2 Tẹsalonaika 3 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

Ẹrhovwo kẹ Avwanre

¹ Ọ rọ ka oba, imoni, wa rẹ kẹ avwanre, rere ota rẹ Ọrovwohwo na vwọ yan hẹ obaro rọ kparobọ, kirobo ro ruru vwẹ ohri rẹ ovwan na.

² Rere e vwo se sivwi avwanre nẹ obọ rẹ ihwo umwemwu; kidie ọ dia ihwo ejobi ri vwo esegbuyota-a.

³ Ẹkẹvuọvo Ọrovwohwo vwo esegbuyota; kọ kẹ ovwan ogangan ọ me rha sẹro rẹ ovwan nẹ obọ rẹ emu umwemwu.

⁴ Avwanre vwẹ ẹro so ovwan vwẹ evun rẹ Ọrovwohwo, nẹ ovwan ruẹ obo rẹ avwanre dje kẹ ovwan nẹ ovwan je ghwo obo phihọ eriyin rhe.

⁵ E jẹ Ọrovwohwo sun udu rẹ ovwan kẹ ẹguọnọ rẹ Ọghẹnẹ rere ovwan mudia gan kẹ Kristi.

Egbaphihọ kẹ Ohwo kohwo re o vwo ru Iruo na

⁶ Asakiephana, imoni, avwanre ji urhi kẹ ovwan vwẹ odẹ rẹ Ọrovwavwanre Jesu Kristi, nẹ ovwan sioma nẹ oniọvo ro gbe ufeti ro shehọ uruemu rẹ ovwan yono mie avwanre-e.

⁷ Kidie ekpuyovwi rẹ ovwan riẹnre obo rẹ ovwan vwẹ ẹro kere avwanre te; avwanre gbe ufeti vwẹ ọke rẹ avwanre vẹ ovwan vwọ herọ-ọ.

⁸ Avwanre re emu rẹ ohwo ọvuọvo ọphọphẹ-ẹ, ẹkẹvuọvo vwẹ omaesuo kugbe owian avwanre vwo ru iruo te ason te uvo, rere avwanre vwo jẹ oghwa ẹdia kẹ ovwan.

⁹ Ọ dianẹ kẹ avwanre jẹ ogangan evwo rẹ avwanre vwọ nọ ekpẹn rẹ emuọre-e, ẹkẹvuọvo avwanre vwẹ oma ru oniru rere wa vwẹ ẹro kere avwanre.

¹⁰ Tobọ ọke rẹ avwanre vẹ ovwan vwọ herọ na, ọnana hẹ urhi rẹ avwanre ji kẹ ovwan nẹ; a wianre-e, a ria-a.

¹¹ Kidie avwanre nyori nẹ evo vwẹ usun rẹ ovwan na gbe ufeti, re vwẹ ẹro so ihwo efa ne ghẹrẹ ayen, ri ruẹ emuọvo-o.

¹² Asakiephana me ji urhi kẹ oghẹre rẹ ihwo tiọye na, me de rhe bru ayen uche vwẹ evun rẹ Ọrovwohwo Jesu Kristi nẹ ayen ru iruo rayen dẹndẹn rere ayen mrẹ emu rẹ obo rẹ ayen re.

¹³ Imoni, we jẹ oma rẹ uruemu esiri rho ovwa-an.

¹⁴ Ọ da dianẹ ohwo ọvo senre ro mu ọghọ kẹ obo rẹ avwanre ta phihọ evun rẹ ọbe nana-a, we ni ohwo yena so, ovwan vẹ ọye ruẹ emuọvo kuẹgbe-e, rere oma vwọ vuọ.

¹⁵ Ovwan rha jẹ eghrẹ-ẹ, ẹkẹvuọvo ovwan ta ota kẹ kerẹ oniọvo.

Efo Ẹnwan

¹⁶ Asakiephana ekpuyovwi rẹ Ọrovwohwo rẹ ufuoma na ọ kẹ ovwan ufuoma kọke kọke vwẹ idjerhe ejobi. Ọrovwohwo nene ovwan ejobi dia.

¹⁷ Ọnana uyere rẹ ekpuyovwi mẹ ri Pọl, vwẹ obọ mẹ si rhe ovwan. Ọnana hẹ oka rọ hẹ kọbe kọbe mẹ; ọna hẹ idjerhe ri mi siẹ ọmẹ wan.

¹⁸ Ẹserọphẹ rẹ Ọrovwavwanre Jesu Kristi nene ovwan ejobi dia.