1 Samuẹl 22 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

¹ Devid da djẹ nẹ Etiyin o de rhi te ẹmwa rẹ Adulam; ọke rẹ iniọvo rọye vẹ uwevwi rẹ ọsẹ rọye vwo nyo, ayen de bro kpo etiyin.

² Kohwo kohwo rọ hẹ ukpokpogho, kohwo kohwo rọ re esa, kugbe kohwo kohwo rẹ ofu djeri, da ghwiẹ bro ra; ọda rhe dia onotu rẹ ayen. Ihwo ri nenire joma te ujori ẹne.

³ Devid da yan nẹ etiyin kpo Mizpeh ri Moab; ọda ta kẹ ovie ri Moab, Biko jẹn ọsẹ mẹ vẹ oni mẹ nene uwe dia, bẹsiẹ me vwọ riẹn obo rẹ Ọghẹnẹ che ru kẹ vwẹ.

⁴ Ọda yan jẹ ayen vwo kẹ ovie ri Moab, ayen da dia etiyin vwẹ ọke na ejobi ri Devid dia evun rẹ ẹmwa na.

⁵ Etiyin ọmraro na Gad da ta kẹ Devid, Wọ dia evun rẹ ẹmwa na-a; vrẹn nẹ etiyin, re wo kpo otọ ri Juda. Etiyin Devid de vrẹn, ọ da yanran kpo egbo ri Hẹrẹt.

Sọl hwe irherẹn ri Nọb

⁶ Asakiephana Sọl de rhe nyo nẹ a mrẹ Devid, kugbe ihwo re vẹ ọye gba herọ. Yi Sọl tidia vwi Gibeah, vwẹ otọ rẹ oghriki vwẹ enu rẹ ugbenu, vẹ ubiri rọye vwẹ obọ, idibo rọye ejobi de mudia riariẹ phihọ.

⁷ Sọl da ta kẹ idibo rọye ri mudia riariẹ phihọ na nẹ, We nyo, ovwan ihwo ri Bẹnjamin; kẹ ọmọ ri Jesse na sa kẹ ovwan ọvuọvo idju kugbe egba ri vain, kọ je vwẹ ovwan mu inotu rẹ uriori kugbe inotu rẹ ujori,

⁸ rẹ ovwan ejobi vwọ jẹ iroro kugbe vwọ so vwẹ? Ohwo ọvuọvo rha ta kẹ vwẹ ọke rẹ ọmọ mẹ vẹ ọmọ ri Jesse vwo se umẹ-ẹ ohwo ọvuọvo rha herọ ro vwerhe kẹ vwẹ-ẹ eyẹ vwọ phia kẹ vwẹ nẹ ọmọ mẹ kọye ta kẹ odibo mẹ nẹ ọ vwọ so vwẹ, rọ ra hwaphihọ hẹrhẹ ovwẹ, kirobo rọ epha nonẹ na.

⁹ Etiyin Doẹg ohwo rẹ Edọm na, ro mudia kẹrẹ idibo ri Sọl na, da kpahe, Me mrẹ ọmọ ri Jesse rọ rhe Nọb, bru Ahimẹlẹk rẹ ọmọ rẹ Ahitọb,

¹⁰ o de duotọ rẹ emu vwẹ obọ rẹ Ọrovwohwo kẹ, ọ da ghwẹ emuọre kẹ, ọ da vwẹ ọlọkọ ri Golayat ohwo ri Filistia na vwọ kẹ.

¹¹ Etiyin ovie na de ji ohwo re se Ahimẹlẹk rẹ orherẹn na, ọmọ rẹ Ahitọb, kugbe uwevwi rẹ ọsẹ rọye ejobi, irherẹn na ri Nọb; ayen ejobi de bru ovie rhe.

¹² Sọl da ta, Nyo Asakiephana, ọmọ rẹ Ahitọb. ọ da kpahe Mẹvwẹ na, ọrovwovwe.

¹³ Sọl da ta kẹ, Die wọ vwọ ta vwẹ phihọ, wẹ kugbe ọmọ ri Jesse, kidie wọ vwẹ ikara kẹ kugbe ọlọkọ, we de rhe duotọ rẹ emu vwẹ obọ rẹ Ọghẹnẹ kẹ, rere ọ mrasan vwọ so vwẹ, rere ọ hwa phihọ hẹrhẹ ovwẹ, kirobo rọ epha nonẹ na?

¹⁴ Ahimẹlẹk da kpahe kẹ ovie na, Kono vwẹ usun rẹ idibo wẹn na re dia ọvwata kerẹ Devid, rẹ ọgọ rẹ ovie, kugbe onotu rẹ ihwo re rhẹrẹ owẹ, ra vwẹ ọghọ kẹ vwe uwevwi wẹn?

¹⁵ Ki nonẹ mi ru duotọ rẹ emu vwẹ obọ rẹ Ọghẹnẹ kẹ? Ẹjo! Ẹ jẹn ovie roro iroro kpahe odibo rọye-e eyẹ uwevwi rẹ ọsẹ mẹ ejobi-i; kidie odibo wẹn riẹn emuọvo vwẹ ọnana ejobi-i, kaka kọ kọnro.

¹⁶ Ovie da ta, Wọ ghwu họ, Ahimẹlẹk, wẹ kugbe uwevwi rẹ ọsẹ wẹn ejobi.

¹⁷ Ovie na da ta kẹ ihwo re rhẹrẹ ekpuyovwi rọye, Rhẹriẹ oma ru we hwe irherẹn rẹ Ọrovwohwo na; kidie ayen vẹ Devid obọ, ayen je riẹn nẹ ọ djẹre, yẹ ayen vuẹ vwẹ-ẹ. Ẹkẹvuọvo idibo rẹ ovie na rhe se yivwẹ hwe irherẹn rẹ Ọrovwohwo na-a.

¹⁸ Etiyin ovie da ta kẹ Doẹg, Kuoma rhẹriẹ re wo hwe irherẹn na. Doẹg rẹ ohwo rẹ Ẹdom na kuoma rhẹriẹ o de hwe irherẹn na, vwẹ ẹdẹ yena o de hwe ihwo ujọne gbẹ iyori ri ku ibuluku phihọ.

¹⁹ Nọb, rẹ orere rẹ irherẹn na, o de hwere; te eshare te eya, imitete vẹ emeboba ri vie evie, te irhuẹn, te ekẹtẹkẹtẹ, te igegede, ọ da vwẹ ọlọkọ hwe ayen.

²⁰ Ẹkẹvuọvo ọmọ rẹ Ahimẹlẹk ọvo rẹ ọmọ rẹ Ahitọb, re se Abiata, da dje vabọ ọ de bru Devid ra.

²¹ Abiata da ta kẹ Devid nẹ Sọl hwe irherẹn rẹ Ọrovwohwo na.

²² Devid da ta kẹ Abiata, Me riẹnre vwẹ ẹdẹ yena, ri Doẹg rẹ ohwo rẹ Edọm vwọ hẹ etiyin, nẹ ọ che ji Sọl ẹvuẹ-ẹ. Mẹvwẹ re so ughwu rẹ ihwo rẹ uwevwi rẹ ọsẹ wẹn na ejobi.

²³ Nene uvwe dia, wọ djẹ oshọ-ọ, kidie ohwo rọ guọnọ ovwẹ hwe yọ guọnọ owẹ hwe rhe; obọ mẹ ọye wọ da rhọ.