2 Kọrẹnt 2 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

¹ Kidie me tarọ phihọ udu mẹ kokoroko nẹ me gbe cha vwẹ udu rẹ ivuemiovwo bru ovwan cha ọfa-a.

² Kidie me da vwẹ ivuemiovwo mẹ phia kẹ ovwan, kono re rha he oboyi rọ nẹrhẹ oma vwerhe ovwẹ ọ je dia ovwan ọvo re me vwẹ ivuemiovwo bru rhe na?

³ Kọye mi vwo si ọbe kirobo ri mi ruru na, rere ọke re me da rhe mi vwo je ọdjarhe ẹmrẹ vwẹ abọ rẹ otu re me da mrẹ omavwerhovwẹ, kidie o mu vwẹ ẹro nẹ, aghọghọ mẹ re cha dia aghọghọ rẹ ovwan ejobi.

⁴ Kidie vwẹ evun rẹ ukpokpogho rode vẹ uvwerhe vwẹ udu kugbe oviẹ patapata mi vwo si ọbe rhe ovwan, ọ dianẹ rere ọ vwọ da ovwa-an ẹkẹvuọvo re e vwo je ovwan riẹn obo re me guọnọ ovwan gan te.

Evworhovwo kẹ Ohwo ro ru chọ

⁵ Ẹkẹvuọvo ọ da dianẹ ohwo ọvo re nẹrhẹ amrẹ ọdjarhe, ọ dia ọye re nẹrhẹ ovwẹ mrẹ-ẹ, ẹkẹvuọvo vwẹ idjerhe ọvo–me ghwa guọnọ sio ganga-an–ovwan ejobi ọ sorọ kẹ.

⁶ Kidie vwọ kẹ oghẹre rẹ ohwo ọtiọye ehwe nana rẹ otu hwere na te kẹ.

⁷ Vwẹ ọtiọye na ovwan ki vwo ghovwo re bro uche, eyẹ ọ rha dia ọtiọye-e uvweri rọ rho vrẹ oma vwo je hwe.

⁸ Ọtiọye na me re ovwan re we dje ẹguọnọ rẹ ovwan vwọ kẹ.

⁹ Kidie ọnana ye sorọ mi vwọ si ọbe, rere me vwọ davwẹ ovwan ni re me riẹn se ovwan se mu ọghọ vwi kemu kemu ejobi.

¹⁰ Ohwo re ovwan vwo ghovwo, yi mi ji vwo ghovwo rhe. Obo ri mi vwo ghovwo, ọ da dianẹ mi vwẹ emu ọvo ghovwo ohwo, yi ki fiki rẹ ovwan vwẹ obaro ri Kristi,

¹¹ re Idẹbono vwo jẹ asan ẹmrẹ da chọrọ obọ phihọ avwanre oma; kidie avwanre rha hẹ ogbori rẹ ọphiẹvwẹ rọye-e.

Ẹnwan Ẹruọ ri Pọl vẹ Ofuvwegbe Rọye

¹² Ọke ri mi vwo te Troas rhi ghwoghwo iyẹnrẹ esiri ri Kristi, ẹchẹ de rhie phihọ kẹ vwẹ vwẹ evun rẹ Ọrovwohwo;

¹³ ẹkẹvuọvo udu ko bru uvwe fikiridie me mrẹ Taitọs vwẹ etiyi-in. Ọtiọye na me yan jẹ ayen vwo mi de kpo Masidonia.

¹⁴ Ẹkẹvuọvo ẹkpẹvwẹ kẹ Ọghẹnẹ, rọ wan oma ri Kristi kẹ avwanre obọekparọ, vwẹ oma rẹ avwanre avwerhe rẹ eriariẹn rọye de rhi te asan ejobi.

¹⁵ Kidie avwanre hẹ ọnrhe ororo ri Kristi kẹ Ọghẹnẹ vwẹ ohri rẹ otu re sivwẹ rhọ kugbe ohri rẹ otu re ghwọrọ kuẹfia,

¹⁶ vwọ kẹ ọvo ọnrhe ororo nẹ ughwu kpo ughwu, vwọ kẹ efa ọnrhe ororo nẹ arhọ kpo arhọ. Kono ri teri ke imu nana?

¹⁷ Kidie avwanre rha họhọ ihwo buebu, re shẹ ota rẹ Ọghẹnẹ-ẹ; ẹkẹvuọvo kerẹ ihwo rẹ uyota, rẹ Ọghẹnẹ ji uwevwi, vwẹ obaro rẹ Ọghẹnẹ evun ri Kristi avwanre da ta ota na.