1 Tẹsalonaika 5 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

Choma Hẹrhẹ Ẹcha rẹ Ọrovwohwo na

¹ E nẹ na imoni, vwọ kpahe ọke na kugbe ẹghẹre na, o rhe fo rere mi si emu ọvuọvo rhe ovwa-an.

² Kidie ekpuyovwi rẹ ovwan riẹnre gbagba nẹ ẹdẹ rẹ Ọrovwohwo cha kerẹ oji vwẹ ason.

³ Ọke rẹ ihwo vwọ ta nẹ, Ufuoma kugbe ofuvwegbe he rọ, siẹvuọvo na ughwu mi rhi she teye ayen kpregede kerẹ aye rọ chuẹ uvwiẹ, o gbi rhe vwo ohwo rọ cha djẹ vabọ-ọ.

⁴ Ẹkẹvuọvo imoni, ovwan rha hẹ evun rẹ ebri-i, rẹ ẹdẹ na vwọ ro ovwan kpregede kerẹ oji.

⁵ Kidie ovwan ejobi kẹ emọ rẹ urhukpe kugbe emọ rẹ uvo; avwanre rha dia emọ rẹ ason eyẹ ebri-i.

⁶ Vwẹ ọtiọye na e gbi jẹ avwanre vwerhe, kerẹ otu ri chekọ na-a, ẹkẹvuọvo e gbe jẹ avwanre rhọvwọ rere a vwẹ ẹro kpẹn.

⁷ Kidie otu re vwerhẹ ason e vwọ vwerhẹ, otu rẹ idi rhe muẹ ke je vwẹ ason idi rhe vwo muẹ ayen.

⁸ Ẹkẹvuọvo, rẹ avwanre vwọ dia emọ rẹ uvo na, e gbe jẹ avwanre vwẹ ẹro kpẹn, rere wa vwẹ esegbuyota vẹ ẹguọnọ ru aghighọ ku phihọ, wa rha vwẹ esivwo ru erhu vwo tughẹ.

⁹ Kidie Ọghẹnẹ rhi avwanre kẹ ophu-u, ẹkẹvuọvo re vwo vwo esivwo vwẹ oma rẹ Ọrovwavwanre Jesu Kristi,

¹⁰ ohwo ro ghwu kẹ avwanre rere owẹnẹ avwanre vwerhẹ eyẹ avwanre rhọvwọre avwanre vẹ ọye vwọ sa dia.

¹¹ Vwẹ ọtiọye na ovwan gbe bru ohwohwo uche rere ovwan kpọ ohwohwo vi, kirobo rẹ ovwan ruẹ na.

Uchebro vẹ Uyere rọ ka Oba

¹² Imoni, avwanre rẹ ovwan, rere we mu ọghọ kẹ ihwo re wian owian vwẹ ohri rẹ ovwan re phihọ nẹ i sun ovwan ri yono ovwan.

¹³ Ovwan mu ayen kpenu, we tete ayen vwẹ evun rẹ ẹguọnọ vwi fiki rẹ iruo rayen. Ovwan yeri kugbe wurhie wurhie vwẹ ohri rẹ ovwan.

¹⁴ Imoni, avwanre bru ovwan uche, we bru ihwo ri gbe ufeti uche, yono otu rẹ oma rhọ, cha otu rẹ evwiẹre uko, chirako rẹ ayen ejobi.

¹⁵ We jẹn ohwo vwẹ umwemwu hwa osa rẹ umwemwu-u, ẹkẹvuọvo guọnọ emu esiri ru kẹ ohwohwo kugbe ihwo ejobi.

¹⁶ Ghọghọ kọke kọke.

¹⁷ Nẹ ẹrhovwo kẹdẹ kẹdẹ.

¹⁸ Ovwan kpẹvwẹ Ọghẹnẹ vwi kẹdia kẹdia rẹ ovwan epha ejobi; ọnana hẹ ọhọre rẹ Ọghẹnẹ vwẹ evun ri Kristi Jesu vwọ kẹ ovwan.

¹⁹ We fue Erhi rẹ Ọghẹnẹ rọ hẹ oma rẹ ovwa-an.

²⁰ Ovwan jẹ aroẹmrẹ fia-a.

²¹ Davwe emu kemu ejobi ni; churu obọ mu obo ri yovwiri,

²² siobọ nẹ emu ọbrabra kemu ọbrabra.

²³ E jẹ Ọghẹnẹ rẹ ufuoma vẹ ekpuyovwi rọye hworhẹ ovwan fon tototo; e jọ sẹro rẹ erhi vẹ ẹnwẹn kugbe oma rẹ ovwan ejobi rere o vwo jẹ abe evwo vwẹ ẹdẹ rẹ ẹcha rẹ Ọrovwavwanre Jesu Kristi.

²⁴ Ohwo ro se ovwan na ọvwata, ko se ruo gba.

²⁵ Imoni, wa rẹ kẹ avwanre.

²⁶ Wa vwẹ unu efiọnfiọn ọfuanfon yere imoni na ejobi.

²⁷ Mi duvwu iyori kẹ ovwan vwẹ odẹ rẹ Ọrovwohwo nẹ e se ọbe nana kẹ imoni na ejobi.

²⁸ Ẹserọphẹ rẹ Ọrovwavware Jesu Kristi nene ovwan dia.