1 Kọrẹnt 9 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

Ẹkẹ ro te Iyinkọn

¹ Me dia ọmuvwiẹ? Me dia ọyinkọ? Mi rhie ẹro mrẹ Ọrovwohwo Jesu? Ovwan dia iruo rẹ abọ mẹ vwẹ oma rẹ Ọrovwohwo?

² Ọ da dianẹ me rha dia ọyinkọn kẹ ihwo efa-a, yo mẹvwẹ ọyinkọn rẹ ovwan; kidie ovwan hẹ oka rẹ ọyinkọn mẹ vwẹ evun rẹ Ọrovwohwo.

³ Ọnana kọye hẹ ẹdjọ mẹ kẹ otu re vwẹ ovwẹ guẹdjọ.

⁴ Avwanre rhe vwo ogangan rẹ emuọre vẹ udi?

⁵ Avwanre rhe vwo ogangan ra vwọ reyọ aye nene oma, kirobo rẹ iyinkọn efa kugbe imoni rẹ Ọrovwohwo na kugbe Kẹfas ruẹ?

⁶ Eyẹ kẹ Banabas kugbe ekpuyovwi mẹ ọvo ri jẹ owian ẹwian re ke re emu?

⁷ Didi isodje re vwẹ igho rẹ obọ rọye phiẹ ofovwi? Ono ri voro udju nu ro de jẹ emu rọye ẹriọ? Ono ri churu igegede ro de jẹ ame rẹ ivie rọye ẹda?

⁸ Ke me ta ọnana vwẹ ogangan rẹ ohwo rẹ akpọ? Urhi na rha je ta ota ọvuọvo na?

⁹ Kidie e siro vwẹ urhi ri Mosis nẹ, Wa gba unu rẹ erhuẹn vwẹ ọke ro de chiyi ọka-a. Kẹ erhuẹn re ma ro Ọghẹnẹ ẹnwan?

¹⁰ Ọ dia fiki rẹ avwanre ejobi ọ vwọ ta na? E siro fiki rẹ avwanre, rere ohwo ro voro vwo voro vwẹ iphiẹrohọ rere ohwo ro chiyẹ vwo chiyi vẹ iphiẹrohọ nẹ ọye je re vwẹ emamọ na.

¹¹ Ọ da dianẹ avwanre kọn ekuakua rẹ erhi vwẹ ohri rẹ ovwan, ko bunọ rẹ avwanre da rha re emu rẹ ovwan?

¹² Ihwo efa de vwo ogangan re vwọ re emu rẹ ovwan, ọ rẹ avwanre rha rhonọ ọtiọye? Dede na, avwanre gbobọnyẹ uphẹ nana, ẹkẹvuọvo avwanre de chiri kemu kemu rere avwanre vwo jẹ ukọn e phio phihọ idjerhe rẹ iyẹnrẹ esiri ri Kristi.

¹³ Ovwan rha riẹn nẹ otu ra reyọ phihọ iruo rẹ uwevwi rẹ ẹga na je vwẹ evun rẹ uwevwi na ayen da ria emu rayen, nẹ otu re gọ iye vwẹ enu rẹ agbada na je ria vwẹ emu ra vwọ gọ iye na?

¹⁴ Vwẹ idjerhe ọvuọvo na, Ọrovwohwo vwo ji urhi nẹ otu ri ghwoghwo iyẹnrẹ esiri na je re vwẹ enu rẹ iyẹnrẹ esiri na.

¹⁵ Ẹkẹvuọvo me vwẹ ogangan nana ọvuọvo ru emu-u, eyẹ ki mi siọbe nana rere a vwẹ emu rhe vwe-e. Kidie oyoma re mi ghwu nọ rẹ ohwo de miovwi obo re me vwọ yan eyan na.

¹⁶ Kidie mi de ghwoghwo iyẹnrẹ esiri na, ọyena dia obo re sorọ me vwọ yan eya-an. Kidie a gbarọ mu vwẹ. Ekan kẹ vwẹ ọ da dianẹ mi ghwoghwọ iyẹnrẹ esiri na-a!

¹⁷ Ọ da dianẹ ọhọrobọ mẹ mi vwo ruo, ki mi vwo osa; ẹkẹvuovo ọ rha dia ọhọrobọ mẹ-ẹ, ọye kẹ uwevwi re ji vwe.

¹⁸ Kidie hẹ osa mẹ? Kọye hẹ ọna; nẹ mi de ghwoghwo iyẹnrẹ esiri na mi mie ohwo ọvuọvo igho-o, kọye hẹ uche obo ri mi muru jovwo mi gbobọnyẹ fiki rẹ erhuvwu rẹ iyẹnrẹ esiri na.

¹⁹ Kidie dede nẹ me dia ọviẹn rẹ ohwo ọvuọvo-o na, ye me vwẹ oma mẹ ru ọviẹn kẹ ihwo ejobi, rere mi vwo se ku ihwo buebu rhẹriẹ.

²⁰ Me vwẹ oma ru ohwo ri Ju, rere mi vwo se ku ihwo ri Ju rhẹriẹ; mi phi oma mẹ phihọ otọ rẹ urhi vwọ kẹ ihwo re hẹ otọ rẹ urhi–dede na yẹ ekpuyovwi mẹ hẹ otọ rẹ urhi-i, rere mi vwo ku otu re hẹ otọ rẹ urhi rhẹriẹ.

²¹ Vwọ kẹ ihwo rẹ hẹ otọ rẹ urhi-i mi de ru oma mẹ kerẹ ohwo rọ hẹ otọ rẹ urhi-i, ọ dianẹ kẹ otọ rẹ urhi rẹ Ọghẹnẹ mi jẹ dia-a ẹkẹvuọvo otọ rẹ urhi ri Kristi– rere mi vwo ku ihwo ri jẹ otọ rẹ urhi ẹdia rhẹriẹ.

²² Me vwẹ oma ru ọvwiẹre kẹ otu rẹ evwiẹre, rere mi vwo se ku otu rẹ evwiẹre rhẹriẹ. Mi rhi hirhe phihọ emu ejobi kẹ ihwo ejobi, rere mi se vwo sivwi otu evo.

²³ Mi ru ayen ejobi fiki rẹ iyẹnrẹ esiri na, rere mi vwo se vwo ẹkẹn vwẹ ẹrhovwo rọye.

²⁴ Ovwan rha riẹn nẹ vwẹ evun rẹ onẹdjẹ ihwo na ejobi re djẹ, ẹkẹvuọvo ohwo ri vwo osa vwọ? Ọtiọye na gba djẹ rere wo vwo vwo osa.

²⁵ Ọdjonẹ kọdjonẹ nyẹ oma vwi kemu kemu ejobi. Ayen nyẹ oma rere ayen vwo vwo erhu rẹ ivwrevwre rọ ghwọrọ, ẹkẹvuọvo vwọ kẹ avwanre kẹ erhu ro jẹ ghwọrọ.

²⁶ Ọtiọye na, ọ dianẹ ki mi muẹ djẹ-ẹ, ọ dianẹ irharheghe mi muẹ teya-an;

²⁷ ẹkẹvuọvo me nyẹ oma mẹ mi mi vwo kpotọ, ọ gbe dia ọtiọye-e ọke ri mi de ghwoghwo kẹ ihwo efa nu me da rha dia ọ ra djẹ ku fia.