2 Kọrẹnt 4 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

Efe re sinu vwẹ Ekuakua rẹ Ekpẹn

¹ Fiki re ọtiọye na, re avwanre vwo vwo odiboegbe nana vwẹ arodọvwẹ rẹ Ọghẹnẹ, avwanre gbe ro ẹnwa-an.

² Avwanre gba sen emu rẹ omaẹvuọ, rẹ idjerhe ri kini kini, avwanre gbi hworo aghwanre-e eyẹ vwẹ ota rẹ Ọghẹnẹ jọdẹ-ẹ, ẹkẹvuọvo vwẹ uyota na rẹ avwanre ta phia gbonozẹ na kọye avwanre vwọ vwẹ oma rẹ avwanre vwọ phia kẹ udu ri kohwo kohwo vwẹ obaro rẹ Ọghẹnẹ.

³ Ọ da tobọ dianẹ ke rhurhu iyẹnre esiri rẹ avwanre na, ye rhurhuro kẹ ayen otu re ghwọrọ fia ọvo.

⁴ Vwọ kẹ ayen edjọ rẹ akpọ nana rhu ẹro rẹ udu rẹ ihwo ri segbuyota-a, rere ayen vwo jẹ urhukpe rẹ iyẹnrẹ esiri rẹ urinrin ri Kristi na ẹmrẹ, ọye hẹ uhoho rẹ Ọghẹnẹ.

⁵ Kidie ọ dia oma rẹ avwanre avwanre ghwoghwo na-a, ẹkẹvuọvo Kristi avwanre ghwoghwo kerẹ Ọrovwohwo, avwanre ke rha vwẹ idibo rẹ ovwan fiki ri Jesu.

⁶ Kidie Ọghẹnẹ re tare nẹ, E jẹn urhukpẹ lo nẹ evun rẹ ebri rhe, ro lo mu udu rẹ avwanre ro vwo dje urhukpẹ rẹ erianriẹn rẹ urinrin rẹ Ọghẹnẹ vwẹ opharo ri Kristi.

⁷ Ẹkẹvuọvo avwanre vwo efe nana vwẹ evun rẹ ochẹ, ro vwo dje nẹ ọrho rọ basa-a na Ọghẹnẹ ọvo ri vworo ọ dianẹ kẹ ọ rẹ avwanre-e.

⁸ A lagha avwanre vwẹ idjerhe kidjerhe, ẹkẹvuọvo yẹ a pẹtiẹ avwanre-e; ofu dje avwanre, ẹkẹvuọvo ye siẹro nu-u;

⁹ e mu avwanre, yẹ ẹkẹvuọvo a sen avwanre-e; a ghwiẹ avwanre she, yẹ ẹkẹvuọvo a ghwọrọ avwanre-e;

¹⁰ avwanre ghwa ughwu ri Jesu vwẹ oma rẹ avwanre kẹdẹ kẹdẹ, rere arhọ ri Jesu vwọ phia vwẹ oma rẹ avwanre.

¹¹ Kidie rẹ avwanre vwọ hẹ akpọ na a vwẹ avwanre ze kẹ ughwu kọke kọke fiki ri Jesu, rere arhọ ri Jesu vwọ sa phia vwẹ ugboma rẹ avwanre ro ghwẹ na.

¹² Ọtiọye na ughwu ko ruẹ iruo vwẹ evun rẹ avwanre, ẹkẹvuọvo arhọ kọye rhe ruẹ iruo vwẹ evun rẹ ovwan.

¹³ Rẹ avwanre vwo vwo erhi ọvuọvo rẹ esegbuyota kirobo rẹ ohwo ro siri na vwori, Mi sere gbuyota, kẹ ọtiọye me je ta, avwanre ji segbuyota rhe, kẹ ọtiọye avwanre je ta,

¹⁴ vẹ ẹriẹn nẹ ọ rọ kpare Ọrovwohwo Jesu vrẹn na je cha kpare avwanre vi Jesu vrẹn ọ me reyọ avwanre vẹ ovwan vwọ rhe obaro rọye.

¹⁵ Kidie ọnana ejobi ki fiki rẹ ovwan, rere kerẹ ọtiobo rẹ ẹserọphẹ dje ebuo ebuo kẹ ihwo na rere ẹkpẹvwẹ vwo se bu, vwọ kẹ urinrin rẹ Ọghẹnẹ.

Esegbuyota ọye a vwẹ rhọ

¹⁶ Ọtiọye na avwanre gbe ro ẹnwa-an. Owenẹ ugboma rẹ avwanre vwọ ghwọrọ kufia dede, yẹ obo udu rẹ avwanre hẹ ọkpokpọ kẹdẹ kẹdẹ.

¹⁷ Kidie oma nana rẹ avwanre lagha vwẹ ọmọke na ọ rhuẹrẹ avwanre kpaha hẹrhẹ urinrin ro jeghwo ra sa mrẹ emu vwo dje-e.

¹⁸ Fikiridie avwanre rhẹro rẹ obo ra mrẹ-ẹ ẹkẹvuọvo ọ rẹ obo re jẹ mrẹ; kidie obo ra mrẹ eye obo re wanvrẹn, ẹkẹvuọvo obo re jẹ mrẹ na eye obo ri jeghwo.