2 Kọrẹnt 5 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

¹ Kidie avwanre riẹnre nẹ ọ da dianẹ a guọghọ utughẹ rẹ akpọ nana rẹ avwanre dia na, yẹ avwanre vwo uwevwi ọvo ro nẹ obọ rẹ Ọghẹnẹ rhe, ọ dia uwevwi ra vwẹ obọ bọ-ọn, ọ re rara vwẹ obo odjuvwu.

² Obonẹ dẹn avwanre da guan vẹ urhuru sivwe re vwo ku uwevwi rẹ odjuvwu na phihọ,

³ ọtiọye na e de kuọ phihọ nu avwanre gbe ban phihọ ọfa-a.

⁴ Kidie rẹ avwanre je vwọ hẹ utughe nana, yẹ avwanre fiọn unu ro ẹnwan; ọ dianẹ kẹ avwanre ban phihọ-ọ, ẹkẹvuọvo ke rhuo avwanre phihọ, ọtiọye na arhọ ko mu obo re dia ọ rẹ ugboma ro ghwẹ rọ.

⁵ Ohwo rọ rhuẹrẹ avwanre kẹ emu nana dẹn kẹ Ọghẹnẹ.

⁶ Ọtiọye na avwanre ki yivwaro kọke kọke; avwanre riẹnre nẹ rẹ avwanre vwọ hẹ uwevwi vwẹ ugboma na yẹ avwanre vẹ Ọghẹnẹ epha shesheri.

⁷ Kidie esegbuyota avwanre vwọ yan, ọ dia orẹmrẹ-ẹ.

⁸ Avwanre ki vwo omamọ rẹ aroeyivwo, avwanre ke yan shesheri jẹ ugboma na vwo re avwanre vẹ Ọrovwohwo ra dia uwevwi.

⁹ Owenẹ avwanre hẹ uwevwi eyẹ avwanre yan no, iruo rẹ avwanre rere avwanre vwo ru obo ri je.

¹⁰ Kidie avwanre na ejobi che mudia vwẹ obaro rẹ ekete rẹ ẹdjọeguo ri Kristi, ọtiọye na ohwo ọvuọvo kọ cha reyọ osa rẹ iruo rọ vwẹ ugboma rọye ru, owenẹ oyovwi eyẹ omiovwi.

Odibo ẹgbe rẹ Erhuarhuẹrẹ

¹¹ Vwẹ ọtiọye na, ra vwọ riẹn oshọẹdjẹ rẹ Ọrovwohwo na, kẹ avwanre riẹriẹ ihwo; ẹkẹvuọvo obo rẹ avwanre epha Ọghẹnẹ ọvo re riẹnre, mi phiẹrohọ nẹ udu rẹ ovwan je riẹn rhe.

¹² Ọ dianẹ kẹ avwanre rhoma jiri oma rẹ avwanre kẹ ovwa-an ẹkẹvuọvo me kẹ ovwan uphẹ rere ovwan sa vwẹ avwanre yan eyan, rere ovwan vwọ sa kpahe kẹ ayen otu re vwẹ ẹdia re mu ayen phihọ vwọ yan eyan yọ dianẹ udu rọye-e.

¹³ Ọ da dianẹ avwanre gbe riẹn oma rẹ avwanre-e, yẹ ọye ota rẹ Ọghẹnẹ; ọ da rha dianẹ iroro rẹ avwanre gbare, yẹ ọye ota rẹ ovwan.

¹⁴ Kidie ẹguọnọ ri Kristi ri sun avwanre, kidie o mu avwanre ẹro nẹ ohwo ọvo ghwu kẹ avwanre ejobi; vwẹ ọtiọye na ihwo na ejobi ghwu re.

¹⁵ Yo ghwu kẹ ihwo ejobi, rere ayen otu re herọ na vwo jẹ dia kẹ omobọ rayen ọfa ẹkẹvuọvo vwọ kẹ ohwo rọ vwi fiki rayen ghwu rọ da rhoma vrẹn.

¹⁶ Vwẹ ọtiọye na, kẹ etinẹ ara re, vwẹ ẹbẹre rẹ ohwo rẹ akpọ avwanre gbi se ohwo ọvuọvo gbe emu-u; dede na ọtiọye avwanre ji ji Kristi ese gbe emu vwẹ ẹbẹre rẹ ohwo rẹ akpọ, avwanre rha reyọ phihọ ọtiọye ọfa-a.

¹⁷ Vwẹ ọtiọye na, ọ da dianẹ ohwo hẹ evun ri Kristi, ohwo yena kẹ ẹma ọkpokpọ; ọ rẹ awanre wanvrẹn re, nighere ọkpokpọ na rhire.

¹⁸ Ọnana ejobi na obọ rẹ Ọghẹnẹ i nurhe, ohwo rọ wan oma ri Kristi rhuẹrẹ avwanre kugbe oma rọye ọ da kẹ avwanre odibo egbe rẹ erhuarhuẹrẹ;

¹⁹ Kọye hẹ, Ọghẹnẹ rọ hẹ evun ri Kristi rọ rhuẹrẹ akpọ na kẹ oma rọye, o roro urhiẹchọ rayen kẹ aye-en, o de phi ovuẹ rẹ erhuarhuẹrẹ na phihọ avwanre obọ.

²⁰ Ọtiọye na avwanre kẹ ihwo ri Kristi ji uwevwi, oma rẹ avwanre ọye Ọghẹnẹ wan vuẹ uwevwi na. Avwanre vwẹ odẹ ri Kristi rẹ ovwan, rere wa vẹ Ọghẹnẹ rhuẹrẹ kugbe.

²¹ Fiki rẹ avwanre ọye e vwo ruo vwọ dia oruimwemwu ohwo ro vwo umwemwu vwẹ oma-a, rere avwanre sa rhe wan oma rọye rhe dia ovwata rẹ Ọghẹnẹ.