1 Kọrẹnt 5 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

A cha vwẹ Ọfarhiẹn vwo Guẹdjọ

¹ A rhe vuẹ vwẹ dẹn nẹ ọfanrhiẹ hẹ ohri rẹ ovwan, ọtiẹ oghẹre rẹ ọfanrhiẹ ra je mrẹ vwẹ ohri rẹ egedjọ dẹvo-o; rẹ ohwo vẹ aye rẹ ọsẹ rọye da vwerhẹ.

² Yẹ ovwan phuoma! We se muomahọ-ọ? E jẹn e si ohwo ro ru emu nana nẹ ohri rẹ ovwan.

³ Kidie dede nẹ ugboma mẹ hẹ etiyi-in na yẹ erhi mẹ herọ kerẹsiẹ ra da mrẹ nẹ me hẹ etiyin, mi brorhiẹ hwe ohwo ro ru emu na nure,

⁴ vwẹ odẹ rẹ Ọrovwohwo Jesu. Ọke rẹ ovwan da ghwẹ koko, rẹ erhi mẹ da hẹ etiyin, vẹ ogangan rẹ Ọrovwavwanre Jesu,

⁵ ovwan gba vwẹ ohwo na kẹ Idẹbono rere ọ ghwọrọ ugboma rọye, rere e vwo se sivwi erhi rọye rhọ vwẹ ẹdẹ rẹ Ọrovwohwo Jesu.

⁶ Omaẹyan rẹ ovwan yovwiri-i. Ovwan rha riẹn nẹ ubiughweri tutuno re nẹrhẹ oghwo riọ-ọ?

⁷ Gbi si ubiughweri na nẹ oghwo na ro jẹriọ, rere o vwo jẹ iphughẹ evwo. Kidie Kristi, omogode rẹ ẹwanvrẹn na, e vwiro ze izobo nure.

⁸ E gbe jẹn avwanre, re orẹ na, ọ dia ikara rẹ awanre-e, ikara rẹ ọnko vẹ umwemwu-u, ẹkẹvuọvo ọ vẹ ikara ro jephuo rẹ evun ọfuanfon vẹ uyota.

⁹ Vwẹ ọbe ri mi si rhe ovwan me ta kẹ ovwan nẹ we kuoma gbe ihwo re fanrhiẹ-ẹ;

¹⁰ marho kẹ evwẹ-ọfanrhiẹ rẹ akpọ nana, eyẹ ọvwurhuru kugbe iji, eyẹ egedjọ, jokpa nẹ ovwan guọnọ akpọ na nu.

¹¹ Ẹkẹvuọvo mi si rhe ovwan nẹ we kuoma gbe ohwo ọvuọvo rọ reyọ odẹ rẹ oniọvo jọ reabe rẹ ọfanrhie egbe eyẹ ovwurhuru, eyẹ rọ dia ọgedjọ, ọharhekan, ọgbidi, eyẹ oji–wọ vẹ ohwo ọtiọye ria emu kuẹgbe-e.

¹² Kidie mi vwo guẹdjọ rẹ ihwo re hẹ obo otafe? Ọ dia ihwo rẹ hẹ evun rẹ ishọshi eye evwo guẹdjọ?

¹³ Ọghẹnẹ ri guẹdjọ rẹ otu re hẹ obo otafe. Djẹ ohwo umwemwu na nẹ ohri rẹ ovwan.