1 Pita 5 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

Igode rẹ Ọghẹnẹ na

¹ Vwẹ ọtiọye na mi bru ekpako re hẹ ohri rẹ ovwan uche, kidie okpuyovwi mẹ je vwẹ okpako kugbe oseri rẹ oja ri Kristi kugbe ohwo ro ji vwo obọ vwẹ urinrin ra cha vwọ phia na.

² Ghẹrẹ uchuru rẹ Ọghẹnẹ ra vwọ kẹ wẹ yọnre na, ọ dia ọ rẹ ẹgbahọ-ọ ẹkẹvuọvo ọ ro nẹ udu rhe, ọ dianẹ ra vwọ mrẹ erere rẹ omaẹvuọ-ọ ẹkẹvuọvo re ruo vẹ evun phephẹn,

³ Ọ dianẹ ke do ku ayen otu ra vwọ kẹ wẹ yọnre na-a ẹkẹvuọvo dia oniru kẹ uchuru na.

⁴ Ọke rẹ onotu rẹ Osuigegede na da cha phia ku wo vwo erhu rẹ urinrin ro jẹphoriẹ.

⁵ Ọtiọye rhe ovwan imighene na wa vwẹ oma kpotọ kẹ ekpako na. Vwẹ omaevwokpotọ ru amwa vwo rhuo ohwohwo, ovwan ejobi, kidie Ọghẹnẹ muẹkpahe otu ri herẹ, ẹkẹvuọvo erhuvwu kẹ ohwo ro ruẹ dẹndẹn.

⁶ Vwẹ ọtiọye na vwẹ oma wẹn kpotọ kẹ obọ, ọgangan rẹ Ọghẹnẹ, rere vwẹ ọke ro fori kọ kpare owẹ kpenu.

⁷ Vwẹ ẹnwan wẹn ejobi vwọ ya, kidie ọye re vwẹ ẹro te we.

⁸ Jẹn ẹro hiẹ wẹ, rhẹrẹ. Ukọn wẹn idẹbono na ọ rọ rhẹrẹ kerẹ okpohrokpo rọ guan, ro guọnọ obo rọ rọ.

⁹ Hirhe aro kuo, mudia gan vwẹ esegbuyota wẹn, ovwan riẹn imoni rẹ ovwan re hẹ akpọ na duvwu na je reoja buebu ọtiọye.

¹⁰ Ọke rẹ ovwan da reoja nu emerha, Ọghẹnẹ rẹ ẹserọphẹ ejobi, ro se ovwan rhe urinrin rọye ri bẹdẹ na vwi Kristi, okpuyovwi rọye kọ rhoma vọn, kọ vwẹ owọ rẹ ovwan muotọ, kọ kẹ ovwan ogangan.

¹¹ Kọye ri vwo isuesun bẹdẹ bẹdẹ. Isẹ.

Uyere rọ ka oba

¹² Mi si ọbe nana krẹkrẹ vwọ kẹ Silvanọs, oniọvo ro segbuyota kirobo me reyerọ phihọ, nẹ vwo rhe ovwan, mi bru ovwan uche me ta kẹ ovwan nẹ ọnana hẹ ẹserọphẹ rẹ Ọghẹnẹ; mudia gan vwẹ evun rọye.

¹³ Aye rọ hẹ obo Babilọn, ra je jẹreyọ na, ne yere ovwan; eriyin ji te ọmọ mẹ Mak.

¹⁴ Vwẹ unuẹfiọnfiọn rẹ ẹguọnọ yere ohwohwo. Ufuoma kẹ ayen ejobi re herọ vwi Kristi.