹdjọ ri Nebukadreza Ovie na vwọ vi na.

³ Etiyin ehọnvwọre na, inotu na, isun na, ediẹguare na, eyọnrigho na, iguẹdjọ na, kugbe ihwo ri suẹn vwẹ unuakpọ na ejobi de koko vwẹ asan rẹ ovie Nebukadreza da cha vwẹ ẹdjọ ro mare na phia; ayen de mudia vwẹ obaro rẹ ẹdjọ ri Nebukadreza vwo vi na.

⁴ Etiyin aghwoghwo na da van ghwoghwo tanẹ, E ihwo, ẹgborho, kugbe ephẹrẹ, e jẹn ovwan riẹn,

⁵ nẹ ovwan de nyo edo rẹ owanre, akpata, isorogun, urephe, koka koka rẹ ihwehworo ejobi, we mi shiguẹ re wa ga ẹdjọ re oro ri Nebukadreza vwo vi na;

⁶ Kohwo kohwo ro rhe she diguẹ ga vwẹ ugege yena-a ka kparo phihọ ogidi erhanre.

⁷ Fiki rẹ ọtiọye na rẹ ihwo na ghwe vwo nyo edo rẹ owanre, akpata, isorogun, urephe vẹ oka rẹ ihwohworo ejobi, ihwo ejobi, ẹgborho, vẹ ephẹrẹ de shiguẹ ayen da ga edjọ rẹ oro rẹ Ovie Nebukadreza vwo vi na.

⁸ Etiyin ihwo ri Kaldia evo da rhe obaro rhe vwẹ ihwighwu gborho ihwo ri Ju na.

⁹ Ayen da ta kẹ Ovie Nebukadreza, E Ovie, wọ re bẹdẹ.

¹⁰ Wẹ, E Ovie ri ji urhi tanẹ kohwo kohwo ro nyo edo rẹ owanre, akpata, isorogun, urephe vẹ ihwehworo ejobi, o mi shiguẹ rọ ga ẹdjọ re oro na;

¹¹ nẹ kohwo kohwo ro rhe shiguẹ ọ da ga-a, ke muo phihọ ogidi erhanre.

¹² Ihwo ri Ju evo herọ, ru wọ vwo mu nẹ isun ubrakpọ ri Babilọn: Shadrak, Mashak vẹ Abẹdnigo. Eshare nana E ovie, e davwe erhọn wẹ-ẹ, ayen ga ẹdjọ wẹ-ẹn, ayen ga oma wẹn na eyẹ ayen diguẹ kẹ ẹdjọ rẹ oro ru wọ mu vi na-a?

¹³ Etiyin Nebukadreza vẹ ophu djọghọ djọghọ da ta nẹ a vwẹ Shadrak, Mẹshak vẹ Abẹdnigo rhe. Etiyin a da reyọ eshare nana rhe obaro rẹ ovie na.

¹⁴ Nebukadreza da ta kẹ ayen, Uyota, E Shadrak, Mẹshak vẹ Abẹdnigo, nẹ wa ga ẹdjọ mẹ na vẹ oma rẹ oro ri mi vwo vi na-a?

¹⁵ Asakiephana, wa da choma vwẹ ọke we de nyo edo rẹ owanre, akpata, isorogun urephe vẹ ihwehworo ejobi, we de she diguẹ re wa da ga oma ri mi ruru na, yẹ oyoma; ẹkẹvuọvo wa gbe rha ga-a, ugege yena ke mu ovwan phihọ ogidi erhanre na; ki didi Ọghẹnẹ se si ovwan nẹ abọ mẹ?

¹⁶ Shadrak, Meshak, vẹ Abẹdnigo da kpahe kẹ ovie na, E Nebukadreza, o rhe fo rere avwanre kpahe kẹ wẹ vwẹ ota nana-a.

¹⁷ O da dia ọtiọye, Ọghẹnẹ rẹ avwanre rẹ avwanre ga na se sivwi avwanre nẹ ogidi erhanre na, o ji si avwanre nẹ obọ wẹn, E Ovie.

