1 Tẹsalonaika 2 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

Iruo ri Pọl vwi Tẹsalonaika

¹ Kidie ovwan ghwrara riẹnre, imoni, nẹ oyan rẹ avwanre yan bru ovwan rhe rha dia odiodi-i;

² ẹkẹvuọvo kirobo rẹ ovwan riẹnre avwanre reoja rẹ ehwe kugbe ophọphọvwe vwi Filipae, Ọghẹnẹ je kẹ avwanre aroeyivwo rẹ avwanre vwo ghwoghwo iyẹnrẹ esiri rẹ Ọghẹnẹ na vwẹ evun rẹ ukpokpogho rode.

³ Kidie uyono rẹ avwanre ghwa rhe dia ọchọchọ-ọ eyẹ ọ rẹ ijefuọ-ọn, eyẹ ọ rẹ ophiẹvwe-e.

⁴ Ẹkẹvuọvo kirobo rẹ Ọghẹnẹ sanọ avwanre reyọ na rọ da vwẹ iyẹnrẹ esiri na gba avwanre obọ na, kẹ ọtiọye avwanre ghwoghwo, ọ dianẹ re o vwo je ihwo-o, ẹkẹvuọvo ro vwo je Ọghẹnẹ rọ davwa udu nẹ.

⁵ Kirobo rẹ ovwan riẹnre avwanre bru avwavwe phihọ ota na-a, eyẹ avwanre ku ewun rẹ urhuru rhurhu oma-a, Ọghẹnẹ hẹ iseri rẹ avwanre.

⁶ Avwanre guọnọ ejiro rẹ ihwo-o, avwanre guọnọ ejiro rẹ ovwan vwo siẹvo kẹ ihwo efa-a, dede na avwanre sa nọ ekpẹn rẹ ẹghẹrẹ kerẹ iyinkọn ri Kristi.

⁷ Ẹkẹvuọvo avwanre ruru dẹndẹn vwẹ ohri rẹ ovwan, kerẹsiẹ rẹ ọmiọvwọ a da ghẹrẹ emọ rọye.

⁸ Ọtiọye na, fiki rẹ ivun avwerhe ri mi vwo kẹ ovwan, avwanre choma rẹ avwanre vwọ ghare ọ dia iyẹnrẹ esiri rẹ Ọghẹnẹ na ọvo-o, ẹkẹvuọvo ekroma rẹ avwanre dede, kidie ovwan rhe ghare kẹ avwanre gangan.

⁹ Imoni, ovwan karohọ owian rẹ avwanre kugbe oma elagha rẹ avwanre; obo rẹ avwanre wian te ason te uvo, rere avwanre vwo jẹ oghwa ẹdia kẹ ovwan, vwẹ ọke rẹ avwanre de ghwoghwo iyẹnrẹ esiri rẹ Ọghẹnẹ na kẹ ovwan.

¹⁰ Ovwan hẹ iseri, Ọghẹnẹ je hẹ iseri rhe, obo rẹ avwanre fon te, dia ovwata te, ri jẹ abe ẹriọ te vwẹ uruemu rẹ avwanre kẹ ovwan otu ri segbuyota;

¹¹ kidie ovwan riẹn obo, rẹ ọsẹ vẹ emọ rọye yerẹ, ọtiọye avwanre yono ovwan ọvuọvo bru ovwan uche dje kẹ ovwan.

¹² Avwanre rẹre rere eyere rẹ ovwan se vwo she phihọ kerẹ emọ rẹ Ọghẹnẹ re se rhe re uvie robọ rọye kugbe urinrin rọye.

¹³ Avwanre ke kpẹvwẹ Ọghẹnẹ kọke kọke fiki rẹ ọnana, nẹ ọke rẹ ovwan vwọ reyọ ota rẹ Ọghẹnẹ na ru we nyo miẹ avwanre na, ovwan reyerọ kerẹ ota rẹ ohwo rẹ akpọ-ọ ẹkẹvuọvo ovwan da reyọ kirobo rọ epha dẹn, ota rẹ Ọghẹnẹ, ro ruẹ iruo vwẹ oma rẹ ovwan otu ri sere gbuyota.

¹⁴ Kidie vwọ kẹ ovwan, imoni, wa da vwẹ ẹro kere ishọshi rẹ Ọghẹnẹ rọ hẹ obi Judia vwẹ evun ri Kristi Jesu; kidie ovwan je reoja rẹ emu ọvuọvo na vwẹ obọ rẹ ihwo rẹ orho rẹ ovwan kirobo rẹ ayen je re vwẹ obọ rẹ ihwo ri Ju,

¹⁵ ri hwe okpuyovwi rẹ Ọrovwohwo Jesu kugbe emraro na, ayen da djẹ avwanre kufia ayen de gbe Ọghẹnẹ ku ayen da vwọ so ihwo ejobi.

¹⁶ Ayen da dje avwanre nẹ a gbe ta ota kẹ otu ri Keferi-i ayen da rha rhọ–ọtiọye na kọke kọke kọye ukoko rẹ umwemwu rayen vwọ vọn. Ẹkẹvuọvo ophu rẹ Ọghẹnẹ rhe tua kpahe ayen vwẹ ukuko na re.

Pọl guọnọre nẹ Ọye Rhoma re Mrẹ Ishọshi na

¹⁷ Ẹkẹvuọvo imoni, re vwo mu avwanre phihọ uwodi jẹ ovwan vwo na, vwẹ ọmọke krẹ na, vwẹ ugboma ọ dia erhi-i na, avwanre ke ro ẹnwan, urhuru rẹ ovwan ko siẹ avwanre rẹ avwanre vwọ mrẹ ohwohwo opharo.

¹⁸ Fikiridie avwanre guọnọ rhe oboyi rhe mrẹ ovwan–oma kọ mana ovwẹ, ri Pọl, kọke kọke–ẹkẹvuọvo Idẹbono kọye hẹ ukọn rọ da avwanre ji.

¹⁹ Kidie hẹ iphiẹrohọ rẹ avwanre, eyẹ aghọghọ rẹ avwanre eyẹ erhu rẹ uvie rẹ avwanre vwọ yan eyan vwẹ ọbara rẹ Ọrovwavwanre Jesu vwẹ ẹcha rọye? Ọ rha dia ovwan na-a?

²⁰ Kidie ovwan na hẹ eyan rẹ avwanre vẹ aghọghọ rẹ avwanre.