Aizaya 18 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

Aro ra Mrẹ kpahe Itiopia

¹ E, otọ rẹ ibekpe ri kiẹriariẹ vwẹ abọ oboyi rẹ irhie rẹ Itiopia,

² ri jẹ ekpreta rayen wan urhie ri Nile, vwẹ evun rẹ okọ ri paparọs vwẹ enu rẹ ame! Yanran ovwan iyinkọn rẹ okpakpa na, bru orere, grogro bọbọ bọbọ, bru ihwo ra djẹ oshọ rayen vwẹ asan ọkẹkẹre vẹ ogboko, orho ro vwo ẹgba ro phiẹ kparobọ rẹ irhie ghare otọ rọye.

³ Ovwan ihwo ejobi rẹ akpọ na ovwan rẹ dia akpọ na, Ra da kpare aphiana kpenu vwẹ enu rẹ igbenu gbe nọ! Re de hworo owanre, gbe nyo!

⁴ Kidie enẹ Ọrovwohwo ta kẹ vwe; Me cha jomaotọ dia adia mẹ de ni kerẹ oghẹruvo rọ nabọ fiotọ, kerẹ ukori rẹ evwru vwẹ ọke orho.

⁵ Tavwe rẹ orhọ ki ri te, rẹ ipho da kpare she nu, rẹ ipho na de hirhe phihọ otiẹ rọ vwanre, kọ vwẹ oda rẹ ivuevun nyavwe iri yoro cha, eghọn re tan rhe ka nyavwe ayen kufia.

⁶ Ka cha yan jẹn ayen ejobi vwo kẹ ephran re djoma ri hẹ enu rẹ ugbenu na, vwọ kẹ eranvwe rẹ aghwa. Ephran re djoma ke dia ayen vwẹ ọke uvo, eranvwe rẹ aghwa na ejobi kẹ etiyin e dia vwẹ ọke ohwahwa.

⁷ Vwẹ ọke yena ke che ru ẹse kẹ Ọrovwohwo rẹ otuofovwi na nẹ obọ rẹ ihwo ri grori re pha bọbọ bọbọ, nẹ obọ re ihwo ra djẹ oshọ rayen re kerẹ kugbe ri sheri, ẹgborho ro vwo ẹgba ro vwo phiẹ kparobọ re irhie ghare otọ rọye, vwo kpo Ugbenu ri Zayọn, ẹdia rẹ odẹ rẹ Ọrovwohwo rẹ otuofovwi na.