¹⁸ Ẹkẹvuọvo ọ rha je dia ọtiọye-e, gba riẹn, E Ovie nẹ avwanre cha sa ga edjọ wẹ-ẹn eyẹ oma rẹ oro ru wo vwo vi na-a.

¹⁹ Etiyin ophu de mu Nebukadreza gangan, opharo rọye de kurhẹriẹ kpahe Shadrak, Meshak vẹ Abẹdnigo. O da ta nẹ e koko ogidi erhanre na rọ la ga nọ obo rẹ ọ epha na asia ighwrẹ.

²⁰ Ọ da sanẹ ihwo re ganre evo vwẹ unuofovwi rọye, nẹ ayen gba Shadrak, Mẹshak vẹ Abẹdnigo, rere e mu ayen teye ogidi erhanre na.

²¹ Etiyin eshare nana da vwẹ emwa rayen vẹ iwun rayen vwọ gba ayen kugbe erhu rayen a da kpare ayen phihọ ogidi erhanre na.

²² Fikiridie urhi rẹ ovie na pha gangan, erhanre na ke rha je rhorho gangan, ela rẹ erhanre de hwe eshare ri mu Shadrak, Mẹshak, vẹ Abẹdnigo phihọ ogidi erhanre na.

²³ Etiyin eshare erha na, Shadrak, Mẹshak vẹ Abẹdnigo de re she teye evun rẹ ogidi erhanre na.

²⁴ Etiyin o de gbe Nebukadreza unu, o de vrẹn okpokpakpa. O da ta kẹ ẹboiroro rọye, O dia eshare erha avwanre nu phihọ erhanre na? Ayen da kpahe kẹ ovie na, Uyota, E ovie.

²⁵ Ọ da kpahe, Ẹkẹvuọvo me mrẹ eshare ẹne ra rhan ufi nu re yan vwẹ evun rẹ erhanre na, erhanre na torhẹ aye-en, oma rẹ ohwo rẹ ẹne na da họhọ ọmọ rẹ eghẹnẹ.

²⁶ Etiyin Nebukadreza de bi kẹrẹ anurhoro rẹ ogidi erhanre na epha ọ da ta, Shadrak, Meshak, vẹ Abẹdnigo , idibo rẹ Ọghẹnẹ ro me kpenu ejobi, wa yan phia, re wa yanrhe etinẹ. Etiyin Shadrak, Meshak vẹ Abẹdnigo da yan nẹ evun rẹ erhanre na rhe.

²⁷ Etiyin ehọnvwọre na, inotu na, isun na, vẹ ediaguare rẹ ovie na da ghwẹ koko, ayen da mrẹ nẹ erhanre na vwo ogangan vwẹ oma rẹ eshare na-a; ẹto rẹ uyovwi rayen torhẹre-e, emwa rayen tonro-o, e nyo ọnrhe rẹ erhanre vwẹ ayen oma-a.

²⁸ Nẹbukadreza da ta, Ebruba kẹ Ọghẹnẹ ri Shadrak, Mẹshak vẹ Abẹdnigo, rọ ji amakashe rhe rhi sivwi idibo rọye, re vwẹ ẹro suọ ayen da jẹ ota rẹ ovie fia, ayen phi oma rayen phihọ otọ ra ga eghẹnẹ efa-a jọkpa rẹ Ọghẹnẹ rayen ọvo.

²⁹ Fiki rẹ ọtiọye na mi ji urhi; kohwo kohwo ẹgborho eyẹ ephẹrẹ rọ ta ota kpahe Ọghẹnẹ ri Shadrak, Meshak, vẹ Abẹdnigo na ka sha awọ nẹ ayen oma, a me rha guọghọ iwevwi rayen te otọ, kidie o rhe vwo Ọghẹnẹ ọfa ro se sivwi ihwo vwẹ idjerhe nana-a.

³⁰ Etiyin ovie na de mu Shadrak, Meshak, vẹ Abẹdnigo kpenu vwẹ unuakpọ ri Babilọn.