2 Kọrẹnt 9 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

Rhiẹ abọ kẹ

¹ Asakiephana vwo kpahe arhọghọ re toro rhe ihwo efuanfon na, o rhe fo rere mi si ọbe rhe ovwa-an,

² kidie me riẹn omaẹcha rẹ ovwan, re me vwọ yan eyan kẹ ihwo ri Masidonia, tanẹ ihwo rẹ Akaya choma phihọ otọ rhawe ukpe rọ wanre na; oruru rẹ ovwan na da kpare udu rẹ ayen buebu.

³ Ẹkẹvuọvo mi ji imoni na cha rere eyan rẹ avwanre yan kpahe ovwan vwẹ ọnana vwo je ofefe ẹdia, rere ovwan vwọ choma, kirobo re me tanẹ ovwan ru;

⁴ o rha dia eriyi-in ihwo ri Masidonia evo de nene uvwe rhe re da mrẹ nẹ ovwan choma-a, oma da rha vo avwanre–ọ rha dia ọ re ovwan a ta na-a–kidie avwanre vwẹ ẹro so ovwan gangan.

⁵ Ọtiọye na mi rori nẹ o fori mi vwo ji imoni na bru ovwan rhe re me ke rhe, rere we toro arhọghọ na phihọ otọ kirobo rẹ ovwan veri na, rere ọ vwọ choma bẹsiẹye ọ dianẹ kirobo ra kanrhie mie ohwo-o ẹkẹvuọvo kirobo ra vwẹ ọhọrobọ rẹ ohwo kẹ.

⁶ Obo re me ta na na ohwo rọ kẹkẹ obọ kọn kọ je kẹkẹ obọ vun, ohwo ro rhie obọ kọn ko che vun buebu.

⁷ Ohwo ọvuọvo mi ru kirobo rẹ udu rọye dje kẹ, ọ dia ọ rẹ iguegu-u eyẹ ẹgbahọ-ọ, kidie Ọghẹnẹ guọnọ okẹ rẹ ivun avwerhe.

⁸ Ọghẹnẹ sa kẹ ovwan ebruphihọ kebruphihọ buebu, ọtioye na ku wo se vwo emu na ejobi okoka ro te kẹ wẹ ku wo je mrẹ siobọ nu buebu vwo ru iruo kiruo esiri.

⁹ Kirobo re siro, Ọ hrahrare reghereghe, ọ vwọ kẹ ivwiogbere, ọvwata rọye herọ rhiri bẹdẹ.

¹⁰ Ohwo rọ vwẹ ekankọn kẹ ọghwẹrẹ nẹ ọ kọn kugbe emuọre kẹ nẹ ọ re kọ je kẹ ọ me nẹrhẹ okọn rọye buphihọ ọ mi rhe ru orho rẹ ovwata wẹn buphihọ.

¹¹ Ku wo fe vwẹ idjerhe kidjerhe fiki rẹ obo ru wo siobọ nu buebu na, ra da wan oma rẹ avwanre vwẹ ẹkpẹvwẹ kẹ Ọghẹnẹ;

¹² kidie iruo nana ru we ruru na ọ dia ọkarovwẹ rẹ ihwo efuanfon na ọvo o fueri-i ẹkẹvuọvo ọ nẹrhẹ ẹkpẹvwẹ buebu bru Ọghẹnẹ ra.

¹³ Vwẹ oma rẹ ọdavwini rẹ iruo nana, kọye wọ wan vwẹ urinrin kẹ Ọghẹnẹ vwẹ oma rẹ ọghọ ru wọ vwọ reyọ iyẹnre esiri ri Kristi na, kugbe obọ wo rhie vwọ gba arhọghọ kẹ ayen vẹ ihwo efa ejobi;

¹⁴ kọye urhuru rẹ ayen vwo si ovwan re ayen vwọ nẹ ẹrhovwo kẹ ovwan, fiki rẹ ẹserọphẹ rẹ Ọghẹnẹ ro phoro emu ejobi rọ hẹ evun wẹ.

¹⁵ Ẹkpẹvwẹ kẹ Ọghẹnẹ fiki rẹ ẹse rọye rẹ unu se gbe-e.