Aizaya 5 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

Itẹ rẹ Ogba ri vain

¹ Ju vwe so une kẹ ọrojevwe une rẹ ivuavwerhe kpahe ogba ri vain rọye. Ọrojevwe de vwo ogba ri vain vwẹ enu rẹ ugbenu ro yovwe emu gangan.

² O de brotọ kẹ ọ da sanọ ibiekpẹn nẹ o da vwẹ omamọ rẹ grep vwọ kọn, ọ da bọn uwevwi rẹ ohẹrhẹ phihọ uherevie rọye, ọ da kare okọ re de miẹn vain phihọ, ko rhẹro ne ọ cha mọ otieẹ ẹkẹvuọvo otiẹ rẹ erivwi kọye ọ mọre.

³ Enẹna, ovwa ihwo ri Jerusalẹm kugbe ihwo ri Juda, Me rẹn ovwan gbe brorhiẹ mẹ vẹ ogba ri vain mẹ na.

⁴ Die ọfa chekọ re ru kẹ ogba ri vain mẹ, ri mi gbi ru kẹ-ẹ? Ri mi vwo no rhẹro nẹ ọ mọ otiẹ, rọ rha vwọ mọ grape rẹ erivwi?

⁵ Gba kerhọn re me ta kẹ wẹn obo ri mi che ru kẹ ogba ri vain mẹ na. Ki mi si ogba na no, ka cha guọghọ, Ki mi tueghe ogba rọye, ke chiyo mu ekpẹn

⁶ Ki mi miovwo, e gbi che fro-o eyẹ a gbe gua-a okpia vẹ idjigbẹ ke cha djẹ rhe vwọ, ki mi ji urhi kẹ enu na nẹ osio gbe rhọ phihọ-ọ.

⁷ Kidie ogba ri vain rẹ Ọrovwohwo rẹ otuofovwi ọye uwevwi rẹ Izrẹl, ihwo ri Juda eye kẹ ivi rẹ ekakọn rọye rọ kọnre, o de nẹro rẹ ọsoso, ẹkẹvuọvo e vwo ni, ke ọbara, o de nẹro rẹ ọvwata, ẹkẹvuọvo nighe, kẹ oviẹ!

Ekan ra harhe Ohwo umwemwu

⁸ Ekan kẹ otu re bọ uwevwi so uwevwi, re vwẹ udju vwọ so udju, bẹsiẹ rẹ asan vwo jẹ dia, wẹn ọvo ri vwo chekọ kpọhro vwẹ uherevie rẹ otọ na.

⁹ Ọrovwohwo rẹ otuofovwi na o duvwu iyori kẹ vwẹ nyo. Uyota iwevwi buebu cha dia ofefe, iwevwi ride yoyovwi, ihwo gbe dia aye-en.

¹⁰ Kidie ẹbẹre otọ ihwe ri vain gbe sa vọu oze-e kugbe egheghẹre re ibi ra kọnre gbe sa vọn iputusẹ-ẹ.

¹¹ Ekan ke ihwo ri vrẹn vwẹ irhiọke rhirhi rere ayen djẹ nene idi egangan, ri tidia rhirin re te ovwọvwọn bẹsiẹ rẹ idi vwo mu ayen!

¹² Ayen vwo ine vẹ isorogun, urephe vẹ owanre kugbe udi vọn asan orẹ rayen; ẹkẹvuọvo ayen se uruemu rẹ Ọrovwohwo gbe emu-u, eyẹ kẹ iruo rẹ obọ rọye-e.

¹³ Fiki rẹ ọtiọye na ihwo mẹ vwo kpo ijọpha fiki rẹ ughẹghẹn rayen, ihwo ri vwo ọghọ vwẹ usun rayen owẹvwe ro hwe ayen ghwẹ, ibuebu rayen yamu fiki rẹ urhuru rẹ ame.

¹⁴ Fiki rẹ ọtiọye na ushi rhie unu rọye phihọ ọ nabọ rhie phihọ ghworo ikpihwo ri Jerusalẹm kugbe otu rayen ejobi ke ghwọrọ ruọ, ọbibinagba na ejobi kugbe ohwo rẹ oma muẹ.

