1 Kọrẹnt 8 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

Emu ra vwọ Gọ Iye

¹ Asakiephana vwọ kpahe emu ra vwọ gọ iye; avwanre riẹnre nẹ avwanre ejobi vwo erianriẹn. Erianriẹn phuoma, ẹkẹvuọvo ẹguọnọ kpọ ohwo viẹ.

² Ọ da dianẹ ohwo ọvo roro kẹ oma rọye nẹ ọye riẹn emuọvo, yọ je riẹn kirobo ra riẹn te jovwo-o.

³ Ẹkẹvuọvo ohwo da guọnọ Ọghẹnẹ, ko riẹn ohwo yena.

⁴ Kọye, vwọ kẹ ẹriọ rẹ emu ra vwọ gọ iye na, avwanre riẹnre nẹ ẹdjọ dia emuọvo vwẹ akpọ na-a, yẹ Ọghẹnẹ ọfa herọ-ọ jokpa rẹ ọvuọvo na.

⁵ Kidie owenẹ edjọ buebu herọ vwẹ odjuvwu eyẹ vwẹ akpọ na–dẹn na edjọ buebu herọ kugbe irivwohwo buebu–

⁶ ye vwọ kẹ avwanre Ọghẹnẹ ọvuọvo re herọ, Ọsẹ na, re emu ejobi nẹ obọ rọye cha ọye re nẹrhẹ avwanre dia, kugbe Ọrovwohwo ọvuọvo, Jesu Kristi, ohwo rẹ emu na ejobi wan oma rọye rhe oma rọye avwanre wa dia.

⁷ Yẹ, ọ dia ihwo ejobi ri vwo erianriẹn nana-a. Ẹkẹvuọvo ihwo evo, rẹ ẹdjọ riẹriẹn oma, ghine ria obo ra vwọ gọ iye; rẹ udu rayen vwọ lọhọ na, i mi gbe ẹgua.

⁸ Emuọre se ru avwanre yovwi vwẹ obọ rẹ Ọghẹnẹ-ẹ. Avwanrẹ rere-e avwanre vwiro miovwi-i, avwanre da re avwanre vwiro yovwi-i.

⁹ Wa kẹnoma rere uphẹ rẹ ovwan na da rhe dia uchukurhe umwemwu kẹ otu re lọhọre.

¹⁰ Kidie ọ da dianẹ ohwo ọvo mrẹ wẹ, ohwo ro vwo erianriẹn, rọ ria emu rẹ iye vwẹ uwevwi rẹ ẹdjọ, ọ da dianẹ udu rọye lọhọre, ọ rha nẹrhẹ, ọ re emu ra vwọ gọ iye?

¹¹ Ọtiọye na oma rẹ erianriẹn wẹn kọye a wan ghwọrọ ohwo nana rẹ udu rọye lọhọre na, oniọvo wẹn ri Kristi vwi fiki rọye ghwu.

¹² Eriyin na, ru wo vwo ru umwemwu kpahe omoni wẹn ru wọ vwọ wan udu rọye rọ lọhọre oma na, yu wo ru umwemwu kpahe Kristi.

¹³ Fiki rẹ ọtiọye na, ọ da dia emuọre kọye cha so eshe kẹ oniọvo mẹ, me gbe re emu na-a, ọ da rha so eshe kẹ oniọvo mẹ.