1 Kọrẹnt 7 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

Ebabẹn ro hẹ Orọvwo

¹ Asakiephana vwọ kpahe eta rẹ ovwan siri. O yoma re ọshare je obọ e vwo te aye.

² Ẹkẹvuọvo fiki rẹ odavwini rẹ ọfanrhiẹ e gbe, e jẹn dọshare daye rọye vwo rere daye dọshare rọye vwo.

³ Ọshare na mi se nene aye rọye vwerhẹ, aye vẹ oshare rọye me je sa vwerhẹ rhe.

⁴ Kidie aye na ọvo se sun oma rọye-e, ẹkẹvuọvo ọshare rọye ri suo; ọtiọye rhe ọshare ọvo ji se sun oma rọye-e, ẹkẹvuọvo aye rọye ri suo.

⁵ Wa vwẹ ovwerhẹ vwọrọn ohwohwo ahare-e jokpa nẹ ovwan rhọvwe kugbe vwẹ ọmọke, rere wa sa vwẹ oma rẹ ovwan vwọ kẹ ẹrhovwo ẹnẹ; tavwe we ki rhi kuoma gbe, re Idẹbono jẹ ovwan ẹdavwọ fiki ri jẹ oma echiro rẹ ovwan.

⁶ Me ta ọnana rere ohwohwo roro kẹ ohwohwo, ọ dianẹ kẹ urhi mi jẹ kẹ ovwan na-a.

⁷ Me guọnọre nẹ ihwo ejobi dia kirobo re me epha na. Ẹkẹvuọvo dohwo dẹse rẹ Ọghẹnẹ ru kẹ, ọvo vwo oghẹre ọvo ọfa vwo oghẹre ọfa.

⁸ Vwọ kẹ aye rọje rọvwọ-ọ kugbe ayeuku me tare nẹ ayen ọvo dia kirobo re me epha na.

⁹ Ẹkẹvuọvo ayen rhe se chiri oma-a, e gbe jẹn ayen rọvwọ. Kidie o fori ra vwọ rọvwọ nọ ọ ra da ghwọrọ vẹ urhuru sivwe.

¹⁰ Mi ji urhi nana kẹ otu re rọvwọ nure, ọ dia omẹvwẹ ri ji ro-o ẹkẹvuọvo Ọrovwohwo, nẹ aye siobọ nẹ ọshare rọye-e

¹¹ (ẹkẹvuọvo o de siobọ no, e gbe jẹn o mutidia ọ rha dia ọtiọye-e ọ vẹ ọshare rọye gba rhuẹrẹ kugbe) ọshare ghwrara ji siobọ nẹ aye rọye-e.

¹² Me ta kpahe i ri chekọ na, ọ dia Ọrovwohwo-o, nẹ oniọvo koniọvo ro vwo aye ro segbuyota-a, rẹ aye na da rhọvwe nẹ ọye rọvwọ, e jẹn ọshare na siobọ no-o.

¹³ Ọ da dianẹ aye kaye vwo ọshare ro segbuyota-a, rẹ ọshare na da rhọvwe nẹ ọye rọvwọ, e jẹn aye na siobọ no-o.

¹⁴ Kidie a wan oma rẹ aye na ru ọshare ro segbuyota na-a fon, a me rha wan oma rẹ ọshare ru aye ro segbuyota na-a fon. Ọ rha dia ọtiọye-e, emọ rẹ ovwan gbe fo-on, ẹkẹvuọvo kirobo rọ epha na ayen kẹ efuanfon.

¹⁵ Ẹkẹvuọvo ọ ro segbuyota-a na da guọnọ nẹ oye hẹriẹ, e jovwo rọ hẹriẹ; vwẹ oghẹre ọtiọna na a sa gba ọshare na eyẹ aye na-a. Kidie ufuoma ọye Ọghẹnẹ se avwanre rhe.

¹⁶ Aye, mavọ wo ru riẹn sẹ owẹ ri che sivwi ọshare wẹn? Ọshare, mavọ wo ru riẹn sẹ owẹ ri che sivwi aye wẹn?

Akpọ rẹ Ọrovwohwo tare nẹ Eyeri

¹⁷ Emu ọvo rọ herọ na, e jẹn ohwo ọvuọvo yere akpọ rọye kirobo rẹ Ọrovwohwo ghare kẹ, rẹ Ọghẹnẹ sere phihọ. Ọnana hẹ urhi mẹ vwẹ ishọshi na ejobi.

¹⁸ Ono re yanvwere vẹrhe re ki se? E gbi jẹn ohwo yena phoro upe rẹ oyanvwe na-a. Ono jẹ yanvwọ vwẹ ọke re vwo se? E gbi jẹn ọ guọnọ oyanvwe-e.

¹⁹ Kidie oyanvwe fi emuọvo-o ọtiọye je hẹ ijẹyanvwọ, ẹkẹvuọvo ọ ro fori kẹ ẹyọnrọn rẹ urhi rẹ Ọghẹnẹ ọvo.

²⁰ E jẹn kohwo kohwo dia ẹdia re sere phihọ.

²¹ Ọviẹn wo ruẹ vwẹ ọke re vwo se we? Wọ davwerhọ-ọn. Ẹkẹvuọvo wọ da mrẹ uphẹ wọ vwọ tan oma, wo jẹn ọ va wẹ abọ-ọ.

