2 Samuẹl 20 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

Ozighi ri Sheba gberi

¹ Asakiephana orharhe rẹ ohwo ọvo da herọ, re se Sheba, ọmọ Bichri ohwo ri Bẹnjamin; o de hworo owanre ọ da ta, Avwanre vwo ẹkẹ vwi Devidi-i, avwanre vwo uku vwẹ ọmọ ri Jesse-e; dohwo dutughẹ rọye ra, E Izrẹl.

² Ọye ihwo rẹ Izrẹl ejobi de sioma reyọ ni Devid, ayen de nene Sheba ọmọ ri Bichri; ẹkẹvuọvo ihwo ri Juda de nene ovie rayen nẹ Jọdan re te Jerusalẹm.

³ Devid de rhi te uwevwi rọye vwi Jerusalẹm; ọye ovie da reyọ ẹsen ihwe na rọ yan jovwo ne vwẹ ẹro te uwevwi rọye; o de phi ayen phihọ uwevwi ọ da vwẹ ohwo rhẹrẹ ayen, jọ kẹ ayen emu ria, ẹkẹvuọvo o gbi bru ayen kpo ovwerhẹ-ẹ. Ọtiọye ọ kare ẹchẹ gbe ayen rhiri kerẹ eyauku re te ẹdẹ ughwu rayen.

⁴ Etiyin ovie de se Amasa; Se eshare ri Juda ejobi koko kẹ vwẹ ẹdẹ erha, ekpuyovwi wẹn je dia etinẹ rhe.

⁵ Kọye Amasa da yanran re se ihwo ri Juda; ẹkẹvuọvo o de gbe eghẹrẹ nọ ọke ra ta kẹ na.

⁶ Devid da ta kẹ Abishai, Asakiephana Sheba rẹ ọmọ ri Bichri cha wan avwanre oma nọ obo rẹ Absalọm ruru. Reyọ idibo rẹ ọrovwovwe wa vwọ tua, ọ de rhi vwo irere ra gba ogba riariẹ, ọ da rhe kẹ avwanre ukpokpoma. Ihwo erha de nene.

⁷ Abishai, Joab, kugbe Cheret, kugbe ihwo rẹ Pẹlẹt vẹ egba ofovwi na ejobi; ayen da yanran nu Jerusalẹm vwọ tua Sheba ọmọ ri Bichri.

⁸ Ọke rayen rhi vwo te asan rẹ oragha rode epha vwi Gibiọn, Amasa da vwa ayen. Ọke yena Joab ku ewun rẹ isodja phihọ. Ọ da rha vwẹ umuamwa vwo mu ọlọkọ mu chun, rọ vwọ yanran re ọlọkọ na de she.

⁹ Joab da ta kẹ Amasa, oma wẹn ganre omoni mẹ? Joab da vwẹ obọrhe yọnrọn ẹtuegba rọye re ọ fiọnfiọn.

¹⁰ Ẹkẹvuọvo Amasa gbi rhe ni ọlọkọ rọ hẹ obọ ri Joab so-o; o de ghwe duvwo phihọ evun ọ gbe rha rhuẹrẹ duvwu re o ki ghwu-u. Etiyin Joab vẹ Abishai da vwọ tua Sheba ọmọ ri Bichri.

¹¹ Ohwo ri Joab ọvo de mudia kẹrẹ, ohwo ro vwo ivuẹvwerhọ ki Joab vẹ ohwo rọ dia ọ ri Devid, ejo nene Joab.

¹² Amasa ko gbunie vwẹ ọbara vwẹ evun rẹ idjerhe rode na. Kohwo kohwo rọ mrẹ rẹ vwẹ etiyin mi mudia, ọke rẹ ohwo na vwọ mrẹ nẹ ihwo na ejobi mudia, o de mu Amasa nẹ idjerhe rode na rọ evun rẹ aghwa, ọ da vwẹ amwa rhurhu.

¹³ Ọke re vwo muo nẹ evun rẹ idjerhe nu, ihwo na ejobi de nene Joab vwọ tua Sheba rẹ ọmọ ri Bichri.

¹⁴ Sheba wanvrẹn orua rẹ Izrẹl na ejobi o de rhi te Ebẹl, Betmaacah; ihwo ri Bichri ejobi de rhi koko nene ruọ.

¹⁵ Ihwo re vẹ Joab gba herọ ejobi da rhe kua Ebẹl ri Betmaacah, ayen da vwẹ eragha gba ogba riariẹ orere na, o de rhirẹ mu igbẹhẹ rẹ orere na kokoroko jẹ orho na ji mudia; ihwo ejobi ri nene Joab ki kporo igbẹhẹ rẹ orere na rere o she.

¹⁶ Etiyin aye ọvo ro vwo ẹghwanre de kperi nẹ evun rẹ orere na rhe, nyo! nyo! Ta kẹ Joab, Rhe etinẹ, me ta ota kẹ wẹ.

¹⁷ Ọ de rhi si kẹrẹ, aye na da ta, Wẹ Joab? Ọ da kpahe, Mẹvwẹ ọye; Etiyin ọ da ta kẹ nyo ota rẹ ọmọtẹ wẹn, Joab da kpahe, Mi ro nyo.

¹⁸ Etiyin ọ da ta, Ayen je ta vwẹ akpọ rẹ avwanre, e ja ra nọ ekpẹn rẹ iroro vwẹ Ebẹl, kẹ ọtiọye ayen vwọ rhuẹrẹ ota.

¹⁹ Mẹvwẹ, ọvo vwẹ usun rẹ ihwo ri furu ri fuevun vwẹ Izrẹl na; wọ guọnọ guọghọ orere rọ dia oni vwẹ Izrẹl; die wo vwo mu uku rẹ Ọrovwohwo rọ?

²⁰ Joab da kpahe ọ da ta, Ọ dia omẹvwẹ-ẹ, ọ dia omẹvwẹ-ẹ, re me vwọ rọ yẹrẹ guọghọ?

²¹ Ọyena dia uyota-a. Ẹkẹvuọvo ọshare ọvo ro nẹ ugbenu rẹ Ifrem rhe, re se Sheba, ọmọ ri Bichri, ọye kpare obọ nẹ ọye hwe Devid rẹ ovie. Wa reyọ ọye ọvo rhe, ki mi si obọ nẹ orere na; Aye na da ta kẹ Joab, Nighere, e che phi uyovwi rọye wan enu rẹ igbẹhẹ na rhe we.

²² Etiyin aye na da vwẹ ẹghwanre bru ihwo rọye ejobi. Ayen de bru yovwi ri Sheba, rẹ ọmọ ri Bichri e de phio wan igbẹhẹ vrẹn kẹ Joab. Etiyin Joab de hworo owanre ayen da hrabọ nẹ orere na, dohwo duwevwi rọye da ra. Joab de rhivwi kpo Jerusalẹm bru ovie.

Inotu ri Devid

²³ Ọke yena Joab kọye sun otuofovwi rẹ Izrẹl ejobi; Benaiah rẹ ọmọ ri Jehoiada ọye ri sun Chẹrẹt kugbe Pẹlẹt.

²⁴ Adoram kọye ri suẹn ihwo vwo ru iruo ra gba ohwo ruẹ. Jehoshaphat ọmọ rẹ Ahilud ọye osiọbe;

²⁵ Sheva ki ji osiọbe. Zadọk kugbe Abiata kẹ irherẹn,

²⁶ Ira ri Jairi je orherẹn ri Devid.