2 Kọrẹnt 3 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

Ogbodibo rẹ Ọphọ Kpokpọ na

¹ Kẹ avwanre rha rhoma jiri oma rẹ avwanre? Eyẹ kẹ avwanre rha guọnọ, kirobo rẹ otu evo ruẹ, ọbe rẹ ejiro bru ovwan rhe, eyẹ vwo mie ovwan?

² Ekpuyovwi rẹ ovwan na hẹ ọbe rẹ ejiro, re siri phihọ udu rẹ ovwan, ra riẹnre rẹ ihwo ejobi seri;

³ ovwan dje phia nẹ ovwan hẹ ọbe ro nẹ obọ ri Kristi rhe rẹ avwanre vwọ kẹ ovwan, ra vwẹ amu si-i ẹkẹvuọvo vwẹ Erhi rẹ Ọghẹnẹ ro jeghwo na, ọ dia enu rẹ ọphapha rẹ oragha-a ẹkẹvuọvo vwẹ enu rẹ ophapha rẹ udu rẹ ihwo.

⁴ Ọtiọye udu rẹ avwanre wan oma ri Kristi vwo kpahe Ọghẹnẹ epha.

⁵ Ọ dianẹ kẹ avwanre te kẹ oma rẹ avwanre rẹ avwanre vwo ru emuọvo kẹ oma rẹ avwanre-e; ete rẹ avwanre obọ rẹ Ọghẹnẹ o nurhe.

⁶ Ohwo ro ru avwanre fo vwọ dia ogbodibo rẹ ọphọ ọkpokpọ na, ọ dianẹ vwẹ ọbe re siri-i ẹkẹvuọvo vwẹ evun rẹ Erhi na, kidie ọbe re siri na hwe ghwẹ, ẹkẹvuọvo Erhi na kẹ arhọ.

⁷ Asakiephana ọ da dianẹ ọke rẹ irueru rẹ ughwu, re si phihọ enu rẹ oragha, da rhe vẹ udidi rẹ ihwo rẹ Izrẹl gbi se ni opharo ri Mosisi-i fiki rẹ elo rọye, dede nẹ ọ phoriẹ.

⁸ Kẹ ogharọ rẹ Erhi na gbi vwo udidi rode rọ rho nọ ọtiọna?

⁹ Kidie ọ da dianẹ udidi hẹ ogharọ rẹ ughwu, ogharọ rẹ ọvwata kọ ma rho vwẹ udidi.

¹⁰ Uyota, vwẹ ọnana, obo ri vwo udidi jovwo gbi rhe vwo udidi kakaka-a, fiki rẹ udidi rọ rhonọ.

¹¹ Kidie obo re phoriẹ da rhe vẹ udidi, obo ri jẹphoriẹ kọye vwo udidi rode.

¹² Rẹ avwanre vwo vwo iphiẹrohọ ọtiọye na, avwanre ki vwo arueyivwo,

¹³ ọ gbe họhọ Mosis, rọ vwẹ oga rhurhu opharo rere ihwo rẹ Izrẹl vwo jẹ aphoro rẹ udidi rọye na ẹmrẹ-e.

¹⁴ Ẹkẹvuọvo udu rayen da gan, kidie rhi te nonẹ na, ọke re de se ọphọ rẹ awanre na, yẹ oga ọvuọvo na ji phi rhurhu ayen opharo, fikiridie vwẹ oma ri Kristi ọvo ọye a wan siono.

¹⁵ E, rhi te nonẹ na kọke kọke re de se Mọsis ya vwẹ oga na rhurhu udu rayen.

¹⁶ Ẹkẹvuọvo ọke re ohwọ de hirhe oma ku Ọrovwohwo na ke si oga na no.

¹⁷ Asakiephana Ọrovwohwo na hẹ Erhi na, asan rẹ Erhi rẹ Ọrovwohwo na epha, etiyin egbemọphẹ epha.

¹⁸ Avwanre ejobi, re vwẹ oga rhurhu opharo-o na, ri nẹ urinrin rẹ Ọrovwohwo na, e re kuẹ avwanre rhẹriẹ kpo uhoho rọye nẹ edje rẹ urinrin ọvo ra ro ọfa; kidie ọnana nẹ obọ rẹ Ọrovwohwo na rhe rẹ ọye ọvo hẹ Erhi na.