²² Kidie ohwo re seri vwẹ odẹ rẹ Ọrovwohwo vwẹ ọke rẹ ọ vwọ hẹ ọviẹn yẹ ọmuvwiẹ rẹ Ọrovwohwo ọ epha. Ọtiọye na ohwo rọ hẹ ọmuvwiẹ jovwo vwẹ ọke re vwo se yẹ ọviẹn ri Kristi ọ epha.

²³ O vwo unuigho ra dẹ wẹ; wọ rha dia ọviẹn rẹ ihwo-o.

²⁴ Ọtiọye, imoni mẹ, kẹdia kẹdia re se ohwo ọvuọvo phihọ, e jẹn ọ vẹ Ọghẹnẹ dia etiyin.

Ihwo re je Rọvwọ-ọ vẹ Eya uku

²⁵ Asakiephana vwọ kpahe otu re je rọvwọ-ọ, ọnana dia urhi rẹ Ọrovwohwọ jiri-i, ẹkẹvuọvo evun mẹ mi vwo jo kerẹ ohwo ra vwẹroso vwẹ arodọvwẹ rẹ Ọrovwohwo.

²⁶ Mi rori nẹ fiki rẹ ukpokpogho rọ cha vwẹ obaro na o yovwiri rere ohwo vwọ dia kirobo rẹ ọ epha.

²⁷ A gba wẹ mu aye? Wo rha guọnọ re wọ rhan oma no-o. A rhan wẹ nẹ aye? Wọ rha guọnọ nẹ wọ rọvwọ-ọ.

²⁸ Ẹkẹvuọvo wọ da rọvwọ, wo ru umwemwu-u, ọ da dianẹ ọmọtẹ rọvwọre o ji ru umwemwu-u. Yẹ otu re rọvwọre mrẹ ukpokpogho rẹ akpọ na, me sa rhọvwe ọyena kẹ ovwan.

²⁹ Imoni mẹ, obo re me ta na na, ọke re bruru na rhe krẹ phihọ; kẹ etinẹ yanran, jẹn otu ri vwo eya nure yeri kerẹsiẹ ra da mrẹ nẹ ayen vwori-i,

³⁰ otu ri muomahọ kerẹsiẹ ra da mrẹ nẹ ayen muomahọ-ọ, otu re ghọghọ kerẹsiẹ ra da mrẹ nẹ ayen ghọghọ-ọ, otu re dẹ kerẹsiẹ ra da mrẹ nẹ ayen vwo ekuakua-a,

³¹ otu ri yere akpọ na kerẹsiẹ ra da mrẹ nẹ ayen yere-e. Kidie erhuvwu rẹ akpọ na ra wan vrẹn.

³² Me guọnọre nẹ ovwan ruẹ ẹmwa-an. Ọshare rọ je rọvwọ-ọ ro ẹnwan rẹ Ọrovwohwo vẹ iruo rọye, obo ro vwo se ru obo ri je Ọrovwohwo;

³³ ẹkẹvuọvo ọshare ro vwo aye ọ ro ẹnwan rẹ akpọ nana, obo ro ru se je aye rọye,

³⁴ ojevwe rọye gbare. Aye ro vwo ọshare-e eyẹ ọmọtẹ ọ ro ẹnwan rẹ Ọrovwohwo vẹ iruo rọye, obo rọ vwọ sa fon vwẹ ugboma vẹ erhi; ẹkẹvuọvo aye ro vwo ọshare ro ẹnwan rẹ emu rẹ akpọ nana, obo ro ru se je ọshare rọye.

³⁵ Me ta ọnana rọ vwọ dia erhuvwu kẹ ovwan, ọ dianẹ ke me djẹ ovwan emuọvo-o, ẹkẹvuọvo rere o vwo yovwi kẹ ovwan rere ẹga rẹ ovwan kẹ Ọrovwohwo vwo jẹ ogharọ evwo.

³⁶ Ọ da dianẹ ohwo roro iroro ro jefo kpahe aye rọye rọ sa phihọ otọ, rẹ urhuru sivwe rọye da ga, kirobo rọ ghene sa gan, e gbe jẹn o ru kirobo rọ guọnọre. E jẹn ayen rọvwọ–ọye dia umwemwu-u.

³⁷ Ẹkẹvuọvo ohwo da ta vwẹ udu rọye kokoroko ọ dianẹ kẹ a gbarọ phihọ-ọ ẹkẹvuọvo ọ da dia ohwo ro se chirako rẹ urhuru sivwe rọye, rọ da ta vwẹ udu rọye nẹ, ọ sa phihọ otọ rhiri, yọ riẹ ru.

³⁸ Ọtiọye na ohwo rọ rọvwọ aye rọ sa phihọ otọ riẹn ru; ọ ro rhe sioma nẹ orọvwe kọye ma riẹn ru.

³⁹ A gba aye mu ọsahre rọye vwẹ uche ọke rẹ ọshare na dia akpọ na kri te. Ọ da dianẹ ọshare na ghwuru, aye na kọ sa rọvwọ ohwo ọfa ro jere, ẹkẹvuọvo vwẹ odẹ rẹ Ọrovwohwo.

⁴⁰ Ẹkẹvuọvo orhiẹ ri mi bruru na ọye oma da ma vwerhọ ọ da dianẹ o jẹ orọvwe vwo. Mi rori nẹ Ẹrhi rẹ Ọghẹnẹ me vwọ ta eta nana.