¹⁵ Ohwo e siro wurhu, a reyọ ihwo vwo gbotọ, ẹro re ohwo umwemwu kọ dia karhiẹ.

¹⁶ Ẹkẹvuọvo Ọrovwohwo rẹ otuofovwi na kọye ọvo a kpare kpenu vwẹ ọsoso, Ọghẹnẹ Ọfuanfon na kọ vwẹ oma rọye phia ọfuanfon vwẹ ọvwata.

¹⁷ Ọke yena imigodẹ na ke cha re odi rayen, te ọghwara te ẹmẹvwe ke cha re kugbe vwẹ ohri rẹ iwevwi ri sheri na.

¹⁸ Ekan kẹ otu ri vwẹ ufi re efian evwọrọ kpono orukuruku ri kpono umwemwu kerẹsiẹ re kpono ekpẹrẹ,

¹⁹ rọ tanẹ Jo ru phẹre, jo ru iruo rọye phẹre rere avwanre mrẹ; jẹn ẹguọnọ rọ udu rẹ Ọfuanfon Ovuọvo rẹ Izrẹl na bi te obonẹ, e jọ rhe, rere avwanre riẹn!

²⁰ Ekan kẹ ihwo ri se umwemwu erhuvwu erhuvwu umwemwu, ri phi ebri phihọ urhukpẹ urhukpẹ phihọ ebri, ri phi obo re yara phihọ ọrọ ọmiẹmiẹ ọrọ ọmiẹmiẹ phihọ ọ rọ yara.

²¹ Ekan ke ihwo re ghwanre kẹ omaobọ rayen, ri vwọ ọhọ kẹ omobọ rayen ọvo!

²² Ekan ke otu re dia egba rẹ idi ẹda, re goma rẹ idi ogangan ẹgua,

²³ ri siobọ nẹ ọ rọ reabe fiki rẹ udi ẹriọ, ayen mi mie ọvwata ase rọye!

²⁴ Fiki rẹ ọtiọye na kirobo rẹ imwerhanre torhẹ etu na, rẹ odi ọyaya torhẹ vwẹ erhanre na, eriyin awọ rẹ umwemwu rayen cha dia gbegbo ẹbe eboba ri yoro cha ki bru ighorigho, fikiridie ayen sen urhi rẹ Ọrovwohwo rẹ otuofovwi na, ayen da jẹ ota rẹ Ọfuanfon Ọvuọvo rẹ Izrẹl na fia.

²⁵ Kọye ophu rẹ Ọrovwohwo vwọ tua kpahe ihwo rọye, ọ da riẹn obọ kpahe ayen ọ da ghwiẹ ayen, igbenu na de kpogho irivwi rayen kerẹ ikueku vwẹ uherevie rẹ urhuvwu Vwẹ enana ejobi na ophu rọye ji fue-e, yẹn obọ rọye je riẹn phia rhe.

²⁶ Kọ cha vwẹ oka se orere rọ hẹ kọ kudje se nẹ ẹtan rẹ akpọ rhe, gbe nọ, okpokpakpa, kpatakpata ọ cha rhe!

²⁷ Oma cha ghwọrọ ọvuọvo-o ọvuọvo che she-e, ọvuọvo che go ovwerhẹ-ẹ eyeẹ gba vwerhẹ-ẹ amwa rẹ ehun cha ba-a, ufi re isabato che vwrẹ-ẹ,

²⁸ ibige rayen pha dandan, imirhabọ rayen ejobi gba phihọ, ichuku awọ rẹ iyesi rayen pha gangan kerẹ utehru, adjugẹn rayen kerẹ adjugẹn rẹ odju.

²⁹ Edo rayen kiri okpohrokpo, ayen do kerẹ emọ rẹ okpohrokpo ayen gua gbako phihọ emu rayen, ayen mi kpono yanran, ohwo ọvuọvo sa karhiẹ mie aye-en.

³⁰ Ayen guan vwi fiki rọye vwẹ ẹdẹ yena, kerẹ urhie ro do. Ohwo da kparo ni otọ na, nighere, ebri kugbe ivuemiovwo, orẹmrẹ na ko che mu ebri vwi fiki rẹ ikoro na.