Aizaya 61 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

Ikun Esiri rẹ Esivwo ri Zayọn

¹ Erhi rẹ Ọrovwohwo Ọghẹnẹ ọ he oma mẹ, fikiridie ọ vwẹ evwri ghworo uvwe Me vwọ ghwẹ ikun esiri na rhe ihwo re kpokpo, o ji vwe rhe gba udu ro vwirhiri koko, rhi ghwoghwo egbemọphẹ kẹ ighuvwu, esiobọno kẹ ihwo re hẹ uwodi;

² re ghwoghwo ukpe rẹ ẹreyọ re evun esiri rẹ Ọrovwohwo, kugbe ẹdẹ rẹ ihri rẹ Ọghẹnẹ rẹ avwanre, re bru ihwo ri muomahọ uche,

³ ra rhọvwe kẹ ihwo ri muomahọ vwi Zayọn– ra kẹ ayen ovwẹ vwẹ ẹdia rẹ iwurhie, evwri rẹ aghọghọ vwẹ ẹdia rẹ omaemuohọ, ukpo re ejiro vwẹ ẹdia rẹ erhi ro sherua, rere e vwo se ayen ehahe rẹ evwata, ekankọn rẹ Ọrovwohwo, rere e vwo jiro.

⁴ Ayen ke cha bọn iwevwi re awanre ri tuegheri, asan re vẹre na ka rhoma mu ayen vi, ayen ke rhuẹrẹ irere re ghwọre na, re vẹre vwe ọke rẹ orua buebu re.

⁵ Erhorha ki che mudia re ghẹrẹ uchuru wẹn, erhorha ki che voro ivoro wẹn re rhuẹrẹ vain wẹn,

⁶ ẹkẹvuọvo ke se we irherẹn rẹ Ọrovwohwo na, ihwo ke ta kpahe owẹ nẹ igbodibo rẹ Ọghẹnẹ rẹ avwanre, ku wọ re vwe efe re otọ na, vwẹ efe rayen wo de vwo ejiro.

⁷ Vwẹ ẹdia re omaẹvuọ wẹn ku wo vwo ẹkẹn ivẹ, vwe ẹdia re oma ẹphọphọ ku wọ ghọghọ vwẹ ẹkẹn ute wẹn, fiki rẹ ọtiọye na vwẹ evun rẹ otọ wẹn ku wo ẹkẹn ive, ọwẹn kọ dia aghọghọ re rara.

⁸ Kidie Mẹvwẹ Ọrovwohwo guọnọ ọsoso, uji echo vẹ oruchọ tu vwe oma, Me vwẹ evun esiri kpẹvwẹ ayen ẹse, Me ve ayen ke re ọphọ re rara.

⁹ Uvwiẹ rayen ka riẹn vwe ohri re ẹgborho na, emọ rayen vwẹ usun re ihwo na, ihwo re mre ayen ki vughe ayen, nẹ ena ihwo rẹ Ọrovwohwo bruphihọ kẹ.

¹⁰ Ke Me ghọghọ gangan vwẹ evun rẹ Ọrovwohwo, ẹnwẹn Mẹ kọ ghọghọ vwe evun rẹ Ọghẹnẹ Mẹ, kidie ọ reyọ iwun rẹ esivwo vwo rhuo vwe, o ku adagba re ọvwata rhurhu uvwe, kirobo re ọpha ghwẹ emwu gide oma rọye, kirobo rẹ ọpha ghwẹ evwarha eghaghare phihọ oma,

¹¹ Kirobo rẹ otọ yoro che phia na, kirobo re obo re voro phihọ udju va nẹ otọ cha na, eriyin Ọrovwohwo che ru re ọvwata veẹ ejiro vwọ varhe keẹ ẹgborho na mrẹ.