2 Kọrẹnt 1 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

Uyere Vẹ Ẹkpẹvwẹ

¹ Pọl, ọyinkọn ri Kristi Jesu vwẹ ọhọre rẹ Ọghẹnẹ, kugbe Timoti oniọvo rẹ avwanre. Vwo rhe ishọshi rẹ Ọghẹnẹ rọ hẹ Kọrẹnt, vẹ ihwo efuanfon na ejobi re hẹ otọ rẹ Akaya ejobi:

² Ẹserọphẹ kugbe ufuoma ro nẹ obọ rẹ Ọghẹnẹ Ọsẹ rẹ avwanre kugbe Ọrovwohwo Jesu Kristi nene ovwan dia.

Pọl kpẹvwẹ Ọghẹnẹ ro vwo vrẹn nẹ Ukpokpogho nu

³ Ebruba kẹ Ọghẹnẹ kugbe Ọsẹ rẹ Ọrovwavwanre Jesu Kristi, Ọsẹ rẹ aruẹdọn kugbe Ọghẹnẹ rẹ uchebro,

⁴ ro bru avwanre uche vwẹ evun rẹ ukpokpogho ejobi, rere avwanre vwo se bru otu re hẹ ukpokpogho uche, vẹ uchebro rẹ Ọghẹne bru avwanre.

⁵ Kidie kirobo rẹ avwanre ji vwo obọ vwẹ ojẹriọ ri Kristi na, ọtiọye rhe vwẹ oma ri Kristi avwanre ji vwo obọ vwẹ uchebro rọye rhe.

⁶ Ọ da dianẹ avwanre hẹ ukpokpogho, yẹ fiki rẹ uchebro vẹ esivivo rẹ ovwan, ọ da dianẹ avwanre vwo uchebro, ye fiki rẹ uchebro rẹ ovwan, rẹ ovwan mrẹre vwẹ ọke rẹ ovwan vwo vwo odiri vwo chirako rẹ oja ọvuọvo rẹ ovwan rere.

⁷ Iphiẹrohọ re avwanre kpahe ọwe pha gbae; kidie avwanre riẹnre nẹ kirobo rẹ ovwan vwo obọ vwẹ ojẹriọ rẹ avwanre na, ovwan ji vwo obọ vwẹ uchebro rọye.

⁸ Kidie avwanre guọnọre nẹ ovwan dia ogbori-i, imoni, rẹ ukpokpogho rẹ avwanre mrẹre vwẹ Esha; kidie o mu avwanre oma gangan rọ da nẹrhẹ ofu dje avwanre.

⁹ Die, avwanre ki rori nẹ e brorhiẹ rẹ ughwu hwe avwanre nure, ẹkẹvuọvo ọyena ru avwanre rere avwanre vwo jẹ ẹro ẹvwọsuọ oma rẹ avwanre ẹkẹvuọvo Ọghẹnẹ rọ kpare irivwi vrẹn na;

¹⁰ ọ rọ sivwi avwanre nẹ ukpokpogho rẹ ughwu rode na, ko ji sivwi avwanre; ọye me phiẹrọhọ nẹ ọ je rhoma sivwi avwanre.

¹¹ Ovwan ke je vwẹ ẹrhovwo cha avwanre uko, rere buebu sa vwọ kpevwe fiki rẹ avwanre fiki rẹ ebruphihọ ra vwọ kẹ avwanre vwẹ ẹrhovwo rẹ avwanre buebu re nyori.

Pọl kpare Oyan rọye kpo obaro

¹² Kidie eyan rẹ avwanre kẹ ọna, iseri rẹ udu rẹ avwanre nẹ evun rẹ avwanre pha fuanfon vwẹ akpọ na, ọtiọye avwanie je fon evun kpahe ovwan, vẹ ẹfuọn kugbe uruemu esiri, ọ dianẹ kẹ aghwanre rẹ akpọ na-a ẹkẹvuọvo vwẹ ẹserọphẹ rẹ Ọghẹnẹ.

¹³ Kidie obo rẹ avwanre si rhe ovwan na ọye obo rẹ ovwan se se rọ sa ro ovwan, mi phiẹrohọ nẹ ọ sa rọ ovwan dẹn.

¹⁴ Kirobo rọ ro ovwan emerha na, rere ovwan vwọ sa vwẹ avwanre yan eyan kirobo rẹ avwanre je vwẹ ovwan yan eyan, vwẹ ẹdẹ rẹ Ọrovwohwo Jesu da rhe.

¹⁵ Fikiridie re ọnana vwọ mu vwẹ erọ na, me da guọnọ ke bru ovwan rhe jovwo, rere omavwerhovwẹ rẹ ovwan vwo dia ivẹ.

¹⁶ Me guọnọre nẹ me vwẹriẹ mrẹ ovwan ri mi de kpo Masidonia. Mi de rhe rhivwi nẹ Masidonia bru ovwan rhe ovwan ki rhe sun vwe wan idjerhe kpo Judia.

¹⁷ Ki mi vwo iroro ivivẹ re me vwọ guọnọ ru ọnana? Ke me gbẹn idjerhe nana kerẹ ohwo rẹ akpọ ghevweghe ro choma rọ vwọ tanẹ, E vẹ Ẹjo ẹsiẹvo?

¹⁸ Kirobo ro muẹro nẹ Ọghẹnẹ ohwo rẹ uyota, eta rẹ avwanre ta kẹ ovwan na dia eta ri E vẹ Ẹjo-o.

¹⁹ Kidie Ọmọ rẹ Ọghẹnẹ na, Jesu Kristi, re avwanre ghwoghwo vwẹ ohri rẹ ovwan na, Silvanọs kugbe Timoti kugbe omẹvwẹ, dia ihwo ri E vẹ Ejọ-o; ẹkẹvuọvo E ọvo re he evun rọye.

²⁰ Kidie ive rẹ Ọghẹnẹ ejobi vwẹ evun rọye E na ọvo re herọ. Kọye avwanre vwọ wan oma rọye ku Isẹ, vwọ ke urinrin rẹ Ọghẹnẹ.

²¹ Ẹkẹvuọvo Ọghẹnẹ rọ vwẹ owọ rẹ ovwan vẹ ọ rẹ avwanre muotọ vwẹ evun ri Kristi, kọye ji ji avwanre uwevwi na.

²² Ọ da ka oka rọye phihọ avwanre ọ de phi Erhi rọye phihọ udu rẹ avwanre kerẹ esarobọ.

²³ Ẹkẹvuọvo mi se Ọghẹnẹ nẹ o rhi se oseri kpahe ovwẹ–me guọnọ ghwọ ku ovwa-an ọye mi vwo je obo Kọrẹnt ẹcha.

²⁴ O dianẹ avwanre suẹn esegbuyota rẹ ovwa-an, avwanre nene ovwan ruẹ iruo fiki rẹ aghọghọ rẹ ovwan, kidie we mudia gan vwẹ esegbuyota rẹ ovwan.