1 Kọrẹnt 16 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

Ukoẹcha kẹ Ihwo ri Segbuyota vwẹ evun ri Judia

¹ Asakiephana vwọ kpahe arhọghọ re toro rhe ihwo efuanfon na: kirobo re me ta kẹ ishọshi ri Galesha, ọtiọye ovwan ji ru rhe.

² Vwẹ ẹdẹ rẹsosuọ rẹ ẹdidjala kẹdidjala, ovwan ohwo ọvuọvo miẹ phiẹ ememu vwọ hẹ akakọ re o koko, kirobo ro yovwi kẹ te, rere e vwo jẹ arhọghọ ẹgba vwẹ ọke re me da rhe.

³ Ọke me da rhe, ki mi ji ohwo rẹ ovwan jiri re ovwan si ọbe kẹ nọ ghwa okẹ rẹ ovwan kpo Jerusalẹm.

⁴ Ọ da dianẹ o fori nẹ me je ra rhe, ayen vẹ ovwẹ ke yan usun.

O muegbo rẹ oyan

⁵ Me vwẹriẹ mrẹ ovwan vwẹ ọke re ma da wan Masidonia vrẹn nu, kidie mi rori nẹ me wan Masidonia vrẹn,

⁶ ọkeọvo me vẹ ovwan dia etiyin emerha eyẹ me dia etiyin de ni ohwahwa na emerha, rere ovwan ki sun vwe te idjerhe vwẹ oyan mẹ, vwi kasan kasan re me ra.

⁷ Kidie me guọnọ vwẹriẹ mrẹ ovwan vwẹ asakiephana-a; me phiẹrohọ nẹ me vẹ ovwan cha dia kreki emerha, ọ da dianẹ Ọrovwohwo rhọvwere.

⁸ Ẹkẹvuọvo me daji Ẹfesọs re te Pẹntikọst,

⁹ Kidie ẹchẹ ọhẹhẹre rẹ iruo rọ ghwotọ rhie phihọ kẹ vwẹ, yẹ ukọn buebu jẹ ghwa herọ.

¹⁰ Ọke ri Timoti da rhe, we ja mrẹ nẹ ọ dia egbomọphẹ vwẹ ohri rẹ ovwan, kidie o ruẹ iruo rẹ Ọrovwohwo na, kirobo re me epha.

¹¹ Ọtiọye na e jẹn ohwo ọvuọvo jẹfia-a. We suo vwẹ idjerhe rọye vwẹ ufuoma, rere o rhivwi bru uvwe rhe, kidie mi phiẹrohọ nẹ ọ vẹ imoni na re gba cha rhe.

¹² Vwọ kẹ omoni rẹ avwanre Apolọs, me ta kẹ gangan nẹ ọ vẹ imoni ri chekọ na bru ovwan rhe, ẹkẹvuọvo ọ rha dia ọhọre rẹ Ọghẹnẹ nẹ ọ ra vwẹ asakiephana-a. Ọ cha rhe vwẹ ọke rọ da mrẹ obọ.

Oyare vẹ Eyere rọ ka oba

¹³ Wa rhẹrẹ, we mndia gan vwẹ esegbuyota rẹ ovwan, we yivwaro, wa gan oma.

¹⁴ Kemu kemu ru we ruẹ ejobi we ru ayen vwẹ ẹguọnọ.

¹⁵ Asakiephana, imoni, ovwan riẹnre nẹ evwruwevwi ri Stifanas eye hẹ ihwo rẹsosuọ ri kurhẹriẹ vwẹ Akaya, ayen da vwẹ oma rẹ ayen phihọ otọ vwọ kẹ ẹga rẹ ihwo efuanfon na;

¹⁶ me ta kẹ ovwan nẹ wa vwẹ oma kpotọ kẹ oghẹre rẹ ihwo etieye na kugbe kohwo kohwo ro kuoma gbe ru iruo na kugbe e re wian owian na.

¹⁷ Me ghọghọre vwẹ ẹcha ri Stifanas kugbe Fọtunatọs kugbe Akaekọs, fikiridie rẹ ovwan rha hẹ etiyin-in na, kẹ ayen reyọ ẹdia rẹ ovwan.

¹⁸ Kidie ayen sasa ovwẹ oma kirobo rọ je sasa ọ rẹ ovwan. Ovwan mrẹ oghẹre rẹ ihwo etieye na vughe.

¹⁹ Ishoshi rẹ Ẹsha yere ovwan. Akuila kugbe Priska, kugbe ishọshi rọ hẹ uwevwi rayen, vwẹ omamọ rẹ uyere rhe ovwan vwẹ odẹ rẹ Ọrovwohwo.

²⁰ Imoni na ejobi ne yere ovwan. Wa vwẹ unuẹfiọnfiọn ọfuanfon yere ohwohwo.

²¹ Mẹvwẹ, ri Pọl, re vwẹ obọ mẹ si uyere nana rhe ovwan.

²² Ọ da dianẹ ohwo ọvuọvo rhe vwo ẹguọnọ kẹ Ọrovwohwo-o, yẹ a harherọ ekan. Ọrovwavwanre, cha!

²³ Ẹserọphẹ rẹ Ọrovwohwo Jesu vẹ ovwan dia.

²⁴ Ẹguọnọ mẹ vẹ ovwan ejobi dia vwẹ evun ri Kristi Jesu. Isẹ.