Aizaya 36 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

Senakẹrib kpare Ofovwi

¹ Vwẹ ikpe ihwẹne rẹ Ovie Hẹzikaya, Senakerib ovie rẹ Asiria da kpare ofovwi vwọ so irere ri Juda ejobi ra gba ogba riariẹ ọ da reyọ ayen.

² Ovie re Asiria de ji Rabshekeh nẹ Dashishi rhe bru Ovie Hẹzikaya vwi Jerusalẹm, vẹ unuofovwi rode O de rhi mudia vwẹ asan unuame rẹ ẹtẹrhe ro he obenu na vwẹ idjerhe rode ra wan kpo udju ro rhuo emwa.

³ Etiyin Eliakim ọmọ ri Hilkaya rẹ onotu rẹ uwevwi na, kugbe Shebua rẹ osiẹbe, kugbe Joah rẹ ọmọ ri Asaf, rẹ okeri na de bro rhe.

⁴ Rabshekeh da ta kẹ ayen, Vuẹ Hẹzikaya, Enẹ ovie rode rẹ Asiria na tare Ono wọ vwẹ ẹro so?

⁵ Wo rori nẹ eta gheghe eye ona vẹ egba rẹ ofovwi? Ono wọ vwẹ oma da, ru wo vwo yivwaro kpahe ovwẹ?

⁶ Nighere, wọ vwẹ oma da Ijipt, ọkpọ rẹ ugbẹn rẹ ọghọrọgbọdọ, rọ shọrọ obọ rẹ ohwo rọ vwe oma rere na. Ọtiọye Fero ovie re Ijipt epha kẹ ihwo ejobi re vwẹ ẹro da.

⁷ Ẹkẹvuọvo ọ da dianẹ wọ ta kẹ vwẹ nẹ, Avwanre vwẹ ẹro da Ọrovwohwo Ọghẹnẹ rẹ avwanre, ọ dia ọye ri vwo asan ro kpenu kugbe agbada ri Hẹzikaya kuare na, rọ da ta kẹ Juda vi Jerusalẹm nẹ, Enu rẹ agbada nana ọye ovwan da ga?

⁸ Mọ Asakiephana, rere wọ vẹ onini mẹ ovie rẹ Asiria na yenyan Me vwẹ iyesi ujuhwe akuava kẹ wẹ, su wo sa mrẹ ihwo ri se tidia ayen gua.

⁹ Komavọ wọ vwọ sa rhan onotu ọvo vwẹ usun rẹ inotu itete rẹ onini mẹ rhivwi, ru wọ vwọ vwẹ ẹro so Ijipt vẹ ekpẹrẹ rẹ ofovwi kugbe ihwo re gua iyesi?

¹⁰ Ọ rọ marho, wo rori nẹ obuko rẹ Ọrovwohwo ọye me vwọ rhe otọ na rhe vwọ ghwọrọ na? Ọ dianẹ Ọrovwohwo re ta kẹ vwẹ nẹ, Yanran vwọ so otọ na, rere wọ ghwọrọ?

¹¹ Etiyin Eliakim, Shebnea, kugbe Joah da ta kẹ Rahshẹkeh nẹ, Biko, ta ota kẹ avwanre vwẹ ephẹrẹ rẹ Aremia, kidie avwanre nyo, wọ ta ota kẹ avwanre vwẹ ephẹrẹ ri Juda-a re ihwo na re he enu rẹ igbẹhẹ na de rhe nyo.

¹² Ẹkẹvuọvo Rabshekeh da ta, Kẹ onini mẹ ji vwe rhe re ta eta kẹ onini rẹ ovwan vẹ owẹ ọ dianẹ kẹ ihwo nana ri tidia vwẹ enu rẹ igbẹhẹ na-a, re brorhiẹ rẹ ughwu hwe re cha re isọn rẹ obọ rayen je da ephẹ rẹ obọ rayen na?

¹³ Etiyin Rabshekeh de mudia ọ da van gangan vwẹ ephẹrẹ ri Juda. Nyo eta rẹ ovie rode, ovie rẹ Asiria.

¹⁴ Enẹ ovie na tare Wo jẹn Hẹzikaya phiẹn wẹ-ẹn kidie o che se sivwi we-e

¹⁵ Wo ji Hẹzikaya ru we rere ọ vwẹ ẹro so Ọrovwohwo na-a tanẹ, Ọrovwohwo ghine se sivwi avwanre, e che phi orere nana phihọ obọ re ovie rẹ Asiria-a

¹⁶ Wo davwerhọn ri Hẹzikaya-a, kidie enẹ ovie rẹ Asiria tare Wa rhe rhuẹrẹ kẹ vwẹ rere we bru vwe rhe, kohwo kohwo vwẹ usun rẹ ovwan na kọ re ibi ri vain rọye kugbe ibi ri fig rọye kọ je da ame rẹ orhare rọye,

¹⁷ bẹsiẹ me cha vwọ reyọ ovwan yanran kpo otọ rọ họhọ otọ rẹ ovwan na, otọ rẹ ọka vẹ wain, otọ rẹ ikara vẹ ogba ri vain.

¹⁸ Kẹnoma, Hẹzikaya da rha phiẹn wẹ ghwru rọ vwọ tanẹ, Ọrovwohwo na se sivwi avwanre. O vwo ẹdjọ rẹ egborho na ọvo ro sivwi otọ rọye nẹ obọ rẹ ovie rẹ Asiria na dẹvure?

¹⁹ Tivọ ẹdjọ ri Hamat kugbe Arpad epha? Tivọ ẹdjọ ri Safarvaim epha? Kẹ ayen sivwi Sameria nẹ obọ mẹ?

²⁰ Ọvo vwẹ usun rẹ ẹdjọ rẹ irho nana se sivwi orho rọye nẹ obọ mẹ, rẹ Ọrovwohwo vwo se sivwi Jerusalẹm nẹ obọ mẹ?

²¹ Ẹkẹvuọvo ayen de fotovwi gbiẹi ayen kpahe ota ọvuọvo kẹ-ẹ kidie ovie tare nẹ, Wọ kpahe ota ọvuọvo kẹ-ẹ.

²² Etiyin Eliakim rẹ ọmọ ri Hilkaya, rọ dia onotu rẹ evwruwevwi na, kugbe Shebna rẹ osiẹbe, kugbe Joah rẹ ọmọ rẹ Asaf, rẹ okeri, de bru Hẹzikaya rhe vẹ emwa ebẹbẹre ayen da vuẹ eta ejobi ri Rabshekeh tare.