2 Kọrẹnt 12 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

Emramrẹ vẹ Ẹvwọphia ri Pọl

¹ Me sa yan eyan; yo vwo erere ọvuọvo ra mrẹ vwọ-ọ, ẹkẹvuọvo mi kpo abọ rẹ emramrẹ kugbe ẹvwọphia rẹ Ọrovwohwo na.

² Me riẹn ohwo ọvo vwi Kristi re muru kpo odjuvwu rerha kerẹ emu rẹ ikpe ihwẹne rọ wanre–sẹ ọ hẹ evun rẹ ugboma eyẹ o nẹ evun rẹ ugboma me riẹnre-e, Ọghẹnẹ riẹnre.

³ Me riẹnre nẹ e mu ohwo nana kpo Paradais–sẹ ọ hẹ evun rẹ ugboma eyẹ o nẹ evun rẹ ugboma me riẹnre-e, Ọghẹnẹ riẹnre–

⁴ o de nyo eta re se gbe-e, rẹ ohwo sa ta-a.

⁵ Vwẹ odẹ rẹ ohwo nana me vwọ yan eyan, ẹkẹvuọvo vwẹ odẹ mẹ me sa yan eya-an, jokpa rẹ ovwiẹre mẹ.

⁶ Dede me da guọnọ eyan yan, me rha dia ẹkpa-a, kidie uyota na kọye me ta. Ẹkẹvuọvo mi sioma no, vwẹ ọtiọye na ohwo gbi se roro uvwe rhuarho nọ obọ rọ mrẹ vwẹ oma mẹ eyẹ obo ro nyo mie vwẹ-e.

⁷ Rere mi vwo jẹ oma ẹkparọ kpenu nọ fiki rẹ ẹvwọphia buebu, a da vwẹ unwe duvwu uvwe, ikọn rẹ Idẹbono, rere o kpokpo uvwe, rere mi vwo jẹ oma ẹkparọ kpenu.

⁸ Asiarha soso me rẹ Ọrovwohwo kpahe ọnana, nẹ o sio nẹ uvwe oma;

⁹ ẹkẹvuọvo ọ da ta kẹ vwẹ, Ẹserọphẹ mẹ te kẹ wẹ, kidie vwẹ evun rẹ ovwiẹrẹ e de ru ogangan mẹ gba. Ke me ghọghọ san vwẹ evun rẹ ovwiẹrẹ mẹ, rere ogangan ri Kristi vwọ dia vwẹ oma.

¹⁰ Kidie fiki ri Kristi, ovwiẹrẹ mẹ ko te kẹ vwẹ, aroeyivwo, ọbẹnvwẹ, imu, kugbe okpetu; kidie ọke me vwọ hẹ ọvwiẹrẹ, etiyin me da gan oma.

Pọl ro ẹnwan kẹ Ishọshi ri Kọrẹnt

¹¹ Ekpa me epha jovwo! Ovwan ri bi vwe phihọ, kidie ovwan ejiri uvwe vẹrhe. Kidie me dia orharhe kakaka kẹ otu nana ri se oma iyinkọn na-a, dede na yi mi fi emuọvo-o.

¹² Eka rẹ omamọ rẹ ọyinkọn a vwẹ ayen phia vwẹ ohri rẹ ovwan vẹ odiri ejobi, vẹ eka kugbe igbunu kugbe iruo rẹ egba.

¹³ Kidie o vwo miovwi kẹ ovwan nọ ishọshi efa, jokpa nẹ ekpuyovwi mẹ dia oghwa kẹ ovwa-an? Vwẹ oruchọ nana ghovwo uvwe.

¹⁴ Ọna obọ rerha me choma mi che vwo bru ovwan cha. Me rha dia oghwa kẹ ovwa-an, kidie ọ dia emu rẹ ovwan me guọnọ-ọ ẹkẹvuọvo ekpuyovwi rẹ ovwan; kidie ọ dia emọ re kọn okọn kẹ esẹ vẹ ini-i, ẹkẹvuọvo esẹ vẹ ini re kọn okọn kẹ emọ rayen.

¹⁵ Me vwẹ aghọghọ ghwọrọ obo ri mi vwori ejobi fiki rẹ erhi rẹ ovwan. Ọ da dianẹ me nabọ guọnọ ovwan, kẹ ovwan rha guọnọ ovwẹ hanvwe nọ ọtiọye?

¹⁶ Ẹkẹvuọvo ekpuyovwi mẹ rha dia oghwa kẹ ovwa-an, yẹ ovwan tanẹ, mi ru ona, me vwẹ aghwanre ghwa ovwan ria.

¹⁷ Didi erere me mrẹ vwẹ oma rẹ ovwan vwẹ oma rẹ otu ri mi ji bru ovwan rhe?

¹⁸ Me vuẹ Taitọs nẹ ọ ra, mi de rhe ji oniọvo na vwọ ba. Taitọs mrẹ erere ọfa vwẹ oma rẹ ovwan? Ọ dia erhi ọvuọvo na avwanre vwo ru iruo? Ọ dia owọ ọvuọvo na avwanre jẹre?

¹⁹ Ku we roro rhabae rhe nẹ avwanre bru ocha cha oma rẹ avwanre kẹ ovwan? Obaro rẹ Ọghẹnẹ uyota avwanre ta vwi Kristi, ayen ejobi na ke ra vwọ kpọ ovwan vi, imoni.

²⁰ Oshọ mu uvwe nẹ ọkeọvo me da rhe me cha mrẹ ovwan kirobo re me guọnọre-e, yẹ ovwan je cha mrẹ vwẹ kirobo rẹ ovwan guọnọre-e; ọkeọvo yẹ ẹghwọ herọ, omaẹriọ, ophu, urhuru, ophọphọvwe, iguegu, omaephuo, kugbe ọyangha.

²¹ Oshọ mu uvwe nẹ ọke me da rhoma rhe Ọghẹnẹ mẹ gbe ru uvwe vwọ vwẹ oma kpotọ vwẹ obaro rẹ ovwan, ki mi rhe che muoma phihọ kẹ ayen otu buebu ri ru umwemwu jovwo yẹ ayen ji kurhẹriẹ nẹ ijẹfuọn, ọfaurhiẹ, kugbe ozighi rẹ ayen gbe.