Aizaya 4 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

¹ Eya ighwrẹ ke cha gbanọ ọshare ọvo vwẹ ẹdẹ yena, tanẹ, Avwanre re emuobọ rẹ avwanre, avwanre ji rhuo amwobọ rẹ avwanre, ẹkẹvuọvo ja de vwẹ odẹ wẹn se avwanre, si ophọphọvwe na nẹ avwanre oma.

Urinrin rọ cha kẹ Jerusalẹm

² Vwe ẹdẹ yena oghọ na rẹ Ọrovwohwo na kọ cha dia erhuvwu kugbe urinrin, emamọ re otọ na kọye cha dia omẹyan ọ re urinrin rẹ otu rẹ ihwo re rhọre vwẹ Izrẹl.

³ Ohwo ro che chekọ vwi Zayọn rọ da dia Jerusalẹm ke se nẹ Ọfuanfon, kohwo kohwo re keri phihọ arhọ vwi Jerusalẹm,

⁴ vwẹ ọke rẹ Ọrovwohwo da cha hworhẹ inuhu rẹ emetẹ ri Zayọn nu, rọ da cha hworhẹ ipe rẹ ọbara ri Jerusalẹm nẹ uherevie rọye nu vwẹ erhi rẹ ọrhiẹbro kugbe erhi rẹ ẹtorhẹ.

⁵ Ọke yena Ọrovwohwo na kọ cha vwẹ ikoro vwe oghẹruvo, kugbe ivwirhi vẹ erhanre rọ la vwẹ ason, vwo rhurhu Ugbenu ri Zayọn ejobi kugbe ọwhegbe rẹ ihwo na, eharha rẹ efenudu ko che rhurhu urinrin na vẹ ọgarivi na.

⁶ Kọ dia ophie vwẹ uvo vwo nẹ oheri, kugbe odjahọ vẹ uvun nẹ ogiribo vẹ osio