1 Timoti 4 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

Arọẹmrẹ kpahe Eshe

¹ Asakiephana Erhi na tare phẹphẹ nẹ ukuko rẹ akpọ na vwobọ ihwo buebu che she nẹ esegbuyota na rẹ ayen da cha kerhọn rẹ erhi rẹ ophiẹvwe kugbe uyono rẹ efian rẹ idẹbono,

² fiki rẹ omeru rẹ evwọrefian rọ vwara muẹ ndu rẹ ayen kerẹ umomo rẹ ogun,

³ re djẹ ihwo orọvwe re tanẹ a gba emuọre rẹ Ọghẹnẹ mare nẹ otu ri segbuyota re riẹn uyota na re vẹ ẹkpẹvwẹ.

⁴ Kidie emu kemu rẹ Ọghẹnẹ mare yovwiri, o vwo obo ra gba vwọ-ọ ọ da dianẹ a rerọ vẹ ẹkpẹvwẹ;

⁵ kidie ota rẹ Ọghẹnẹ vẹ ẹrhovwo rọye ru ro fon nure.

Ogboedibo rẹ Oruiruo ri Kristi Jesu

⁶ Wọ de se yono imoni na imu nana, wẹ kẹ omamọ rẹ ogbeodiho ri Kristi Jesu, ra vwẹ ota rẹ esegbuyota na kugbe omamọ rẹ nyono na ghẹre kọye wo ji nene na.

⁷ Wọ kerhọn rẹ esia rẹ ekpa rẹ otu re riẹn Ọghẹnẹ-ẹ gbe-e. Vono oma wẹn phihọ nyoyovwi;

⁸ kidie rẹ cha ẹha vwo vwo eme erere na, uyoyovwi kọye me vwo erere vwẹ idjerhe kidjerhe, o vwo osa vwẹ akpọ nana nu o ki ji vwo osa vwẹ akpọ rọ cha.

⁹ Ota nana muẹro ro fori rẹ Ihwo nabọ reyọ.

¹⁰ Fiki rẹ onana avwanre vwọ wian rẹ avwanre vwọ pharha, fikiridiẹ avwanre phiẹrohọ Ọghẹnẹ ri bẹdẹ na, ọye hẹ Osivwi rẹ ihwo ejobi, marho kẹ ayen otu ri sere gbuyota.

¹¹ Ji urhi rere wo yono imu nana.

¹² E jẹn ohwo ọvuọvo ni we saka fiki rẹ obo wo vwọ hẹ omotete-e, ẹkẹvuọvo gba vwẹ oma wẹn ru oniru kẹ otu ri segbuyota na vwẹ ota vẹ uruemu, vwẹ ẹguọnọ, vwẹ esegbuyota, vwẹ ẹfuọn.

¹³ Bẹsiẹ re me vwọ rhe, wo mie se ọhe ofuanfon na, kugbe eghwoghwo rẹ ota na, kugbe uyono.

¹⁴ Wọ sian ọke ra vwọ kẹ wẹ na-a, ra vwọ kẹ wẹ vwẹ ọ rẹ aroẹmrẹ vwẹ ọke rẹ ekpako na vwọ ghwẹ abọ kpahe owẹ uyovwi.

¹⁵ Nabọ yono imu nana rere e reria owẹ oma, rere ihwo vwọ mrẹ erhuvwu rẹ iruo wẹn vughe.

¹⁶ Sẹro rẹ oma wẹn kugbe uyono wẹn; yọnre ọyena, kidie wo de ru ọtiọye ku wo sivwi oma wẹn kugbe ayen otu ri nyo we.