3 Jọn 1 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

Uvere

¹ Ọkpako na ri si ọbe na rhe Gayọs rọ ghare, re me guọnọre vwẹ ọ rẹ uyota.

² Ọ rọ ghare, me rẹ rere emu ejobi vwo yovwi kẹ wẹ kugbe rere wo vwo oma ọkpokpọ; me riẹnre nẹ o ji yovwi kẹ ẹnwẹn wẹn.

³ Kidie oma vwerhe ovwẹ gangan rẹ imoni na ẹvo vwọ rhe rhi vwo se oseri rẹ uyota kpahe arhọ wẹn, mrẹrẹ kirobo ru wo nene uyota na wan.

⁴ O rhe vwo omavwerhe ọfa mi vwo nẹ ọnana-a, ri mi vwo nyo nẹ emọ mẹ nene uyota na.

E jiri Ọrhorha ẹghọ ri Gayọs

⁵ Ọ rọ ghare, mi nyo usi rẹ emu esiri ru wo ru kẹ imoni na, marho kẹ erhorha na,

⁶ kẹ ena rhi se oseri rẹ ẹguọnọ wẹn vwọ kẹ ishọshi na. Wọ riẹn ru ru wo de dje idjerhe na kẹ ayen kirobo ro fori kẹ ẹga rẹ Ọghẹnẹ.

⁷ Kidie fiki rọye ayen vwọ yan oyan na ayen rhọvwere nẹ otu ri keferi na kẹ ayen emuọvo-o.

⁸ O fori rere avwanre cha ihwo ọtiọye na uko, rere avwanre vẹ ayen vwo okugbe vwẹ evun rẹ uyota na.

Ẹvwọsuọ ri Diotrifis

⁹ Mi si emu ọvo rhe ishọshi na; ẹkẹvuọvo Diotrifis ro muẹ oma kpenu na, rha rhọvwe phihọ ogangan rẹ avwanre-e.

¹⁰ Vwẹ ọtiọye na, ọke re me da rhe ke me vwẹ obo ro ruẹ phia, obo rọ pata ovwẹ vẹ eta ebrabra. Ọyena ọvo te kẹ-ẹ, ọ senre ọ rhọvwe dede imoni na-a, otu re guọnọ ayen dede ọ da ayen ji ọ da djẹ ayen nẹ evun rẹ ishọshi.

Omamọ Iyẹnrẹ kpahe Dimitrọs

¹¹ Ọ rọ ghare, wọ vwẹ ẹro kere ohwo umwemwu-u ẹkẹvuọvo vwẹ ẹro kere ohwo esiri. Ohwo ro ru emu esiri yẹ ọye ọ rẹ Ọghẹnẹ; ohwo ro ruẹ umwemwu yọ je mrẹ Ọghẹnẹ-ẹ.

¹² Kohwo kohwo se oseri kẹ Dimitrọs, uyota na ji se oseri kẹ rhe; mi ji se oseri kẹ rhe, yẹ ovwan riẹnre nẹ oseri mẹ uyota.

Uyerẹ rẹ obo oba

¹³ Mi vwo emu buebu ri mi si rhe we, ẹkẹvuọvo mi sa vwẹ ubiurhe vẹ ame vwo sio-o;

¹⁴ mi phierohọ nẹ me cha mrẹ wẹ nana, kẹ avwanre hirhe aro ku ohwo ta ota.

¹⁵ Ufuoma dia kẹ wẹ. Igbeyan na nẹ e yere uwe. Yere igbeyan na, yere ayen ọvuọvo.