1 Samuẹl 21 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

Devid mrẹ Sọl djẹ

¹ Etiyin Devid de bru Ahimẹlẹk rẹ orherẹn na rhe, vwi Nob; Ahimẹlẹk da rhe vwa Devid yọ phariẹ, ọ da ta kẹ, Wẹ ọvo rhere, ohwo ọvuọvo rhe nene we-e

² Devid da ta kẹ Ahimẹlẹk rẹ orherẹn na, Ovie vuẹ vwẹ ota ọvo, ọ da ta kẹ vwẹ nẹ, Wo jẹn ohwo ọvuọvo riẹn obo re me vuẹ wẹ na ri mi ji urhi rọye kẹ wẹ na-a. Me ta kẹ ivwighrẹ evo nẹ e rhe vwa vwẹ asan ọtiọna.

³ Asakiephana, die ri rhe we vwẹ obọ? Kẹ vwẹ ikara iyori, eyẹ obo ri te we obọ vwẹ etinẹ ejobi.

⁴ Orherẹn na da ta kẹ Devid, mi vwo ikara gheghe-e, ẹkẹvuọvo ikara ọfuanfon herọ; takpe nẹ imighele na kẹnẹ oma kẹ eya.

⁵ Devid da kpahe kẹ orherẹn na, Vwẹ ọ rẹ uyota avwanre kẹnẹ oma kẹ eya kirobo mi ruẹ vwẹ ọke re me da kpare ofovwi; ekuakua rẹ imighele na pha fuanfon, dede na yẹ oyan gheghe avwanre ra; kẹ inonẹ na ọye ekuakua rayen jẹfuọn?

⁶ Etiyin orherẹn na da kẹ ayen ikara ọfuanfon na; kidie ikara ọfa hẹ etiyin-n jokpa rẹ ikara rẹ opharo, re si nẹ obaro rẹ Ọrovwohwo na rhe, re vwo wene ikara re tuabọ re sino vwẹ ẹdẹ yena.

⁷ Vwẹ ọke yena odibo ri Sọl ọvo hẹ etiyin vwẹ ẹdẹ yena, ra daji vwẹ obaro rẹ Ọrovwohwo; odẹ rọye Doẹg ohwo rẹ Edọm, ọye olori rẹ isuigegede ri Sọl.

⁸ Devid da ta kẹ Ahimẹlẹk, Wo ji vwo ubiri eyẹ ọlọkọ vwẹ obọ? Kidie me ghwa ọlọkọ-ọ eyẹ ekuakua ọfa nene oma-a, kidie ovuẹ rẹ ovie na ọ rẹ okpakpa.

⁹ Orherẹn na da ta, Ọlọkọ ri Golayat rẹ ohwo ri Filistia, ru wo hweri vwẹ iyara rẹ Elah na, nighe, a phaero phihọ amwa vwẹ obuko rẹ adagba rẹ ibuluku na; wọ da sa reyọ ọyena, gba reyọ, kidie ọfa gbe hẹ etinẹ-ẹ jokpa rẹ ọyena ọvo. Devid da ta, Ọfa rha họhọ ọyena ọruẹ; vwọ kẹ vwẹ.

¹⁰ Devid de vrẹn ọ da djẹ vwẹ ẹdẹ yena nẹ obọ ri Sọl, o de bru Akish ovie ri Gat.

¹¹ Idibo rẹ Akish da ta kẹ, Ọnana dia Devid ovie rẹ otọ na? Ayen ohwohwo rha vwọ suine kẹ ohwo ohwo vwo gbe cha nẹ, Sọl hwe uriori, Devid hwe uriori ihwe?

¹² Devid de roro eta na vwẹ udu rọye, oshọ rẹ Akish ovie ri Gat de muo gangan.

¹³ Ọtiọye na o de ghwe ku uruemu rọye rhẹriẹ vwẹ irharo rẹ ayen, o de ru kerẹ ohwo rọ mwa orhuẹ, ko siẹ eravwọ phihọ ẹchẹ rẹ anurhoro na, ko bo enya kuẹ ẹtuegba rọye.

¹⁴ Etiyin Akish da ta kẹ idibo rọye, Nighe, ohwo nana mwa orhuẹ; kidie wo vwọ reyọ rhe vwe?

¹⁵ Ihwo re mwa orhuẹ kare ovwẹ, re wa vwọ reyọ ohwo nana vwọ rhe rere ọ rhe kọrẹbe vwẹ irharo mẹ? Orharhe rẹ ohwo nana ro uwevwi mẹ?